50歲 

靚到底

忽然1周 (952期)50Fit佬張兆輝晚晚做全套護膚)

50 fit佬張兆輝 晚晚做全套

50歲,對於好多男士,可能是一個心理關口,但對於張兆輝(輝哥)來說,只是練歷和數字的表現。無他,入行 31年,大部分時間都做斯文小生,近年回歸演戲反而愈來愈激,看《神鎗狙擊》中他滾地又飛身,也在《逃出生天》中撲火……他說:「狀態的確比以前 fit,半年前開始做 gym修身操體能,注意飲食了,依家得番 160磅,加上每晚有老婆落手做全套護膚。」確實輝哥樣貌近廿年都冇乜點變,想愈老愈 fit,男士們學嘢啦。

 

輝哥由細到大都鍾意踢波,早年加入明星足球隊,守龍門至掂。至今仍 keep住每星期踢 2至 3次,經常跑步練氣,難怪仲咁 fit。



30歲 

40歲 

望真啲,攝影師話輝哥有啲似古天樂,大家又點睇? 

中佬「走」腩 多菜戒飯

訪問當天,輝哥剛於凌晨 5點收工,略帶倦容,不過一身 T恤窄牛 look到場,心裏不禁讚嘆:「外形高大零肚腩,睇落 fit過不少花𡃁仔。」
對比他的陳年舊相,無論在 30、 40至 50歲,身形都差不多,即問他點樣 keep?「細個時,一味做『波牛』,通常踢完波,一大班波友食飯消夜,食兩碗幾飯至夠,又點會諗 keep fit。其實在 30幾歲時有肚腩㗎,體重最高峰達 180磅,都幾嚇人。近十年,才開始注重身體,節制飲食和固定生活作息,除咗拍戲捱通宵,平日盡量早啲休息。
半年前,為拍《神鎗狙擊》要跟私人教練健身,配合淡而無味的餐單,戒食肥膩和澱粉質食物,連紅酒都唔飲得,要改飲威士忌,糖分較低。習慣後飯都戒掉,多以沙律代替。日常多吃蔬菜、少辣、少煎炸食物,定期有湯水滋養,好多時拍戲都會自備午、晚餐,就是老婆為我預備的一大盒沙律配雞肉、魚類。人老了,肥 5磅好易,瘦番就好難,都想 keep下去。」


戒食澱粉質食物已半年,平日拍戲都會自備沙律拼雞/魚肉,節食都要飽肚咁話。 

雖然輝嫂左彈右彈老公皮膚,但怎捨得唔理,拍攝期間細心幫手印面油,體貼非常。 

男士護膚小貼士:早晚都要塗眼霜,有時間在早上用按摩棒由內至外打圈按摩眼周位置,即時增加「電力」咁話。


輝哥平時最怕質地太𣲷的護膚品,但近期轉季皮膚乾冇辦法。特別在晚間厚塗面霜當敷面膜,翌日膚質自然滑啲,更易上妝。

半夜叫醒老婆 做 facial


一對仔女逐漸大,一家人去玩的機會少了。希望十年後,他們出身,輝哥就好似發哥咁減產嘆下,同老婆環遊世界。 

做藝人要靠樣搵食,輝哥一臉古銅肌色,毛孔略現,但算乾淨,這個年紀算唔差。輝哥慨嘆:「我成日都講,如果早啲聽老婆話(護膚),皮膚會仲好啲!多得佢半夜都幫我做 facial。」
輝哥背後,有美容軍師輝嫂照料皮膚,真幸福。輝嫂說:「我經常提醒他做 facial,以前唔聽話,好懶,我間中叫佢瞓低俾我做。佢試過半夜兩點收工,返到屋企拍醒我幫佢針清敷 mask,佢就『快速叉電』,晨早再去開工。」半夜被叫醒,輝嫂都冇 say No。她說:「我做美容,一定以靚行先。一見老公經常上鏡皮膚差就唔忍得。」輝嫂好 sweet就真。
輝哥解說:「大抵都是細個唔生性,好鍾意運動,怕汗臭會勤沖涼,卻懶理洗臉清潔,久而久之,油脂分泌過盛,誘發滋長油脂粒暗瘡。最嚴重是早期拍劇,用粉底膏化妝,妝效頑強,『蝕』入毛孔,日踩十幾粒鐘,加上我冇清潔皮膚,搞到毛孔粗晒。」身旁的輝嫂搶說:「你是我見過的男士中,皮膚最差的一個,仲係『黑頭界代表』。發哥(周潤發)、三哥(苗僑偉)的皮膚都比你好得多,發哥肌齡更似四十,知驚未?!」
後來輝哥醒覺,「依家電視高清影像,毛孔粗、浮黑頭,用咩粉底都遮唔住。十年前開始,才聽老婆話認真洗臉、搽護膚品。依家都識少少,近排轉季,我會用質地較潤的 cream滋潤皮膚,當感覺皮膚特別乾和繃緊,更會在睡前厚塗 cream當面膜敷過夜。另外一定會塗眼霜,去眼圈眼腫。」


撰文:石美寶 
攝影:周義安
攝錄:蔡政峰
剪接:曹俊賢
部分圖片:《壹週刊》
化妝:雷淑賢(張兆輝)、 Yola Hung(張太)
髮型: Ice Leong@ii hair& nail 
Raffiné產品查詢: 2713 7770

    全站熱搜

    tvb4life 發表在 痞客邦 留言(0) 人氣()