非洲皮革(勁高價)產地:非洲海域一帶飼養難度:★★★幼體價錢:$350至$500 

Petbook

珊瑚狂迷

玩開水族的人,一般是養魚養蝦,但竟然有人養珊瑚養上癮。
相信不少人都誤以為珊瑚是植物,其實牠們也是動物的一種。雖然珊瑚不會動,不會跟主人有交流,但阿新卻被牠們鮮艷外形所吸引,在家中養了超過 20個品種,更不時把自家繁殖的珊瑚送給友人。

 


每次換水時,阿新會先把新水過濾,保持水質清潔。 

阿新的家位於元朗錦田,屋內有一個入牆式大魚缸,裏面養滿了珊瑚,「缸入面大約養咗 20種以上嘅珊瑚,我覺得珊瑚顏色好鮮艷好靚,加上比較少人養夠晒特別。好多人都誤以為珊瑚係植物,其實珊瑚屬於無脊椎動物,平時只可以固定喺石上面食微細生物維生。」
自小喜歡養淡水魚的阿新, 04年中學畢業後才開始接觸鹹水生物,一玩便是 10年,「我讀小學時已經開始養金魚,直至中學畢業後,想試吓挑戰養鹹水魚,所以去咗金魚街嘅水族鋪打工邊學邊做。當時人工得$5,500,我仲記得嗰陣為咗養魚,同老闆求情分兩個月扣糧,買部價值$2,000嘅水冷器返屋企,真係好瘋狂。」
鹹水魚發燒友大多都會把魚和珊瑚一起養,阿新也不例外,結果一養便成癡,「我一直都想試吓養珊瑚,咁啱當年鋪頭想賣埋珊瑚,所以我就有機會喺鋪頭試吓養,最初我同老闆都唔識㗎,但佢又放心畀我打理,結果自己玩玩吓就學識,仲上埋癮添。」

最初家人反對

初時家人反對阿新養珊瑚,但因他有豐富的養珊瑚知識,在 07至 12年間獲聘到海洋公園工作,令家人明白到他並不是玩玩吓,「養珊瑚要長開水冷器,水冷器同冷氣機一樣,會排出熱空氣,當時屋企冇位,咪惟有放入房養囉,屋企人見我捱熱所以好反對㗎!直到我養咗幾年,有啲成績,之後海洋公園仲因為咁請咗我入去打理水族生物,自此家人就冇再反對我,仲畀我喺廳度養添。」
很多人認為養珊瑚很難,但阿新表示只要水質保持得好,就不會養死,壽命可以長達 100年以上,「野外珊瑚生活喺冇受污染嘅水域,水質及溫度要求比較高,所以養之前一定要用藥清除晒磷酸鹽及硝酸鹽等對珊瑚有害嘅物質;水溫要保持喺攝氏 22至 27度,同埋需要一星期換一次水。另外,如果要養埋魚嘅話,千祈唔可以買蝶科類嘅魚,因為佢哋性情兇惡,會殺死珊瑚。」


阿新表示珊瑚缸內一定要養一隻角星,因為牠可以清除缸內的青苔,是一名清道夫。 

小丑魚顏色鮮艷,加上體形小,不會對珊瑚有害,適合在珊瑚缸內飼養。 

離奇出現蝸牛

雖然阿新是老手,但也有失手的時候,上年他的珊瑚缸內離奇地出現大量蝸牛,令他損失慘重,「正常淡水缸先會有呢種蝸牛,但唔知點解我個缸都有出現,仲愈生愈多,起碼過萬隻,真係好核突!最後我落藥解決,但有 7成珊瑚都係因為咁而死,事後我估係當時新買入嘅珊瑚入面已經藏有蝸牛所致。」
阿新現不時繁殖珊瑚,繁殖成功後會送給其他珊瑚發燒友,「養得好,珊瑚會慢慢分裂到其他石上面,所以唔使特別用方法繁殖,有時生到個缸冇晒位,我就會送畀有養開嘅朋友,可以互相交流吓我就好滿足。」


波子(至 cute)產地:印尼海域一帶飼養難度:★★★幼體價錢:$180至$200 

千手(夠霸氣)產地:美國海域一帶飼養難度:★★★★幼體價錢:$180至$350 

鈕扣腦(勁鮮艷)產地:印尼海域一帶飼養難度:★★★幼體價錢:$300至$350 

草皮(入門級)產地:印尼海域一帶飼養難度:★幼體價錢:$100至$300 

騷 GOODS 養珊瑚除雜質

 


珊瑚糧$160 

磷酸鹽去除劑$230 

硝酸鹽去除劑$230

撰文:何倬然
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(1) 人氣()