IQ考考笑
高海寧開題： TVB台徽係咩顏色？（由上至下排列）
今期呢條另類 IQ題由高海寧出題，就係 TVB嘅 Logo用邊三種顏色？由上至下順序讀出。題目看似簡單，但暗藏危機，唔識答嘅話，會唔會俾高層照肺㗎？隨時入雪櫃喎！其實呢個 Logo喺電視城無處不在，應該難唔到 TVB班藝員，不過真係有藝員答錯喎！
連自己「屋企」嘅 Logo都唔識，點說服前員工「回家」呢！
上兩個禮拜，《東張西望》搵咗《愛•回家》班演員呼籲前員工「回家」，仲話返嚟有盆菜食。喂!你哋有部分家庭成員連台徽咩色都唔知，點叫人返歸呀！
藍莓：「掉轉咗啫！」
新加入《愛•回家》行列嘅藍莓（劉俐），聽到問題後不加思索就答：「紅綠藍囉！」知道答錯後仲要撐只係掉轉咗，話唔太緊要喎！嘩！俾梁乃鵬聽到就弊啦！
王浩信：「等我諗清楚先？」
當紮小生王浩信聽到個問題之後，好緊張咁講：「嘩！答錯唔係咁好喎！」再經過歷時分半鐘嘅思考，終於答啱喇！一身鬆晒！
姚瑩瑩：「考我唔到囉！」
喺無綫做咗超過十五年嘅姚瑩瑩，果然夠資深，唔使提水、唔偷睇、唔使思考就即刻答啱，至叻係你啦！
黃子雄：「我以後會記住！」
由明珠台做主持撈到翡翠台做演員嘅黃子雄，應該難佢唔到，不過佢都答錯喎！好在佢補番句：「我以後會記住個 Logo，知錯能改，應該唔使入雪櫃啩！」
朱慧敏：「我知， YEAH！」
準備入廠拍《愛•回家》嘅朱慧敏，喺 13廠門口答呢條常識題。朱慧敏出奇地答得快而準，而且好肯定自己嘅答案，原來佢偷睇廠門口嘅 Logo，我哋有片為證㗎！
高海寧開估：
哈哈！答案咪係藍綠紅囉！
全站熱搜
留言列表
