熱到爆

熱玩密室遊戲

去年首個真實版密室逃脫 game出現後,打喪屍、玩推理等,不再只限於虛擬世界。
這類遊戲更如雨後春筍,單是 10月已有 5間公司推出 9個新遊戲。驚嚇、懸疑、高科技,全都有齊,連細路都玩得。
就在臨近萬聖節,拿起電筒、放大鏡,加埋你嘅好奇心、勇氣及智慧,跟我哋走勻全港九大小密室,打喪屍解謎題,開始驚險之旅!

 

 

Mr. X 全機關超豪解謎遊戲


把拼圖砌好,出現的視覺效果,如拍緊《盜墓謎城》,而答案就在其中。 

採訪前,攝影師極力推介 Mr. X,話全港最大最豪。但在紅磡廣場,心想豪極有限啦。點知去到,真係豪到呢……單係儲物櫃都是電子感應開關,跟一般用鎖開的 locker差天共地。新裝修好的「光明之書」遊戲房,更是條條原木砌成,木香味撲鼻,非常揼本。
另一賣點是全機關化,非常多暗格、暗門。最誇係成間房可以郁,由一個空間移去另一空間,簡直神乎奇技,真以為自己置身於占士邦電影。
Mr. X前身是戲院, 2萬多呎非常大,暫開放一樓 4間遊戲房,其中「光明之書——以賽亞」和「終極審判」,更是剛完工開玩無耐,我們率先試玩。

「光明之書——以賽亞」 考清晰思維

難度:★★★★★(最高為 5★)
遊戲房分開兩大兩細遊戲區,店長指在這裏要用「跳躍式邏輯」思考。初時唔明佢講乜,玩落才發現房間與房間的謎題和答案原來是互通的;即要解開第一間房的謎題,需要在第二間房內找答案。難度提升,好考耐性,思路更要清晰。
講多句:進房間後,別以為眼見的就是第一道要解的謎題,一定要分工,不同人手研究不同謎題,或去找提示卡。否則像我們一堆人只解一道題,結果解了半小時,才發現白費心機。此刻,亦好考你的忍耐力,克制唔好大發脾氣,冷靜組織點可以在剩下半小時贏個 game,真係較做人仲難㗎!


進入第二遊戲區感覺詭異。話明「光明之書」,當然要解開這本書的謎。係點?唔講得,但後面出來的特效好勁,配埋震爆耳膜的音響,好驚㗎! 

遊戲房上周才裝修好,非常有古堡 feel。牆上呢堆鐘,我們花了 10多分鐘才能解開,亟需仔細的觀察力和強勁的推理。 

店主提示大家,甫進店便要留意身邊事物,因全是解謎提示。「日後會連廁所都放埋。」咁激,勁啊! 

每間房最少有一張提示卡,收在不同位置,考你運氣,搵唔搵到。 

「終極審判」 考智力體力

難度:★★★★
這間遊戲房有齊機關、視覺效果和推理,店長形容是密室遊戲的精華所在。單係道金庫門 2米高,平時邊見到。同樣,房間好多機關、暗門,部分仲可以移動,非常有特工 feel。

 

要打開金庫門,需要解開兩組機關才找出密碼。店長話好多密室遊戲玩家因理論多,反而解好耐都解唔開;相反,第一次玩的想法簡單啲好快過關。咁好的提示,就派第一次來玩的模特兒出馬,果然好快解到謎。所以話跟唔同經驗的朋友來玩,可互補長短,始終合作好重要。

 

打開夾萬門以為得米,點知得個十字架,原來又要回到第一遊戲區找密碼,玩呢類遊戲真係好考耐力!

 

來到第二遊戲區,紅外線陣好鬼誇, 90幾組燈,前排固定,後排在動,唔小心被射中就響警鐘,卡在中間唔知點算好,意志弱啲都好易放棄。好彩店長又有提示,教我們點過。只可以講要有番咁上下體力,自己諗下啦!

 

成功過咗紅外線陣,就要想辦法打開呢道門,入去仲有兩、三個謎題等你解。因為是店內高度機密,所以唔准影相,只可以講非常刺激好玩,尤其最後一個謎,好考記性和合作,我們差點過唔到。

Mr. X

地點:紅磡馬頭圍道 37-39號紅磡廣場 1及 2樓 7-13號舖
時間:周一至五 12nn-1am,周六至日 10am-2am。
房數: 4間。另有 3間房及 3千呎活動區將於 11月開放。
限時: 1小時
人數: 4-12人
收費:周一至五 7pm前,$180/位。周一至四 7pm至 1am、周五 7pm至 2am及周末全日$220/位。大小同價。優惠: 9人同行 2人免費。
查詢: 2379 9911  http://www.facebook.com/mrxhk 
備註:現參加遊戲並成功逃脫,有機會參加明年 9月搞的神秘大賽。

密室遊戲歷史

密室遊戲源於日本。話說有間公司為培養員工的合作精神,把他們困在一間房中解謎逃脫。後來遊戲在日本盛行,更發揚至中港台。主要是把一個場地分為不同主題的遊戲房,可以是驚嚇、推理和冒險。再把遊戲房細分為不同程度或形式的遊戲區,有點似打機過關。

逃出喪屍城 首間密室打喪屍


第一站毒氣房,軍人教你搵提示救首領,落足眼力找。會有零星喪屍搞你,浪費你的能量值,要小心! 

難度:★★★ 1/2
密室遊戲多是推理、解謎,剛開幕的《逃出喪屍城》有齊這些元素外,更是全港首間市區鬼屋,不但像主題公園鬼屋有喪屍嚇人,仲要用槍打死佢㖭。玩時感覺似在打機,但卻是真喪屍,故緊張刺激程度倍增!
至於解謎難度唔太高,只是在其中一間房找出拯救首領的提示,把她救出便可,反而打喪屍……到依家想起都有啲驚!

 

 


先佩戴打喪屍手槍。上面為能量值,開槍便遞減,想贏要就住用,否則像我見喪屍就喪射,差點出唔番去。 

來到黑白迷宮,啲燈閃到好似的士高,加埋牆上的圖案,超級迷幻。以為胡亂開隻門就可逃脫,點知隻喪屍彈出,差點嚇破膽,我的能量值就係喺度無晒喇! 

最後一關實驗室。布置超認真,噴埋乾冰添詭異。邊打喪屍邊救首領,只可以講合作精神好重要,否則無能量值仲唔死喺喪屍手。

逃出喪屍城

地點:旺角城市中心 7樓全層
時間: 4pm-12am
房數: 1間
限時: 13-15分鐘
人數: 4-6人一組
收費:平日$78;周末及假日$88
查詢: 2742 1681  http://z.freeinghk.com 

逃出香港 典型逃脫 game

唔要驚嚇想玩番啲傳統嘢,推介《逃出香港》元朗店的「遊俄驚夢」和「遊戲世界」。是非常典型的密室逃脫遊戲,不但要推理解謎,還要搵鎖匙逃脫。玩完不但覺得可訓練推理能力,仲好考耐性,因下下要喺 400個鎖中找 10個啱的,喺 300多條鎖匙中搵條啱的,時間又唔多,你話點會唔發脾氣先!

「遊俄驚夢」

難度:★★★★


講班孤兒要在教堂找身世之謎。分兩個遊戲區,開始是解木箱鎖,仲要睇俄文,真係要諗下先解到。 

再來是這棵鐵樹,要喺上面 400個鎖中搵出適合的膠片,砌出圖案解謎。你話無合作性和耐力,點會做得到! 

下個區要解兩、三個謎題,其中一個非常隱蔽,好考觀察力。

「遊戲世界」

難度:★★★★ 1/2


鍾意打機的,推介「遊戲世界」。布置如 Mario、食鬼和地雷陣等遊戲場景,如真人走進遊戲世界。仲有正反派角色扮演,鬥快搵鎖匙逃脫。 

最後喺近 300條鎖匙中搵出終極開門匙,不停同自己講要堅持、要堅持…… 

逃出香港

地點:元朗青山公路 56-60號新基大廈 1B室
時間:周一至周日 12nn至 12am
房數: 3間
人數: 6人
限時: 45分鐘
收費:$128/位,周一至五 6pm前及 11pm後$98/位(公眾假期除外)
查詢: 2408 9066  http://www.freeinghk.com 

The Quest 細路啱玩

很多密室遊戲都話啱小朋友玩,但室內氣氛怪異,細膽啲都易嚇親。唯獨這間密室,直覺小朋友肯定鍾意。布置仿照巴黎羅浮宮,全是藝術品,亦無鎖住你,純玩推理,有點似推理小說,解開層層謎團,找回失去的藝術品。最多只有角色扮演,反派出來破壞查案過程,絕對唔驚嚇,小學生都玩得,仲有助訓練解難及邏輯思維㖭!

「尋謎羅浮宮」

難度:★★★★


雖是推理題,但都有啲難,像在 2米乘 3米的油畫中搵答案,真係要出動電筒、放大鏡,落足眼力才找到。 

藝術品參照羅浮宮的珍品來做,認真落本。 

玩時派發工具箱,內有槌仔、手套,是見過用最多工具的,令遊戲更逼真。

「鑑證緝兇」

難度:★★★ 1/2
另一遊戲房講酒吧殺人。不同身份人士要搵證據證明自己清白,又要查出兇手。會用現場證物做實驗和模擬科學鑑證查案,能學習科學和鑑證知識。不過地上有具假人屍體,太細膽可能第一眼會驚,但玩落都可接受。

The Quest

地點:尖沙嘴彌敦道 180號寶華商業大廈 12樓全層
時間:周一至四 12nn-12am;周五至日 11am-3pm( 11月起)
房數: 3間
限時: 1小時
人數: 4-8人
收費:$138/位,試業期間$108/位。大小同價
查詢: 2372 0330  http://www.thequest.hk 

MR 高科技密室

MR只得 4千呎,間開 4間遊戲房,每間房又分為 5個遊戲區,入去每區都感覺有啲細。但玩落卻發現間間房的 game和機關,都花心思設計,好多時答案更在我們意想不到的地方,要提示才發現。老闆是讀工程出身,故機關上用好多高科技,如熱能感應器、電子感應鎖等,連機關都精心設計,第一次來玩的模特兒都讚老闆食腦。據聞有父母帶小朋友來玩,當親子活動。

「地球末日」

難度:★★★


「地球末日」遊戲房試玩時仲未公開,講地球末日逃難。門一打開,即出現嚇人場面,模特兒大叫,原來……唔講,自己去 feel下! 

這部電腦顯示開鎖密碼,但按極都白茫茫。最後問提示,終發覺收埋密碼嘅方法好有創意喎。 

「森夜行」

難度:★★★★
「森夜行」遊戲房,任務是拯救被女巫捉走的父母。就係在這裏,會發覺常理以為放密碼的地方通通唔係,真係要有逆向思維。

MR

地點:新蒲崗五芳街 27-29號永濟工業大廈 11樓 A室(鑽石山港鐵站 A2出口行 5分鐘)
時間:周一、三至日 11am-11pm,惟周二 7pm-11pm
房數: 4間
限時: 45分鐘 人數: 2-3人
收費:$128/位,大小同價
查詢: 3521 1113  http://www.mission-routes.com 


撰文:馮淑玲
攝影:李梓軒、周義安
協力:蔡政峰
模特兒: Miranda Wong@ jam cast、 Man Yu、科林、 Milky& Kinki@ Supergear、 Aka@ Super Girl

    全站熱搜

    tvb4life 發表在 痞客邦 留言(0) 人氣()