魔童對亞視心大心細

發牌風波發酵至今仍未有靜止迹象,不過睇熱鬧的人都覺得,港視總舵主王維基在跟政府對簿公堂之餘,都要諗諗班港視員工仲有乜嘢出路。

據熟識王維基一方嘅人講,其實魔童一直唔想被人擺上枱做抗爭英雄,所以連日來他都沒有現身集會,如果不是上周特首梁振英出來講咁多,佢唔會踩行油開記招回應。細心留意佢呢幾日嘅言論,佢只將火頭鎖定喺政府「小撮人」身上,將打擊面集中。佢上星期喺中大講座都公開講,唔覺阿爺喺發牌上有干預,仲寸香港人自大,以為阿爺乜都管。

 

王維基即使真的想買亞視,主要投資者王征(上圖)亦未必咁順攤讓個牌出來。(張恩偉攝)

行會決定咗發牌三揀二,不設上訴機制,要政府目前再發牌似係無乜可能,呢點王維基都心知肚明。不過佢市場策略太成功,搞到好多人都對佢有期望,魔童亦不甘心唔搞落去。有人話佢會搞網台,但只要諗諗佢個台年燒五、六億,但目前計晒所有網上媒體廣告,一年加埋七億都無,就知道唔容易維皮。有人順理成章諗起七國咁亂嘅亞視,話魔童可買起亞視取而代之。

據悉,王維基一方的確同亞視有關人等摸過底,有人開出十億天價,王維基一方嫌貴,至無再傾落去。十億係咪天價真係見仁見智;亞視一沉不起,股東間又有股權糾紛,王維基買番來都仲要花錢執過晒,係咪咁易起死回生亦好難講。不過,亞視王征同佢親戚兼大股東王炳均喺亞視又點止揼咗十億?咁樣賣走本都收唔番,雙方蹉跎一輪無晒下文。不過,就算畀魔童買到亞視,好快到二○一五年亞視面臨續牌,政府分分鐘唔批,到時王維基又係兩頭不到岸。

發牌風波擾攘多時,港視員工亦是時候思考出路問題。

可靠消息透露,一五年十一月牌照檢討時,亞視已無機會續牌,王維基等多兩年,就可以買起亞視做免費電視大亨,扭轉敗局。不過,到時候政府需要公開招標,又不知引來多少競爭者。

無論o依家買亞視,或者等亞視失牌後再申請,中間還有不少考量,魔童亦因此心大心細,擔心變數太多,但他又怕博弈下去政治代價更大,畢竟佢自稱純潔商人,唔想走入抗爭死路。

王維基一直避免做抗爭英雄,港視員工亦很清醒,政府總部一連五晚嘅集會,佢哋都婉拒政黨介入。泛民以為執到支好籌,可以借勢狂砌政府,不過攞唔到彩。

上周二,幾百個港視員工再趁行會開會去特首辦請願,莫乃光、長毛、慢必同公民黨陳家洛當時都到場聲援,陳家洛諗住同班員工打招呼,但成班員工有意無意擰轉身背對住佢;長毛嘗試行近,員工索性拉起「人鏈」將佢攔在外圍。

有線人透露,港視員工咁做,皆因王維基唔想太過政治化,免得做咗英雄趕絕自己。

全站熱搜

tvb4life 發表在 痞客邦 留言(0) 人氣()