黑色花邊魚尾晚裝$24,000現為兼職 model的 Lilian,由她親自演繹自家設計的晚裝、便服及婚紗。 

青雲路

我的志願——時裝設計師 Kanalili 電話: 2778 7368

「我的志願是做時裝設計師」,可能不少人在小學作文時曾經寫過,但當中一位作者 Lilian,就一直以此為目標,有人以為她是𡃁模,但她也是設計系碩士畢業生,曾擔任晚裝婚紗公司的首席設計師,最近更創立了自己的品牌 Kanalili,以便服、晚裝及婚紗為 3大主線,希望打造自己的品牌,外表柔弱的她,實是一位事業型女性,為目標不斷奮鬥。

 

到位於擺花街的 Kanalili,白色的喱士牆紙、水晶掛燈、各式雕塑,配上清雅的服裝,尤如進入了童話世界,這些裝潢均來自 Kanalili的老闆兼服裝設計師 Lilian的構思,在這裏可以買到由她親手設計的婚紗、上班服及晚裝等。「想客人嚟到可以揀出席舞會或者重要場合嘅衫,將自己打扮到成個公主咁。」
Lilian喜愛以大自然為靈感來源,「試過將天空一日嘅變化設計成一個系列,好似藍天白雲、黃昏、行雷及晚上月色等;同時我都好鍾意花,會將花嘅元素加入到作品入面,好似刺繡、數碼印花或者成件衫嘅型態等。」 Lilian設計着重清雅浪漫,物料則愛用雪紡和真絲,如採訪當日,店內放了一條婚紗,以蘸了墨水的玫瑰花為設計主題,很有特色。
相信不少人對小學作文堂寫的「我的志願」絕不陌生,但是又有多少真的在長大後成功做到? Lilian說:「細個好鍾意幫 Barbie整衫仔,而且對畫畫好有興趣,當知道有時裝設計師呢個職位時,就已經成為咗小學作文時嘅『我的志願』,到中學開始準備自己嘅 portfolio,好似儲起畫過嘅時裝圖、親手縫紉嘅公仔衫等,希望到報讀大學面試時會有用。」


Floral print真絲雪紡長裙$8,800 

意大利蕾絲連身裙$3,800 

粉紅玫瑰斗篷$2,200

白色羽毛 cocktail dress$13,000 

漸變珠片真絲婚紗$28,000 

粉紅色玫瑰漸變婚紗$33,000 

薛凱琪也穿過 Lilian設計的服裝出席活動,更大讚漂亮。 

做𡃁模擴人脈


Kanalili的一角是 Lilian的工作室,一有靈感就可以畫出設計圖,同時亦方便與客人溝通。 Kanalili 電話: 2778 7368(需預約) 

具有標致𡃁模外形的 Lilian,看上去像柔弱小女生,但細談之下發現她是很有主見的女性,「屋企人唔贊成我做設計師,佢哋想我讀商科,但我好清楚自己嘅理想係乜嘢,當時瞞住佢哋去報讀理工嘅時裝設計,專攻晚裝及婚紗,之後用行動證明畀屋企人睇自己唔係玩玩吓,最後畀我拎到 scholarship,佢哋先冇再反對。」
最讓 Lilian印象深刻的是參加 Hong Kong Young Fashion Designers' Contest 2010,那次亦是她第一次親手縫紉出自己的衣服,「嗰次係第一次落手落腳整套衫出嚟畀人着,總共有 2百幾位參賽者,雖然最後我冇拎到獎,但被揀選成為 17位可以喺天橋行 show嘅服裝之一,嗰刻真係覺得好開心。」

成首席設計師

大學畢業後, Lilian繼續修讀碩士,之後更憑實力應徵成為一間本地品牌的首席設計師,專門設計晚裝及婚紗,連薛凱琪也穿過她的作品,「喺學校主要學思考方法,同埋點將腦中嘅意念變做實質嘅設計;但工作上畀我學到更多嘅嘢,好似實際用家未必會係 model身形,要諗吓唔同身形嘅人着住件衫都會好睇。」
可能有人覺得 Lilian十分眼熟,曾在不同雜誌見過她,因她另一身份是兼職 model,但原來這是為走上時裝設計師之路作準備,「我本身好文靜,鍾意一個人睇書,但做設計師同人交流係不可缺少。喺讀完 degree後有人搵我做 model,當時覺得可以訓練到自己嘅溝通技巧,同時想擴闊自己嘅社交圈子,認識雜誌記者、化妝師及攝影師等,對將來嘅事業會有幫助。」


參加 Hong Kong Young Fashion Designers' Contest 2012時, Lilian也被揀選為 17位可行 show的作品之一,圖為她當年的作品。 

絲絨地氈、水晶燈、喱士牆紙,踏入店內猶如進入一個女性的大衣櫃般。 

創業自由度大

25歲的 Lilian已設計過上百件服裝,也舉辦過個人時裝展,在今年 2月, Lilian辭去了工作,出去闖一闖,建立自己的品牌,在今年 9月開設了自己的時裝店 Kanalili,「雖然之前叫首席設計師,但始終工作上會有掣肘,好似件衫買邊款布、用咩牌子嘅絲帶,都要同老闆解釋。想搵一個更大自由度嘅空間畀自己發揮,產生咗創業嘅念頭。」
Kanalili有婚紗、晚裝和便服出售外, Lilian還表示可以為客人設計專屬的款式,「我哋會定期推出新款,客人睇啱款式後,可以為佢度身訂造一件,或者可以預約上嚟傾,因應客人嘅喜好,設計出專屬於佢嘅款式,可以話每件衫都係個人專屬,好啱驚同人撞衫嘅人。」

設計師魔術師

對於現在忙碌的工作, Lilian表示很滿足,「喺我眼中嘅時裝設計師,好似魔術師畀到客人驚喜,令客人着咗自己嘅作品之後有自信,試過有客買咗衫之後, send番 message話多謝我整咗咁靚嘅衫畀佢,真係好有滿足感。」
對於將來發展, Lilian希望以女生的一生作為設計藍圖,「想設計埋童裝、內衣、鞋及飾物等,女仔一生會接觸到嘅衫褲鞋襪,我都想做,令客人上到嚟好似入到屋企嘅衣櫃咁,由頭到腳都可以用到我嘅品牌,充滿自信咁行出去。」

Wing客人

朋友推介我嚟 Kanalili,一睇到啲裙就好鍾意,好有夢幻嘅感覺。

點入行?

想成為時裝設計師, Lilian認為要有一定的時裝觸覺,擁有相關的學位是最好的方法,「除讀書外,我都會搵啲關於時裝設計嘅實習,其實呢行有自己嘅作品比較重要,做多啲實習係唔錯嘅入行方法。」另外, Lilian覺得成為時裝設計師必須要有熱誠和堅持,「好多人見到時裝設計師着到好靚出席時裝 show、去拎獎,其實背後付出好多,設計一件衫要尋找靈感、搵布料,箇中困難唔係個個都知。」

服裝及紡織(榮譽)文學士學位組合課程

學校︰理工大學
年期︰ 4年全日制
學費︰$42,100( 1年)
內容︰時裝設計、縫紉工序、紙樣設計、市場及統計學等。
查詢︰ http://www.itc.polyu.edu.hk/asiia 

晉升階梯

高級設計師  4年經驗或以上約$15,000至$20,000

設計師  2年經驗或以上$13,000-$15,000

助理設計師  1年或以上經驗$9,000-$11,000

見習生 毋須經驗約$8,000起

後記:好多女 fans?

訪問期間,記者問 Lilian如何宣傳自己的品牌,她說透過網上宣傳,例如開 facebook專頁;之後記者又問她 facebook有多少 fans,她表示:「我自己嗰個有 3萬,公司嗰個有 3千。」記者聽後表示,多宅男 fans有用嗎?她即激動地說:「我都有好多女仔 fans㗎!」記者覺得男 fans多其實沒有問題,他們可能會向女性朋友推介自己女神所設計的時裝呢?


撰文:曾志恒
攝影:黃家活
部分圖片由被訪者提供

全站熱搜

tvb4life 發表在 痞客邦 留言(0) 人氣()