許冠傑任影唔趕

歌神許冠傑(Sam)去到邊都咁受歡迎,日前,東姑喺香港機場撞到佢出埠,就如同平時佢開concert咁,畀成班粉絲團團圍住,爭住同歌神影相留念,十足機場新景點咁款。

慘就慘在阿Sam嗰日其實都幾趕時間,後面有成班工作人員等住佢入閘,相信係出埠去登台之類。不過,fans嘅熱情難卻,阿Sam又鬼咁好人,個個fans埋去,佢都來者不拒,仲揮晒手,攬晒膊頭同人影合照,搞到排隊影相條龍愈排愈長。

最終阿Sam不負眾望,喺最後關頭都盡量同所有fans逐一影晒相先,然後喺工作人員三催四請下趕入閘,難得佢喺樂壇地位屬神級,就算趕機呢啲重要關頭都應酬粉絲先,認真親民到爆!

阿Sam親民得誇張過人,同粉絲合照時揮晒手、攬晒膊頭,興奮過fans。

爭住影相嘅粉絲愈圍愈多,而與阿Sam同行嘅工作人員就不斷催促,趕飛機時間爭分奪秒。

歌神一出現機場,立時變咗人肉布景板,成棚粉絲爭相要求同佢合照。

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()