上周四( 31日),鄭嘉穎難得在港,出席自己代言的品牌活動時,對於英皇怪責唔錄音一事,他輕佻表示知道:「我連 TVB都唔得閒返,不過再唔錄歌俾人(英皇)鬧爆我。」 

娛樂喧

忽然1周 (954期) 簽咗兩年冇交貨 鄭嘉穎為賺人仔得罪英皇

簽約兩年唔放期錄音 鄭嘉穎為賺人仔辣㷫英皇

自 10年在大陸竄紅後,鄭嘉穎長留大陸搵人仔。填滿荷包後,唱歌出身的他,開始密謀進軍樂壇,去年初成功和英皇簽下兩年歌星約圓夢,並穩袋二百萬酬勞。可是簽約後,鄭嘉穎繼續來者不拒狂接大陸劇,遲遲唔俾期錄歌。人工照袋,出碟就一拖再拖,激到英皇紮紮跳。
距離完約只剩三個月,英皇早前向鄭嘉穎發最後通牒。聞到𤓓味的鄭嘉穎,終乖乖回港錄製新歌,新碟更會以極速時間於月中面世。周一( 4日)英皇高層吳雨在電話承認:「佢咁忙,邊有時間做歌星吖!」明顯話中有骨。

 


9月派新歌鄭嘉穎拖足年半, 9月尾終於派歌,而鄭嘉穎為免再辣㷫英皇,近日在自己微博,積極宣傳新歌和微電影。 

93年唱歌出身的鄭嘉穎,當時簽約唱片業龍頭寶麗金,可惜發展平平,後轉戰台灣,一樣撈唔掂。直至 02年返無綫拍劇,最後攞埋視帝成功翻身。三年前,鄭嘉穎因拍大陸劇《步步驚心》的八阿哥在大陸爆紅,其身價更達 40萬一集,難怪近兩年他長留大陸,唔願返港。

遺憾冇 hit歌

錢搵到了,但鄭嘉穎時不時發紅館夢。前年他冧掂樂易玲出面與英皇 CEO吳雨斟洽,成功和英皇簽了兩年歌星約,加盟費為二百萬,做林峯師弟。據知吳雨更口頭承諾會為鄭嘉穎入紙搞紅館騷,助他圓多年心願。
一知情人透露:「嘉穎好鍾意唱歌,佢入行前仲參加過新秀。佢見林峯喺紅館開過兩次騷,就𦧲樂小姐幫佢傾。當時吳雨大哥見嘉穎咁紅,嘉穎又講到自己沖涼又唱,瞓覺又唱,但就好遺憾冇一首自己嘅 hit歌。大哥以為佢會好似阿峯(林峯)咁勤力練歌,咪應承簽佢囉,仲話會幫佢去紅館入紙,搞到嘉穎開心咗幾晚。」


鄭嘉穎幾乎全部時間北上賺人仔,兩年來,他密密拍了差不多十部電視劇,收入逾半億人仔,難怪遲遲唔返香港「交差」。 

反怨英皇唔認數

不過兩年合約至出年 2月就屆滿,加盟費早已袋袋平安的鄭嘉穎,卻遲遲未為出碟度期錄音。一直恨開紅館騷的他,據知早前更反向英皇詐型,指吳雨曾應承自己入紙紅館,但今時今日卻沒有兌現。「明眼人一睇就知邊個唔啱,不過嘉穎覺得就算自己唔夠歌,咪唱其他人嘅歌,好多歌星喺紅館開騷都係咁,覺得英皇冇幫佢爭取。吳雨知道後嬲到噴火,即時搵樂小姐,叫佢拆掂佢。」
據知鄭嘉穎和英皇簽約時,合約訂明鄭需要在限期內,至少出一隻唱片,否則便當違約。現時距離完約還剩三個月,英皇早前便向鄭發最後通牒,指對方若不完成合約條款便會訴諸行動。聞到𤓓味的鄭嘉穎,早前終乖乖回港錄製新歌,新碟更會以極速時間於月中面世。「其實要錄一隻碟,最少要三個月時間,佢呢隻碟連錄音同拍 MV、影唱片封套都係個半月左右,仲試過連續兩晚,個個陪佢錄通宵,係人都有怨言啦!」知情人透露。
周一( 4日),記者致電吳雨,他一聽「鄭嘉穎」名字即唉聲嘆氣說:「唉!佢咁忙返大陸拍劇,邊有時間唱歌做歌星吖!(會唔會同佢入紙紅館?)吓!佢歌都未有,紅咩館!唉……佢太忙,一直都冇時間錄音,出咗碟先算。(張約就快滿,有冇同佢傾續約?)未諗,到時先算啦!」說畢便以開會為由匆匆掛線。
至於鄭嘉穎,上周四( 31日)出席活動時坦承被英皇催逼:「今年真係喺上面拍咗六、七套劇,下年先可以返 TVB幫手。我知英皇等咗我好耐,再唔做啲嘢,張約都就滿,所以呢兩個月狂錄音,唔係真係會俾人(英皇)鬧爆。」難得鄭嘉穎知衰,不過得罪英皇,鄭生嘅紅館夢,短期內唔使諗!


高層傍實去年 2月,鄭嘉穎由樂易玲及英皇娛樂集團 CEO吳雨帶領,在英皇春茗上宣布加盟,受大星般禮遇。 

成龍都握手春茗當晚,老闆楊受成(右一)為隆重其事,主動帶鄭嘉穎滿場飛,更把他介紹給成龍認識,氣勢如虹。 

今年 3月英皇春茗晒冷活動中,人在內地的鄭嘉穎因拍劇而冇到,反而同是無綫親生仔的林峯,卻年年現身撐場。 

鄭嘉穎 hea住做,相反林峯則勤力得多,他平均一年出一碟,單是紅館個唱已有 4次,為有份搞演唱會的英皇帶來可觀收入。

麻煩事件多

鄭嘉穎麻煩難相處時有所聞,無論工作以內以外都曾傳過是非,若想事業繼續一帆風順,看來鄭生係時候認真檢討吓。

 

爭改劇本
08年拍《烈火雄心 3》時,因不滿王喜擅改劇本搶鏡,於是向樂易玲篤背脊。其後他亦學人改劇本,但被王喜在訪問中彈改得差,「佢學我改劇本,不過佢改 3句又唔填番 3句落去。」

 

戒煙講大話
身為政府宣傳片戒煙大使的鄭嘉穎, 08年被拍得當街煲煙。事後他解釋因參加《舞動奇蹟》壓力太大而再吸煙,並聲言會積極戒煙,但其後依然是煙民。

 

唔肯剃頭
自恃身價高的鄭嘉穎,去年因不肯剃頭而拒曾勵珍邀拍無綫劇集《寒山潛龍》,但卻願意為內地劇《步步驚心》而剃光頭。


撰文:娛樂組
攝影:攝影組

    全站熱搜

    tvb4life 發表在 痞客邦 留言(0) 人氣()