外太空

阿信最慘

《半沢直樹》喺日本收視大爆,社會學家話由此可見日本人喺日常生活受到幾大壓迫,搞到吓吓都要以牙還牙去宣洩情緒。
負面嘢唔可以多提,人人都要有正能量。最正能量嘅《阿信的故事》原來面世三十周年,為賀壽,拍成電影版,提醒大家慘處未算慘,慘得過七歲要去打工?慘得過無飯食無番薯食要食樹皮?
你完全唔知《阿信的故事》是什麼?噢,真羨慕你的年輕。

三揀一

《阿信的故事》是 1983年的日本電視劇,播足一年。《歡樂今宵》喺 1985年開始播,播完,《婦女新姿》又播,掀起當年一輪日本師奶劇的熱潮。
電視觀眾的口味,其實真係無乜點變。
《阿信的故事》當然係講阿信,由佢七歲開始捱窮出走打工受苦,講到佢八十三歲坐擁十幾間「八佰伴」,阿信要由老青幼三位女演員分擔。電影版拍唔晒,齋講童年阿信有幾慘有幾慘,俾老豆送去打工,換米養活一家十口。去打工,就被管家虐待兼老屈偷錢;著草,被逃兵救命,個逃兵無耐又俾人殺死。如果,你睇《殭屍》都話感動到眼濕濕,睇《阿信的故事》,至少要預備兩卷廁紙。


為宣傳,小阿信濱田茲音將會於十一月二十一日訪港。跟三十年前的小林綾子(上圖)比較,你會明白現今世代 sell可愛有幾重要。 

關於《阿信的故事》,最大記憶除了「命運是對手,永不低頭」之外,就要數劇情講到窮人要有碗白飯咬吓係幾困難。今日的小朋友看到,會否覺得比《愛•回家》更好笑? 

半沢老婆

佔戲最重的阿信,由九歲女孩濱田茲音飾演,試鏡揮低人氣童星蘆田愛菜(《告白》入面松隆子個女)。似西班牙選龍門,揀極都有好貨色。
奇就奇在阿信老豆老母竟然由上戶彩同稻垣吾郎飾演。上戶彩憑《半沢直樹》又爆紅,今次主力負責扮大肚落冰川濕身;稻垣吾郎就剪短頭髮演一個廢柴老公,都算大突破吖!
不過,如果你一味只想懷舊,不用怕,當年的小阿信小林綾子轉做加賀屋太子女加代個阿媽。三十年前做阿信阿媽嘅泉萍子,都有份,泉萍子仲會同阿信有段對手戲。
其實, ATV好應該考慮播《阿信的故事》來硬撼《 On Call 36小時 2》……


拍完《半沢直樹》,做完又幫到老公手又傻氣仲識煮飯嘅阿花之後,上戶彩簡直是男人至愛。跟 M記女神一樣。 

稻垣吾郎演阿信老豆,啱啦,都係木口木面便可以。 

三十年後的小阿信,小林綾子近年主打舞台劇。你是否更希望睇到當年的少女阿信田中裕子?

撰文:方俊傑

全站熱搜

tvb4life 發表在 痞客邦 留言(0) 人氣()