軟硬開騷着雞汁現代褲

葛民輝(阿葛)和林海峰(Jan)組成的「軟硬」將於農曆新年前夕再度玩轉紅館,阿葛承諾會以「朱古力」肌向觀眾拜年,叫大家準備好大利是。Jan則笑言會着現代褲打底,再加雞汁共冶一爐。又說每逢開騷全屋女人都會引來很多狂蜂浪蝶,為幫女兒「斬桃花」,Jan落閘說:「唔好追我個女喇!」



Jan(右)與阿葛明年初開騷,大搞新意思,以歌劇會歌迷。

適逢今年是「軟硬」入行25周年,阿葛和Jan昨日頭笠卡通膠假髮舉行記招宣布明年1月23至26日及28至30日,將再度殺入紅館舉行共七場的《麥當勞麥麥嘻麥麥哈軟硬嘻哈OPERA 2014》賀歲騷。兩人今次大搞新意思,以歌劇會歌迷,Jan不忘抽水說:「今次我哋會結合芭蕾舞同本土電視劇精神,會着現代褲打底,再加雞汁共冶一爐。」阿葛則表示會以六個場口重現兩人25年來的經典時刻。


軟硬找來老中青三代軟硬谷騷。
阿葛演胸肌夾利是

開騷時間正值農曆新年前夕,阿葛不惜「賣肉求財」,他說:「我會用肌肉去夾大家嘅利是,見到大利是仲會再谷行啲!」其中1月28日又正好是Jan的46歲牛一,他笑言為免孤零零過生日,所以答應生日開工:「我驚冇人約,咁啱紅館有期,阿葛又得閒,咪打發吓時間。」阿葛即笑言會送上人肉蛋糕祝賀:「咁我將我排朱古力變做蛋糕幫佢慶祝,六舊變一舊易好多!」

「買飛咪追我個女」

有指Jan大女林泳追求者眾多,但他下禁令不准女兒拍拖,他昨否認但語帶雙關說:「冇唔畀,不過想買飛直接搵我同公關好啲,唔好追我個女喇。通常開騷前就好多飛來蜢,想用唔同渠道接觸我哋買飛,其實最近我家傭都多咗人追!」問他大女的追求者只是想追飛,而非追她?Jan笑言:「唔排除呢個可能性,但相信係個別事件。」

文:音樂組

農曆年紅館𢭃利市 軟硬攞雞汁繼續嘻哈  
  
 
林海峰(Jan)和葛民輝組成軟硬天師,不經不覺已踏入25周年,二人將於明年農曆年檔在紅館開騷,他們將以歌劇形式大放笑料,揚言把May姐雞汁帶埋上台,總之繼續嘻哈歡笑聲。
繼去年《草蜢森巴大戰軟硬FANS》演唱會後,軟硬將於明年初再踏紅館,暫定開七場《麥當勞麥麥嘻麥麥哈SOFTHARD heHA OPERA》,橫跨賀歲檔期。在昨日記者會上,軟硬笑稱:「以演唱會和歌劇形式之間,有香港芭蕾舞團與本土電視劇精神,即係穿現代褲打底和雞汁演出。」會上,率先播放短片《軟硬天師血淚史五部曲之第一部曲:西瓜波與人字拖》,令現場捧腹大笑。
阿Jan替大女擋飛來蜢
軟硬又指,相信沒有觀眾入場期待他們載歌載舞,大家志在畀錢奉獻而已。適逢軟硬25周年,歌劇將包含這25年來的事,問到會否把結婚經過搬上舞台?他們即顧左右而言它,只謂洞房花燭無可能重現眼前。
1月28日正值是阿Jan的生日,何以選擇當天開騷?他笑言:「純粹打發時間,未約人,又驚無人約。」阿葛則說反正未試過在紅館慶生,戲言:「我會將『朱古力肌』變成『蛋糕肌』送畀佢,到時會用肌肉夾住觀眾嘅利市。」
有報道指林海峰的大女被男生追求,阿Jan即說:「你哋買飛就追PR,唔好追我個女啦,或者透過我追都好啲。每次開騷特別多狂風浪蝶,連家中傭人都多人追,好多飛來蜢,相信個女畀人追只係個別事件。」
此外,提到「商品說明條例」訂明開騷要準時,阿Jan直言:「我嘅準時定義就係每年一次開騷,相信觀眾覺得完場時間重要啲。(預咗罰錢?)完場不嬲都罰啦。」
採訪:Pauline 
攝影:林良明 
編輯:陳禮恒

林海峰為家人擋蜢


葛民輝(左)、林海峰

噚日林海峰同合作咗25年拍檔葛民輝喺尖沙嘴為出年1月紅館騷舉行記招,阿葛指今次形式係演唱會同舞台劇之間,佢亦都操弗用肌肉夾大家利是。講到有傳唔准大女拍拖,林海峰嚴肅話:「冇呀,不過大家買飛可以搵我同公關,唔好透過我個女,開騷前永遠都好多飛來蜢,連家傭都多人追咗,突然家人同大家關係好咗。」
撰文:馮仁昭

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()