只要將接收器接好電池位旁邊嘅金屬點(紅圈)就用得,安裝都幾簡單。 

ILIKE

Free充手機

無線充電早幾年做採訪已經見識過,一直都覺得大有可為,試諗吓一入屋就自動幫你身上嘅電子產品充電,你話幾方便!講番現實,現階段都仲要放喺指定嘅充電座上面先充到電。最近連 SanDisk都加入戰團,推出 MobileMate手機無線充電套裝(充電座:$499、接收器:$299),主要針對可拆殼手機,將接收器接番去電池附近嘅充電金屬點,啪番機底殼放喺底座上面就充到電。充電速度雖然唔算快,但係都幾穩定。最重要係支援型號,睇落都幾多……咪住!點解冇 GALAXY Note 3同 HTC Butterfly s嘅?

 


@勞耀全 

 

自動過相

之前用過 Toshiba張無線 SD卡,落水影完相可以唔使開相機潛水殼,直接用手機無線抄相,已經覺得好方便。不過,上個禮拜用完 Eye-Fi張新卡就仲爽,唔單只傳輸速度快,安裝完專用 app同相機配對之後,系統就會自動將新影嘅相同片備份落手機,唔使逐張揀,超級方便。而家就算要 update新 news上《壹週刊》 app,就可以照舊用相機影相拍片,再喺手機 edit完先上載,連 notebook都唔使帶喇。


配對過一次,以後只要開着相機,同埋手機嘅 Wi-Fi功能, Eye-Fi卡( 16GB、$630)就會自動 backup啲相入手機。 

@周群雄 

終於整到機

早一個月前喺屋企摷番部舊 iPad 4出嚟,諗住賣機買新 iPad Air,點知 headphone插口位俾粒香珠塞住,挑唔到出嚟。第一時間上網 book Genius bar修理,但日日都冇位,等足成個禮拜都 book唔到。上網睇討論區,原來有人搶晒啲預約時間,再放上網賣,認真無良。
最終諗住直接去 Apple Store排隊整機,點知 Apple突然改制,同買 iPhone 5s一樣,要先 send SMS去指定電話號碼度拎 code(輸入「 Genius」後 send去 6450 0333),再用呢條 code預約 Genius Bar。由零成本變成要俾 SMS錢訂位,搞一大輪都冇肉食,即時擊退霸位黨,三間 Apple Store都有大把 time slot預約,今勻真係要俾番個 Like啦。


雖然發短訊拎 code要俾 SMS費用,但可以杜絕霸位黨,點都值得。 

@林勇 

陪我執屋

終於搬咗去新屋,算係發完第一章噩夢。噩夢第二章,係 unzip所有紙箱,每個紙箱都好似放咗比紙箱容量多幾倍嘅嘢,一𠝹開啲箱,裡面啲嘢就排山倒海咁湧出嚟,好得人驚。不過驚還驚,一樣要執。開電視邊睇邊執? No way,未駁線;寬頻?師傅好忙,要過多幾日。唯一娛樂係用 iPhone聽 CR2、 iTunes Radio,或者播 iPhone裡面自己揀嘅歌。前兩者要計數據量,最後者就免費。點都好,要講要讚嘅其實係啲音質, CD級數,冇投訴。


iPhone 5c連住陳年 JBL電腦小喇叭,聽住商台執屋,唔太慘啫。 

@劉定邦 

text:科技組

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()