在日軍侵港時期,南固臺大宅曾用作囚禁慰安婦及犯人的地方,之後便扯上「猛鬼」傳說。訪問當日,記者在屋外已經嚇到腳震震,但 Michael依然氣定神閒,果然探靈經驗老到。 

U撈

我是 邪童 陳思銘 異秀•午夜凶鈴 兼職主持

Michael  24歲 公開大學工商管理  Yr.3
在公開大學讀書的 Michael(陳思銘),現為有線電視靈異節目《異秀•午夜凶鈴》的兼職主持,任職年半間,因不斷親身探靈及玩碟仙,撞鬼無數,他在公司被稱為「邪童」。
邪童希望畢業後正式加入娛樂圈,向藝人之路進發。

 

 

 

位於灣仔的南固臺一向都是探靈勝地,曾傳出不少「撞鬼」傳言,有線電視靈異節目《異秀•午夜凶鈴》的主持 Michael卻自言冇有怕,訪問當日他勇闖該地段探靈,「喺日軍侵港時期,將呢度設立成慰安所,所以𠵱家亦流傳唔少猛鬼傳言,好似有唔少途人經過時,聽到屋內傳出女人慘叫聲;亦有人話每逢夜深屋內就有一團團綠色嘅怪火飄浮。曾經有人因為想入屋探險,而懷疑被鬼上身導致情緒失控,最後仲上埋頭條添。」

 

記者在南固臺外逗留約 1小時,但仍然鬼影都冇隻, Michael亦稱完全感覺不到有靈異現象,「呢度附近多咗好多住宅,陽氣咁盛畀我係鬼都走啦,我做節目時嘅遭遇仲堅啦!」


Michael(右)十分好動,在學校是舞蹈學會成員之一。 

圖為 Michael(左四)參加《異秀戰》時的大合照。 

主持鬼節目

上年 3月 Michael因參加有線電視舉辦的靈異節目《異秀戰》入行,「《異秀戰》係一個真人 show,參加者有 10人,內容係四出探訪猛鬼地,每集都有評判評分,表現最好嗰 7個就有得留低做靈異節目主持,我係其中一個。𠵱家我主要接聽家庭觀眾嘅電話,聽吓佢哋嘅鬼故,因為係直播節目,所以反應慢啲都唔得。」

 

《異秀戰》期間, Michael要經常出外景,每次都會有林千博、簡信回等法科師傅在場,以防出事,「我原本唔太信有鬼㗎,但自從上年 5月,我同攝製隊去到大埔竹洋村錄節目,嗰陣師傅叫我哋入其中一間棄置嘅屋探靈,入到去冇幾耐我就聽到一把好淒厲嘅女人唱歌聲,仲維持咗 2至 3秒,而在場嘅工作人員全部都係男人,所以我好肯定嗰把係鬼聲啦。」

親身玩碟仙

Michael指做靈異節目非常考膽量,為了增加節目娛樂性,他更試過親自落場玩碟仙,「有次喺大埔猛鬼橋度玩碟仙,師傅事前警告我哋千萬唔可以問碟仙點死,否則後果會好嚴重。經過師傅教路後,我哋一共 5人成功請到碟仙上嚟,當我問到碟仙幾多歲時,我見住隻碟慢慢指住個『京』字,嗰下個心真係好寒,事後師傅解釋京係一個數字單位,比兆更大,即係話碟仙年齡已經好大。」 Michael說如果當時陽氣太盛就會請不到碟仙附碟,應選陰氣較重的地方;另外玩碟仙最好有師傅在場,不要私自亂試。

 

Michael現時每月會於《異秀•午夜凶鈴》做 1至 2次主持,連同做模特兒的$3,000收入,每月總收入約有$5000至$6000,「我夢想係入到娛樂圈做藝人,所以除咗做主持外,拍廣告同做 model我都唔放過㗎!我會以古天樂同吳彥祖為目標,希望有朝一日可以去到佢哋個 level啦!」

點入行做主持?

Michael指做主持最緊要識執生,「咬字好緊要,觀眾先可以聽得明你講嘢。」如果你夠自信和擁有以上條件就可以到各大求職網如《青雲路》和《招職》等,應徵做主持。《招職》現在就有 SHIN WEDDING婚宴及活動司儀的職位空缺,如果大家有興趣可以把 CV寄到 mailto:shin@shinwedding.com應徵。一般坊間活動司儀時薪約$200至$300不等。


撰文:何倬然 
攝影:葉偉豪
部分圖片由被訪者提供

全站熱搜

tvb4life 發表在 痞客邦 留言(0) 人氣()