溫室有機烤菇$23(價錢按大小而定)本地大啡菇肉厚多汁,釀入番茄蔬菜醬和火腿煙肉,芝士鋪面再火炙至微燶融化,香濃芝士味和番茄酸甜味平衡。 

庶民飯堂

街邊串燒 燒入鋪 M Station 1 地址:元朗鳳攸南街 9號好順利大廈 16號地鋪 電話: 5577 8631

六、七十年代,唔少人做小販擺街檔賣熟食,儲夠錢立即入鋪。你點會估到有人好哋哋有公司高層唔做,反而辭職去做小販? M Station 1老闆林生就係呢位勇士,因為極愛烹飪,成日創作不同菜式在家宴客,朋友大讚,叫佢開鋪,於是佢真係辭職,但佢老婆應該想喊:「我嗰時啱啱有咗 BB,不過我無阻止佢,我信佢會成功。」老闆娘 Tim Tim信任老公,因為有成功事例為證,「佢以前喺鴨寮街擺檔賣解碼器,之後搞二手手袋鋪,到轉行做珠寶,由低做起幾年間升到做管理層,佢每次都一定堅持至成功為止。」於是 TimTim大住個肚同老公一齊喺元朗擺街邊,邊儲人氣,捱咗三年,儲夠錢開鋪。

 

餐廳名「 M」字指 Mushroom,主打燒蘑菇其餘仲有燒羊架、蒜茸包、雞翼、星星 pizza批,種類不算太多,因為想專心做好呢幾款菜式。新鮮大啡菇放雪櫃只可保存兩日,不能只靠單一貨源,「我哋擺街檔時,已經向本地農莊同馬來西亞入貨,全部都係有機,同埋要夠大隻去釀材料。招牌菜番茄蔬菜醬由我老公自創,用新鮮番茄,加六、七款香草同蔬菜,熬足一晚,個個都讚好食。」 TimTim又露出仰慕之情大讚老公。以前擺街檔只做消夜時段,而家入鋪就由朝做到晚,不過 Tim Tim話無有怕,辛苦啲薄利多銷,最緊要同老公拍住上。


煙肉、芝士釀入蘑菇後,用火槍燒至微焦,味道截然不同。 

自選蘑菇大小,平均$15-$30。 

深海八爪魚冷盤$2.2/10克八爪魚爽口鮮味,蘸秘製芥末醬、豉油、甜醬令味道更豐富。 

王牌秘製烤羊架$17/件(價錢按大小而定)、脆蒜茸包(後)$10/3件選用蒙古羊仔肉,加意大利雜香草、薄荷葉醃製,燒時用自製「鬆粉」去羶味,口感嫩滑。蒜茸包即點即燒烘,鬆化香脆。 

M Station 1

地址:元朗鳳攸南街 9號好順利大廈 16號地鋪
電話: 5577 8631
營業時間: 12nn-2am




撰文:吳韻菁
攝影:譚俊軒

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()