Webber

自煮空間冇雞汁 NORMA

政府唔發牌,香港人冇得揀,焗住晚晚睇視帝祥,好在我哋仲有 YouTube。咪以為 Webber淨係叻拍無聊笑片,好似今期主角 Norma咁,拍嘅片獨沽一味教人煮餸,而且出鏡次數少到佢自己都唔記得,擺明賣藝多過賣樣,但 facebook fanpage有成 13萬個 like。有靚樣唔賣,的確好浪費,皆因 Norma就算企响度乜都唔做,相信都好睇過 May姐用雞汁整沙律!

1.你由做金融行業到自己搞網站,近年仲拍埋片,可唔可以講吓點解?


唔只 Norma會更新 daydaycook,好多會員都會 upload食譜上去同人分享,唔順便印本食譜唔怕浪費咩?「其實想出書好耐啦,但我成日冇時間搞呀!」 

我本身好鍾意煮食,當初由美國返香港,見到好多食譜唔係幾好,圖片唔靚,步驟又唔清,一直都想上網教人。我男朋友知道後,就响 2010年生日送咗 daydaycook.com呢個 website畀我。最初只係儲起我嘅食譜,但慢慢做大咗,見到個規模已經可以當成一份工,就由兼職轉成全職咁做,亦係因為咁,終於有時間拍埋片。

2.妳應該拍多啲個樣,妳嘅 YouTube片點擊率應該會高幾倍…


咪以為 YouTube嘅 hit rate同 subscriber唔多就覺得 Norma唔掂,事實上佢個 fanpage有成 13萬人 like過,係記者做咁多個 Webber之中排名第一。 

點會呀?但其實我未來都考慮會响 YouTube做網上節目,因為𠵱家全部都係食譜,都係似網站嘅延伸,所以唔係太多訂閱,如果我做節目形式嘅片,就可以主導番內容,希望到時更多新觀眾訂閱啦。但就要辛苦同事啦!目前拍片同剪片都係得兩個人,好在佢哋都做得好有熱情,仲會對節目後期嘅效果或剪接手法等等畀番意見我添!

3.妳一個鬼妹仔,點解淨係教人煮中餐咁古怪?其實妳想拍畀乜嘢人睇?

我身邊好多朋友結咗婚,但屋企煮飯都係煮牛扒意粉,其實中餐都好易整,干燒伊麵唔會複雜過意粉。我希望呢代人可以對中菜有更多認識,所以主要係拍畀年輕人睇,全部都係簡單易煮,等佢哋放假唔使搵節目,享受拍拖買餸、一齊煮飯嘅樂趣,令年青情侶之間更親密。

4.咁妳會唔會响節目度教人煮乜都落雞汁?

哈哈哈,我知你想整蠱我!客觀咁講啦,其實視乎你煮乜,雞汁都有佢嘅作用,例如你想慳時間調味,雞汁都唔係話唔好,但味精始終係要適可而止!

Webber's profile

Norma
職業:日日煮創辦人
YouTube頻道: Day Day Cook
拍片資歷:近 1年
作品總數: 200條以上
總 hit rate: 62萬以上
Subscribe: 5千以上







今期 Norma特別教《 FACE》讀者整魚香茄子撈麵,佢話我哋讀者後生可能入廚經驗少,但保證睇完人人都識做,仲提你哋咪咁懶用公仔麵,用上海麵或奶油麵健康好多呀!想知點整記住睇片。

撰文:熊俊彥
攝影:黃家活

 

FACE 336期﹣Webber vol.24 日日煮創辦人Norma 

全站熱搜

tvb4life 發表在 痞客邦 留言(0) 人氣()