插圖: Wendy 

揞名爆

「高佬」為鬼仔買玩具

圈中唔少男藝人都係大細路,鍾意買玩具儲玩具,搵番啲童年回憶。不過影星「高佬」呢,仲唔止咁簡單,佢買咁多模型呀公仔呀,係要俾佢啲鬼界朋友 happy呀!

 

據圈中人爆料,「高佬」為求事業順利, N年前開始養泰國鬼仔。而養鬼仔要俾唔少供品,玩具就係其中一種,據聞令鬼仔愈開心,佢哋就會更加幫手,助你達成心願喎。迷信嘅「高佬」信到十足㗎!所以周不時就入貨買玩具。講真吖,同佢個款真係一啲都唔夾,好難想像佢咁有童真囉。之但係,「高佬」嘅事業真係幾順,所以佢雖然知道鬼仔係易請難送,仍然繼續養,數目仲有增無減。
媽咪姐只想奉勸一句,信乜都係假,信自己最實際!小心走火入魔呀。

 

邊個係「高佬」?
1.靚仔㗎!
2.公仔箱出身。

「震一震」無品狂鬧幕後


插圖: Wendy 

公仔箱小生「震一震」曾幾何時拍劇又做主持,前途無限!不過,一次桃色事件,令佢即刻沉晒,女友走埋,直到依家都上唔番以前個位。 Well,都話色字頭上一把刀㗎啦!最近有幕後人仲同媽咪姐講,「震一震」衰嘅,唔止一樣㖭。
話說「震一震」未「出事」前都幾多嘢拍吓,有次導演見佢企錯咗位,吩咐助導叫佢企番過啲,點知「震一震」即刻黑面發火:「得啦!你識咩吖!我係企呢度㗎!」阿助導妹妹俾佢嚇一嚇,口震震咁話:「吓……但係導演叫你企過少少喎。」點知「震一震」連導演都唔賣帳,鬧得仲勁:「抵你呢啲人做死一世 PA!人哋講乜你就做嘅咩?用個腦諗吓啦!死蠢!」
嘩!人哋一個妹妹仔,都係聽導演吩咐啫,使唔使咁講嘢呀?卒之,要導演親自出聲,「震一震」先死死地氣行開少少。你話嘞!呢啲人係咪欺善怕惡勁無品吖!搞到今時今日咁,兩個字,因果囉。

 

邊個係「震一震」?
1.唔靚仔,得把口。
2.學院派,識做戲,但唔識做人囉!

    全站熱搜

    tvb4life 發表在 痞客邦 留言(0) 人氣()