專題 Log In

跟蹤!變形金剛 4:毀滅紀元 襲港 戰車 大起底

2013年 10月 26日,凌晨 4點,晴。
《變形金剛 4:毀滅紀元》( Transformers 4 Age of Extinction)最後一日喺香港取景拍攝,全體人員齊集昂船洲大橋海上交通控制站準備出發。
經過連日收陀地費、炸政府總部,今日嘅傳媒同圍觀人士更加爆炸!可惜等足幾個禮拜,各港聞、娛樂版只係集中講拍戲有幾勁,從未提及車款詳情。今日,《 Auto Express》終於要出手,全程跟蹤《變形金剛 4》拍攝過程,同大家起齊今集 10部新戰車底細!

 

一向玩大美國主義嘅《變形金剛》,戰車差唔多九成九係將近執笠嘅美國車廠出品,好多香港車迷睇完都唔知係乜車!就算今集嚟到香港拍, 10部新車款中有 6部蒲頭,喺大家面前飛來飛去,仍然連名都噏唔出!為免各方潮人抽水喪吹時講兩句就口啞啞,一於為大家逐部起底,連實際拍攝時嘅表現都直擊埋你睇!

改款黃蜂  Chevrolet Camaro Concept

雖然《變形金剛》主角係 Optimus Prime(柯柏文),但最受歡迎嘅從來都係 Bumblebee(大黃蜂),所以就算今次柯柏文冇嚟香港,但有大黃蜂撐場,大家仍然可以一眼認出拍緊《變形金剛》。不過可能因為太多冇性格大陸佬跟風勁玩,今集大黃蜂就有錢都冇得跟買,由用咗 3集嘅 06年第 5代 Camaro首次轉款為未上市、更科幻嘅 2014 Chevrolet Camaro Concept概念車,扁撻撻嘅 LED頭燈連鬼面罩,同連成一體嘅 LED尾燈有型得多,頭冚兩排流線入風口同拋得更誇嘅尾沙板亦更加惡,最勁係車展都未擺就整畀《變形金剛》用!
不過,正因為車廠都未正式公布 Camaro Concept,所以詳細規則不詳。但睇佢個樣似足最新 2014 facelift版 Camaro頂級 Z28型號,機器都唔變得去邊,用到 500匹 7.0公升 V8引擎,扭力更加去到 65kgm!配合新款大包圍同輕量化 45kg,抓地力由 1g提高到 1.05g,圈速快舊款成 4秒,足以令舊版食塵!


大黃蜂 Bumblebee 


可能大黃蜂概念車冇幾多部士啤,所以盡量少行車,經常都要拖。

500匹 7.0公升 V8巨肺引擎, 11:1高壓縮比,紅區達 7,000rpm,但得 65kgm效率都係低德國車成截! 

對比科幻味十足嘅外觀,車廂只係用 6速手波同銀色裝飾,明顯 low-tech得多。 

半桶形座都用到 Recaro出品,並唔係常見款式,頭枕位仲有 Z28 logo。

2014 Chevrolet Camaro Z28 Spec.

引擎: 7,011c.c. V8
馬力: 500ps/6,800rpm
扭力: 65kgm/4,800rpm
傳動: 6前速手動
車身: 4,884× 1,953× 1,331( mm)
車價:約$503,750起(未完稅)

焦點戰神  Chevrolet C7 Corvette Stingray

今次嚟香港最搶同最噏唔出名嘅新車,就係呢部 Chevrolet C7 Corvette Stingray。喺戲中佢係重點新角色 Crosshairs(散髮),差不多每次出車都排頭位, Bumblebee都要跟佢尾行!佢唔只係神槍手,仲係武器專家,識得維修大部分武器,好明顯係新一集力捧主角之一。
現實中, Corvette亦都真係勁過細成個碼嘅美國飛仔車 Camaro多多聲,當 Camaro只係鬥美國 Trans-Am賽事,被稱為美國戰神嘅 Corvette已經鬥到 FIA GT國際大賽同拉利、波子火併,仲要連贏多年!而今次呢部更加係今年先啱啱大轉款嘅最新第 7代 Corvette嘅 Stingray頂級輕量版,全車用鋁合金打造,車重只有 1,500kg,前後配重 50: 50。不過啱啱轉款型號唔多,暫時只係用 6.2公升 V8 NA偈,但輸出都有 450匹馬力同 62kgm扭力, 0-100km/h只係 4.2秒,極速仲可以爆到上 306km/h!


散髮 Crosshairs 

成部車跑味超勁,等拍攝期間,直情有路人泊埋一邊行過嚟睇嘢。 

450匹馬力同 62.2kgm扭力係勁,但用到 6.2公升 V8偈先有咁嘅實力,其實算 low-tech。

Corvette喺 1953年出第 1代, 1966年先出嘅細碼 Camaro一直都係低級跑車,所以 Corvette車廂高級好多。 

用料相當高級,張凳嘅形狀仲好似拉利 458 Italia。 

全新第 7代 Corvette地位已經去到 Porsche 911同 Audi R8嘅級數,四出尾喉更加嚇鬼到爆!

2014 Chevrolet C7 Corvette Stingray Spec.

引擎: 6,162c.c. V8
馬力: 450bhp/6,000rpm
扭力: 62.2kgm/4,600rpm
傳動: 6前速自動
車身: 4,836× 1,918× 1,377( mm)
車價:約$400,000起(未完稅)

重型軍佬  Defense Medium Tactical Vehicle

前幾集博派嘅重型軍車同 SUV都已經死晒,今集就由 Hound(橫砲)接棒,屬《變形金剛》元老級角色,早喺 1984年就曾以 4× 4軍用吉普車出現喺第一部漫畫中,不過當時係眾多車中最細部。但今時唔同往日,喺電影中負責火力輸出,點都要有番咁上下霸氣先掂,第一次亮相喺電影版,就變成用美國專做軍車嘅 Oshkosh車廠嘅 Defense Medium Tactical Vehicle( FMTV)中型軍用裝甲車,配有導彈發射器、輕機槍同重機槍。
而實際上呢部 6× 6嘅裝甲車最大載貨量達到 4.5噸,而且為咗增強性能,據了解係用一種名為 JP-9嘅軍用飛機油,馬力可以去到 340匹。究竟部車有幾快,筆者唔知,但去影相時曾經以龜速 50km/h同呢部車並排而行,估唔到部車靜過大貨車多多聲,而且成部車掟彎好穩,唔會傾晒一邊。


橫砲 Hound 

唔係講笑,筆者揸車喺側邊影相, 2,830mm高嘅巨無霸身形壓力仲勁過巴士。 

架車咁污糟唔好以為行過咩爛泥沼澤,其實係特登整上去,咁先襯到重裝軍佬嘅味道。

原裝車並冇探射燈,純綷係為劇情需要而加裝。 

嚟港 6部變形金剛,得呢部先印有博派嘅標誌。 

睇部軍車加速都唔算慢,行順咗真係要用 ML55拍攝車先跟得貼佢!

Oshkosh Defense Medium Tactical Vehicle Spec.

引擎: 7,193c.c.直六
馬力: 330hp/2,000rpm
扭力: 196.9kgm/2,400rpm
傳動: 7前速自動
車身: 7,272× 2,438× 2,830( mm)
車價:約$1,240,000起(未完稅)

拖頭二號  Freightliner Argosy

今集新登場角色中令人最𢱑頭嘅係呢部 Freightliner Argosy重型拖頭,因為到現時為止都未知佢係咩角色?雖然博派除咗柯柏文外,都仲有副手 Ultra Magnus(通天曉)呢個角色係拖頭,但睇佢銀色加鋼琴黑科幻外形,而且拍攝時出親場都唔係同博派啲車一齊,仲有幾部陀地「臨記」林寶同 McLaren跟尾,反而似係狂派嘅 Nemesis Prime(天罰邪尊)或者 Motormaster(車主),前者係黑暗版柯柏文;後者係狂派大佬麥加登旗下猛將,分分鐘有機會係今集嘅終極 Boss!
雖然唔知佢做咩角色,但生產呢部車嘅 Freightliner公司就大有來頭,同 M-Benz一樣係 Daimler AG集團旗下,早喺 1942年就以造重型貨車同拖頭為主, Argosy系列於 2000年推出,但 2006年因為銷量唔理想,所以退出咗北美市場,淨係得番澳洲、新西蘭同南非有。至於呢部 2014款嘅 Argosy就係重返北美市場嘅力作,目前仍然停留喺概念車階段,同樣喺商用車展都未出現過,大有可能係為《變形金剛》度身設計。不過以現行 Argosy頂級版嚟講,佢絕對係豪爆嘅超重型拖頭,用 500匹 15公升 V6引擎,可以拖 6.5噸貨穿州過省。


車主 Motormaster 

科幻拖頭出場時甚少拍埋主角跑車旁邊,反而有陀地「臨記」超跑跟尾。 

雖然外表型到爆,但車廂就睇得出真係一部長途拖頭車,有唔少杯架同雜物櫃可以擺嘢。 

兩張座椅嘅後方仲有一個床位可以瞓覺。 

Freightliner Argosy Spec.

引擎: 15,000c.c. V6
馬力: 500ps/1,700- 1,800rpm
扭力: 228.2kgm/1,100rpm
傳動: 8前速自動
車身: 6,807× 2,590× 4,144( mm)
車價:約$1,070,000起(未完稅)

缺席變形車款

十分可惜,《變形金剛 4》嘅戰車今次並唔係全員嚟晒香港, 10部車只有 6部嚟咗,仲有以下 4款車未曾見到蹤影。

新款貨櫃  Western Star 4900 Custom

車價:約$1,030,000起(未完稅)
前 3集柯柏文都係忠於漫畫原著用 1988年已開始推出嘅 classic拖頭 Peterbilt 379,不過可能上集尾打到爛晒,今集就終於改用新款同美國 big hit嘅多用途拖頭 Western Star 4900。雖然車頭同樣都係凸出個大豬嘴,但體形比較細,不過性能就堅得多,最勁用到 600匹 15公升柴油偈,主要係拎嚟做伐木、搬石等基建用途。


柯柏文 Optimus Prime 

玩埋元祖  1967 Chevrolet Camaro SS

易手價:約$250,000起(未完稅)
今集大黃蜂仲玩埋穿越時空,返到 60年代,變 1967年元祖第 1代 Chevrolet Camaro SS,隱藏式頭燈同鬼面罩一體化,拋沙板仲更巨型, Muscle Car飛仔車 feel濃到爆,仲要機械人外形都跟住變!而且當年已經用到 380匹 6.5公升 V8引擎,紅到可以同第 1代 Ford Mustang打對台。今日部車已經變成經典古董,易手價賣到 3萬 2蚊美金。


大黃蜂 Bumblebee 

大牛警車  Lamborghini Aventador LP 700-4

車價:$6,312,000起(已完稅)
第 1集有 Mustang狂派警車搶鏡,今集到博派有警車出場,但票房勁當然會升級,用到杜拜先買得起嚟做警車嘅林寶大牛 Aventador LP 700-4,去扮演叫 Prowl嘅博派芝加哥警車,有成 700匹馬力, 0-100km/h拍得住部 Bugatti Veyron Grand Sport Vitesse,只需 2.9秒,用嚟追賊話都冇咁易啦!


潛行獸 Prowl 

拉力車仔  Chevrolet Sonic RS rally

車價:約$163,000起(未完稅)
喺上年底待律車展發布嘅 Chevrolet Sonic RS係不折不扣嘅小鋼炮,用 1.4公升 Ecotec渦輪增壓引擎,已經有 138匹馬力。而且喺《變形金剛》亮相嘅更會係 Rally版本,有型大包圍同大尾翼,造型更加誇張。不過,暫時就未知到會變身成邊個機械人,但平車出場,應該命都唔長……

風神超跑  Pagani Huayra

嚟到全球最多 supercar嘅城市香港拍攝,冇番啲震撼超跑點掂?上集淨係得一部拉法 458超跑,今集就加到有成 3部。其中戰鬥力最堅一定係 Pagani,不過見到大家一樣噏唔出佢叫咩名,因為呢部讀音「哇𠵱嘩」嘅 Huayra係最新出品,'11先喺香港搞 launch,身價連稅估計超過 2,000萬,當時一推出香港就已經接咗 8張訂單,但絕少喺街見到,所以筆者喺昂船洲大橋追車影相時,就親眼見唔少車特登 cut線想行前啲去影相,就算有拍攝車 block路都照去!咁又難怪嘅, Huayra嘅 6.0公升 AMG雙 turbo引擎有成 720匹馬力同 102kgm扭力,由 0-100km/h加速 3秒搞掂,而且喉聲真係好有魅力,低轉踩油啲炮聲勁到喺橋底都有 echo!
今集 Pagani Huayra將有機會扮演 Hotshot(熱破)或 Rodimus Prime(洛迪文),前者喺片中係個性勇敢及熱血嘅年輕機械人;但相信會係後者多啲,因為受到母體影響而升級成為 Rodimus Prime,更係博派嘅第二代領袖,亦都符合 Huayra嘅身份。


洛迪文 Rodimus Prime 

由於實在太多助手車 block路,筆者惟有喺橋底等佢哋現身,一聽到「轟隆」聲就知道嚟緊。 

唔只外形靚到絕,車廂都一樣豪華到極。

Pagani Huayra Spec.

引擎: 5,980c.c. V12
馬力: 720ps/5,800rpm
扭力: 102kgm/2,250-4,500 rpm
傳動: 7前速自動
車身: 4,605× 2,036× 1,169( mm)
車價:超過$20,000,000
查詢: SPS( 3743 8300)

千匹新獸  Bugatti Veyron Grand Sport Vitesse

隨住套戲愈來愈 hit、愈拍愈多錢,今集《變形金剛》就玩到最貴嘅 Bugatti,仲要係舊年日內瓦車展先第 1次展出嘅全新款 Veyron Grand Sport Vitesse強化版,用到 8.0公升 W16渦輪增壓引擎,馬力由舊款嘅 1,000匹爆到上更癲嘅 1,200匹,扭力喪到有成 122kgm, 0-100km/h加速 2.5秒, 0-200km/h加速 7.3秒!而且為咗應付呢隻大食怪,仲額外加裝咗 100公升大油箱,但就算係咁,如果以極速 410km/h狀態計,箱油只係足夠行 12分鐘!
雖然部車係勁到冇人有,但扮演嘅 Drift(漂流者)係一個改邪歸正嘅角色,喺漫畫中係用 Nissan Silvia S15變身而成,同 Veyron Grand Sport Vitesse嘅形像完全唔襯,且看導演點去演繹吧!


漂流者 Drift 

全球最貴嘅車真係唔同啲,就算泊喺個爛地車場都一樣特別 smart過人。 

每次部 Veyron Grand Sport Vitesse一拍完戲分,就會「逢」一聲消失咗!

Bugatti Veyron Grand Sport Vitesse Spec.

引擎: 7,993c.c. W16
馬力: 1,200ps/6,400rpm
扭力: 153kgm/3,000-5,000rpm
傳動: 7前速自動
車身: 4,462× 1,998× 1,190( mm)
車價:約$17,000,000起(未完稅)
查詢: Bugatti HK( 3698 9718)

過場車有料到

雖然班主角車係眾人焦點,但今次全程跟蹤得《變形金剛》拍攝,當然要起埋其他車底!好似跟車拍攝嘅都用到第 1代 M-Benz ML55,夠速度跟 supercar之餘,避震亦可以校到好軟,筆者現場所見佢即使 60km/h行過爛路時都冇點扽,令車頂裝嘅巨型吊臂 camera可以平穩咁行車拍攝。
此外,原來電影公司嚟到香港都要請「臨記」車,喺昂船洲大橋度拍攝飛車場面時,除咗 Bugatti同 Pangani兩部超跑外,仲搵咗 2部林寶 Gallardo、 McLaren MP4-12C同 Aston Martin DBS私片,後車仲有 Toyota Mark-X、 Infiniti M37同 Audi A3 Sportback等 8部車左穿右插,將途經車輛擋走晒 block路,咁嘅場面真係百年難見㗎!

千萬陪跑

「老臨」車掛晒香港車牌,由 388萬林寶 LP570-4 Superleggera、 460萬 McLaren MP4-12C到 430萬 Aston Martin DBS都有,平時出街就係焦點,但今次只係充當背景!

Cam車用 Benz

睇戲啲車激飛,但現場所見其實行高速公路都只係約 60km/h,不過拍攝車都係 2000年推出嘅 M-Benz ML55 AMG,用 347匹 5.5公升 V8偈,玩埋啞黑色車身,隨時爬頭、行爛路拍嘢都冇難度!

經典逃亡

呢部 1980年 Toyota Land Cruiser 60 series老爺車,易手價只值 2萬蚊港紙,係主角麥克華堡逃亡用,車門大大個「福」同「旺保水喉」中文字,車尾仲有埋查詢電話,港產陀地味超濃!


撰文:余頌達

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()