課室主題房(可容納約 12至 25人)採訪當日,在課室主題房內拍照,這裏的布置真的令人置身課室一樣,令記者彷彿回到那段青澀歲月!阿釗表示:「啲枱凳我搵得好辛苦,問過好多間學校都唔肯賣舊枱凳畀我,好彩最後喺一間賣舊傢俬嘅鋪頭搵到。」 

創業通

工廈開派對 Comma Party

生日、萬聖節、聖誕節、除夕、周年聚會等,一年到晚,我們總有慶祝不完的活動!然而,每次大家會否為舉辦派對場地的問題煩惱不已?次次都唱 K,完全沒有新意!
今年 25歲的阿釗,於 11年 12月在觀塘工廈分租了一個單位,讓客人可以無拘無束地開派對,仲要有「家」的感覺!後來生意愈做愈好,他更多租幾個單位,並設計不同的主題房間供客人選擇,如懷舊、課室、電影及廚房等,十分有趣!

 

記者到達位於觀塘工廠區內的 Comma Party,需先於玄關脫下鞋,猶如到訪朋友家。老闆阿釗表示 Comma Party擁有 8間主題房間,當中包括家庭、懷舊、課室、電影、廚房、睡房、日式及草原主題。
下午 6時前,每人最少消費 2小時,收費$48起;下午 6時後,每人則最少消費 3小時,收費$68起。客人可以自備或到會食物, Comma Party則提供飲品,「汽水、綠茶及果汁任飲;除咗廚房主題房有獨立廚房外,我哋仲有一個開放式廚房畀客人整嘢食,都幾方便。」他們還備有各類型 board games供客人借用,每間房間更設有電視及電玩設施。
每一間房的裝潢都一絲不苟,細微至房間的每一個裝飾及道具都能配合其主題,「最初我請裝修師傅整家庭房,自己就喺側邊睇同偷師,發覺原來裝修都唔係好難,所以為咗慳錢,課室、懷舊、草原、日式等都由我自己一手一腳髹油及裝修。」


家庭主題房(可容納約 8至 20人)這是阿釗第一間設計的主題房間,有色彩鮮艷的沙發,希望可帶給客人「另一個家」的舒適感覺。 

睡房主題房(可容納約 4至 12人)睡房主題房間,又怎可少了一張床?客人可在這裏開睡衣派對,同時進行枕頭大戰! 

日式主題房(可容納約 10至 20人)和風味十足的主題房間,內設有 8張榻榻米,而傳統的日式紙門更是阿釗於內地訂造。日式主題房間可跟草原主題房間合併,打通後最多可容納約 70人。

紙皮石逐粒鋪

數到最大工程的主題房,阿釗表示非懷舊房莫屬,「我逐粒逐粒紙皮石去鋪地板,鋪咗成日,腰都痛埋;草原房個天空天花都係我自己油,我覺得自己唔做呢度,應該可以去做裝修師傅!」
阿釗平日多於淘寶網上購入各種飾物與道具,在眾多房間中,他比較喜歡懷舊房,在搜集飾物與擺設時,他花了不少心機,他笑說最近更新添了一部舊式紅白機,十分切合主題,「我好著重真實性,我想搵一個舊式暖水壺襯番懷舊氣氛,但喺香港搵唔到,有次我去上海旅行,見到啱用就即刻買咗返嚟。」
平日阿釗常常與客人談天,他希望可以帶給客人「家」的感覺,咭片上更印有「住戶證」字樣,令大家更易投入享受其中。「我唔鍾意去 cafe或者唱 K,呢啲地方人多又勁嘈。讀書嗰陣,試過同幾個朋友租一間酒店房嚟開生日會,十幾廿人喺房入面玩,其實幾開心!之後我諗其實好多人都會租酒店房又或者 service apartment嚟開派對,但租呢啲地方咁貴,不如我租一個地方專畀人開派對,用『另一個家』做主題,收費平啲又可以玩得放啲!」


電影主題房(可容納約 5至 15人)電影主題房間內,貼滿了不同電影的海報,黑色的牆身設計,令人猶如置身於電影院中。 

廚房主題房(可容納 15至 30人)廚房主題房內設有獨立廚房,喜歡烹飪的客人可以自備食物,大展廚藝!另外,其他客人則可以使用開放式廚房。 

以家庭房試業


阿釗強調經營這門生意,最常做的是清潔,「要將每間房執拾整齊,最緊要畀客人感到舒適。」 

最初因資金不多及試業心態,阿釗選在租金相對較平的觀塘工廠區,分租了一個 450呎的單位,並以「家庭」作第一間的主題房間,「雖然呢度係工廠區,但離港鐵站路程只係約 8分鐘路程,其實都好方便,可以吸到區內的寫字樓及學生客。」
Comma Party於 11年 12月開業,當時市場上租借場地開派對的地方不多,為了加強宣傳,令多些人認識,阿釗除了在 facebook上開專頁外,還會製作易拉架及親身到各區派傳單,「每次朋友約我出去食飯,我會早一個鐘頭去附近派傳單,我主要喺旺角、尖沙咀、觀塘區度派,每日派約 1,000張。」雖然阿釗擔心派傳單的效用不大,但當時正值聖誕,所以有不少客人慕名而來,其後便靠客人推介給朋友,慢慢做出口碑。
因反應理想,於 12年尾至 13年中不斷擴充,發展至現時的 8間主題房間,「見同層及隔籬大廈有吉鋪,就陸續租嚟設計更多嘅主題房間。我都係以自身喜好出發去設計,自己鍾意睇電影同埋好鍾意中學時期嘅日子,所以就設計咗電影房及課室房。」

通宵照開派對

阿釗表示聖誕節與暑假乃開派對的旺季,但其餘日子也有很多人慶祝生日及特別聚會,而每星期的五、六及日通常都會爆場,「週末 8間房都會 full booking,因為我哋通宵營業,有時客人會玩通頂,其實看鋪都幾辛苦㗎,所以客人要通頂要預早通知我哋,要做好人手安排。」
客人的年齡層很廣, 90後至 60後都有;每間房可容納不同的人數,一般最少容納 7、 8個客人,有部分房間在有需要時則可打通,「試過有一班四十幾歲嘅中學校友嚟搞周年聚會,佢哋着晒校服喺課室房度玩得好開心,仲話想每年都嚟呢到開派對,當係每年屬於佢哋嘅開學禮;仲試過有一位老師退休,佢仔仔幫佢搞咗一個榮休派對,邀請咗好多嗰位老師教過嘅學生及一齊共事過嘅同事出席,嗰次真係好誇張,佢哋打通晒 3間房,總共有成 90人!」
除此以外,還有不少機構媒體會租用 Comma Party作拍攝相集之用。阿釗坦言要打理一盤生意實屬難事,但他希望可以再設計新的主題房間,讓客人有新鮮感。


懷舊主題房(可容納 7至 20人)這房間的地磚全由阿釗一手鋪成,而且道具幾可亂真,除了舊式暖水壺,更可以找到不少懷舊物品,如花露水的海報、摺枱及摺凳等。 


除了每間房間設有獨立電視及電子遊戲設施,阿釗更提供了十多款圖版遊戲予客人借用。

華正 客人

我哋想一班人開 Party,咁啱上網搵到 Comma Party,佢有好多唔同主題嘅房,都幾得意!我哋 book咗廚房主題房,有獨立廚房可以煮嘢食,好方便。同埋好似去咗人哋屋企玩咁,好自在同舒服!

開業成本

租 金:$15,000(兩按一上)
裝 修:$15,000(加道具)
總投資:$30,000

每月收支

租 金:$50,000( 3個單位)
人 工:$40,000( 7位兼職員工及連 2位老闆)
入 貨:$20,000(加雜費)
營業額:$130,000
盈 利:$20,000


撰文:霍芷晴
攝影:葉偉豪
部分相片由被訪者提供
模特兒: Alison、 Tiffany、 Eugene、 Brian

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()