吳宗權(左)大晒人魚線,吳光正(右)亦不遑多讓,馬上挺胸收腹,二人猶如港男上身,任影唔嬲。 

中環人語

吳光正父子晒 44吋胸

上週日公益金唔搞百萬行,轉搞百萬泳,首次以渡海泳比賽形式籌款,並喺淺水灣泳灘舉行。幫手籌劃活動嘅會德豐( 20)吳光正父子,當然瞓身支持。但當日焦點,並非二人的泳姿或比賽成績,而係佢哋一身嘅爆肌泳裝!

 


當日同場仲有一身黑嘅東亞銀行副行政總裁李民橋(箭嘴示)。聽講件游水衣可跣水,會游得快啲。究竟一馬當先撲落水嘅佢,係咪都游第一呢?請翻看後頁。(于港民攝) 

本來吳光正兒子吳宗權,仲著住平民 look上台致辭;轉個頭,就換上藍色迷彩泳褲仔,大晒朱古力肌兼人魚線,小宗估計他最少有四十四吋爆肌。而六十有七的吳光正亦不遑多讓,盡 show健碩身形,咁嘅年紀都有「倒三角」肌,算係咁。父子二人著住泳裝周圍搵人傾偈,如選港男般任影唔嬲,更引來沙灘上眾人的艷羨目光,成為全場焦點。反而,無人理佢哋比賽成點噃!
當日吳宗權游足三個賽事,兩代接力賽仲搵埋父親吳光正落場,阿仔先游八百米,老豆接棒再游四百米,結果奪亞。其實吳氏父子向來愛好運動,吳宗權為游泳健將,曾為香港水球隊出戰○六年多哈亞運,也曾落海勇救老婦;吳光正則為跑步健將兼滑雪好手。自此中環多了兩個偶像!

Give me a break 自製「 app中之 app」


曾在港大教書的 Andrew,嫌悶決定瞓身創業搞 apps。(陳浩樂攝) 

喺呢個智能手機興起嘅年代,一件 product可以無網站,但絕對唔可以無 app!搵 IT公司整 app,閒閒哋都要幾萬蚊,不過小宗發現一間叫「 Apps King」嘅公司,推出嘅「套餐」,最平只係收九百九十九元!
創辦人賴翰笙( Andrew)話,佢哋揼咗一個容量好大嘅 app,再「俾位」客人在其中揼佢哋嘅「 app中之 app」,讓中小企可以一個「賣大包」嘅價錢,宣傳自己嘅公司同產品。「除咗平,仲可以俾客人 D.I.Y.去設計個 app,我哋提供個平台,好方便咁入資料,最快三十分鐘已經整到一個 app出嚟。」
Andrew騷咗其中一個客嘅 app俾小宗睇,呢個客做食肆, app以木紋色為主題。小宗特登去吓間餐廳,發現間鋪都係以木紋為特色裝修。餐廳老闆 Danny話,個 app除咗夠平,仲可以親自落手落腳整,「試過搵人整網站,要俾成三萬,仲要 hea整,但呢個 app係自己入資料、設計同放相,可以表達自己嘅風格。」但要注意嘅係,九百九十九元收費只係用一年,而且只限一個平台,如果想放喺 Apple同 Android嘅平台,係要收兩份錢嘅!

李民橋老抽

上文提要,東亞銀行副行政總裁李民橋,都有參加「百萬泳」。賽前他還戴着太陽眼鏡,悠閒地坐在臨時搭建的帳篷內休息準備迎戰。他對小宗說:「我平時唔多游水,都游得唔叻,今次為公益金籌款,志在參與。」
賽前他換上一身黑色戰衣,身形瘦削,樣子充滿信心。但最騎呢係條踩踭褲,小宗心諗:「踩住腳踭點游水呢!」結果,真係出事了!落水游唔夠一百米,已經求救要坐救生艇回岸;「坐艇」喎,好棹忌!救生員即時在岸邊為他急救拉筋,見佢痛得面容扭曲,抽筋級數應該達十級!事後記者問佢,佢話無做熱身累事。唔,定係前晚蒲天光哩?


李民橋由成隊救生隊「擁護」上岸,但被成班記者影晒相,搞到佢相當尷尬。 

行上岸幾步,李民橋已經痛到揦住塊面,仲即刻瞓低,要醫護人員幫佢拉筋鬆鬆。(于港民攝) 

香港電視變國策股


插圖︰祝健中 

王維基間香港電視( 1137),識得「轉型」。前身城市電訊,當然係電訊股,去年出售寬頻業務又改名,自不然係傳媒股。今日隻股嘅生死存亡,同發唔發牌掛鈎,又變咗國策股。股價因此發上發落,政策完全係牽一髮、動全身。
已經波動咗兩星期,上週五,多得《南華早報》引述羅范椒芬指行會可能再討論發牌,股價即升三成一。後來飯焦發聲明澄清,本週一港視倒跌近一成。魔童曾話要司法覆核,同日公司又突然發聲明,指考慮無須司法覆核,本週二又跌百分之二。
日日都有股價敏感消息,咁使唔使停牌呢?港交所回應話,「異動」按個別股份表現而定,現時處理異常波動,主要靠上市公司發公告解釋,嚴重至有內幕消息,影響公平交易才考慮停牌。咁都唔嚴重?港交所唔好只顧馬雲,都要照顧坐艇散戶嘅感受喎!

本週食詐胡

有得睇王維基嘅HKTV喇——不過要去海南島嘅海口市囉!

金牙大狀講嘢 百花齊放有手尾


叮走王維基引發「百花齊放」,手尾長也。大家放長雙眼啦! 

電視發牌三揀二,叮走王維基,引發數以萬人上街。眾怒難犯,話就話集體負責,行會中人固然紛紛走出嚟各自表述,即使負責呢一瓣之蘇局長亦走出台前谷眼淚撈同情分。呢個亂晒大龍嘅情況,甚於當日祖國大地之「百花齊放」也。
資深中環觀察家記性特強,對「百花齊放」記憶猶新。佢話事發之初,大家無疑享有高度言論自由,但大家記唔記得跟手發生咗乜嘢事吖?引蛇出洞之後,阿爺當然係秋後算賬啦!故此大家莫以為嘈完一輪之後,就雨過天青。邊會咁好世界吖。
跟手會有乜事發生?資深觀察家話家吓再唔興人頭落地,但冇番一兩個人出局丟官咁又何以立威呢?呢單嘢未解決㗎,各位!

中環人語迷你版

“李嘉誠是我偶像。”

估中邊個中環人講呢句說話,送你 JWATCH J-33   藍寶石鏡面限定版手錶一隻有意參加者,請於十月三十日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉答案

“你真係唔好激嬲我囉!”

王維基
得獎者: Wong Kam Wah
中獎時間: 1:00pm 23/10/13

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()