【壹週刊】 玩轉大馬 Legoland Water Park


Lego Slide Racers全場最高嘅俯衝式滑梯,一出管道見到黃色滑梯近兩層樓高,加上水力夠,藍色滑水墊又減阻力,瀡得勁快,真係刺激到大叫。 

登機證

旅行 旅遊 登機證 馬來西亞 新山 Legoland Big Boys Club  Legoland Water Park

馬來西亞新山 Legoland開幕一周年,全球第二個 Legoland Water Park正式開幕,而且比加州嗰個更大,用水量超過 30萬公升,有 20條全新滑梯,仲有 70個大大小小用 Lego砌嘅公仔。
Legoland target小朋友,水池一般水深唔過 120cm,場內有一半遊戲適合一家大細玩,例如 Lazy River、 BB滑梯水池;激少少,只有俯衝式滑梯比較啱成人。勝在就腳,而且一年到晚都係夏天, Lego迷想幾時去都得。夠晒方便!

 

 

猛力 Joker Soaker

雖然美國加州 Legoland水上樂園都有呢個遊戲,不過就只有喺大馬先可以感受 350加侖水一個方向兜頭頂淋嘅快感。差不多每隔兩分鐘,頭頂大桶就會裝滿水,救生員響鐘提醒大家快將倒水,個個立即頭岳岳等水傾瀉。走入 Joker Soaker,有好多水槍、小水桶同滑梯,唔算刺激,純粹要你濕身當 warm up。

 

 


350加侖水淋落嚟一刻,白茫茫一片,威力幾勁。 

微波 Wave Pool,大人覺得無料到,不過細路玩得好開心,仲大叫「 Big Wave! Help!」 

全場有 70個用 Lego砌成嘅人仔,仲襯番 Water Park著比堅尼、夏老威。每個人仔最少要用上半個月先砌成。

Splash& Swirl讓你感受「沖廁」一刻,不過模特兒嫌佢唔夠水力,沖極都沖唔去,最後要自己用腳撐先跌到落窿。 

DUPLO Splash Safari短、闊、少少斜嘅滑梯連 BB池,只得幾個 B同媽咪喺度玩水,難得清靜。 

Imagination Station俾小朋友感受吓水力同砌吓 Lego嘅 Mini Game,少啲想像力都唔識玩。

Water Park  9大唔掂

唔知係咪剛剛開幕, Water Park內配套未完善,入到去想搵張凳坐都難;再遇上一場大雨,安排極為混亂,落大雨竟然要客人淋雨 5分鐘行去幾把太陽遮下避雨?希望日後運作熟習後會有改善啦。


1.勁跣一入 Water Park就見到更衣室,好方便。不過更衣室內外地下全無防滑墊,慢行都危險。 

2.唔賣大人用品如果玩到件比堅尼斷繩,想即場買過件? Sorry,精品店內普通泳衣只有小童款,成人只有黑色長袖勁娘系列。 

3.搬勁重水泡有幾款滑梯都要求玩家自己搬水泡,托住水泡行到上頂,勁重,未玩已攰到散晒。

4.買餐排隊成粒鐘樓面要去埋廚房處理食物,一人分飾多角根本做唔切。加上收銀機又出現故障,無得找續,食餐飯排隊排到𤷪。 

5.烏蠅成群BLT牛肉三文治套餐$61唔算貴,味道亦唔錯。提醒你買完要即刻食,因為一放低,就有大群烏蠅飛埋嚟,好噁心。 

6.無凳坐園區內只有餐廳同 Wave Pool有多啲凳坐,其餘位置只有寥寥幾張凳,而且無瓦遮頭,暴曬下好辛苦。

7.帳篷無用以為租咗個 Cabana獨立帳篷可以唔使乾煎,點知拍攝當日傾盆大雨兼行雷,職員話帳篷會容易俾雷劈中,叫大家去安全地方暫避。全場幾百人逼晒喺餐廳前十把太陽遮下同 Locker位避雨,搞到全身濕晒兼勁凍。 

8.安排混亂由園區去 Locker處避雨,沿途其實無遮無掩,全身濕晒,而且地面濕滑,危險。 

9.呃錢乾身機諗住俾$25可以乾身 10分鐘,好過濕身凍親。吹咗 5分鐘,職員突然人手停咗部機,仲話已經過咗 10分鐘,有冇搞錯!

Lego酒店 全世界一樣

Legoland主題公園旁邊嘅 Legoland酒店大致上已經完工,外牆夠晒 Colorful,正門有幾個 4米高嘅 Lego公仔。酒店大堂有巨型嘅 Lego屋同海盜船,幾萬粒 Lego扮海水,大人 Check in時,細路仔可以慢慢玩。酒店有 249間房,分 Adventure、 Pirate、 Kingdom三款主題房間,全部非吸煙房。雖然比起加州 Leogland酒店房間數目略少,不過大堂、餐廳及房間都較闊落。
5樓設有泳池,可以眺望整個 Legoland樂園。主池由淺至深,顧及小朋友安全,另外有水深至腳眼嘅 BB池。酒店預計會有 Spa同 Fitness設施,不過仲未確定。酒店約於 2014年 1月正式開幕,房租未定,入住嘅客人,可以喺樂園每日未開門時提早入場玩,大家繼續期待吧!

 

 


Check In櫃枱後有一萬個 Lego人仔,仲吊住個 Lego大 Figure踩單車左右移動,引你注意。 

大堂有一座 Lego砌嘅冒險屋同埋一艘海盜船,要半年多時間先砌成。 

酒店泳池水最深只有約 1米,想游水都幾難,陪小朋友玩吓水罷啦。

酒店將會有一間自助餐餐廳及一間 Fine Dining餐廳,入住包每日早餐。 

酒店有家庭房,小朋友房用上下格床,裝飾更多更繽紛,而且大大隻字寫住「 Adults Keep Out!」,微細位都同加州 Legoland Hotel一樣。 

有用資料

證件:持有效香港特區護照前往新加坡及馬來西亞無須簽證。
天氣: 10月馬來西亞氣溫約 25-35度,炎熱及較為多雨,時有雷暴。
貨幣兌換:馬來西亞 RM1:港元$2.45,新加坡 S$1:港元$6.25

前往新山:由吉隆坡到新山車程約 7小時,建議由新加坡樟宜機場到新山會較近。
方法一:可於樟宜機場乘的士到 Kranji地鐵站(約 25分鐘,約$150),轉乘 170巴士到新山(約 20分鐘,車資$5,中途須下車過關。)
方法二:樟宜機場有巴士直達新山(約 2小時,$45,可在車上過入境檢查)

 

航班資料: tigerair每日有三班往新加坡直航,票價約$1,288。香港往新加坡每日 10:50am、 6:45pm、 9:45pm起飛,新加坡回港 6:05am、 2pm、 5:05pm起飛。上年 tigerair贏得 Skyscanner Asia Pacific Airline Food比賽的「 Best in-flight meals」獎項。
本月 23日至 25日,推出 72小時「買去程送回程」優惠(須另付機場稅及附加費),包括香港來往新加坡、雅加達、克拉克及新航線泗水、峇里島的航班。
查詢及預訂: http://www.tigerair.com 
電話: 3018 6899

 

Legoland Malaysia Resort
地址: 7, Jalan Legoland, Bandar Medini, 79250 Nusajaya, Johor, Malaysia
電話:+607 597 8888
網址: http://www.legoland.com.my 

Legoland Water Park
開放時間: 10am-6pm
入場費:主題公園連水上樂園 1天套票:成人$429、 3-11歲小童及 60歲以上長者$343、 0-2歲幼童$24
水上樂園門票:成人$257、 3- 11歲小童及 60歲以上長者$208、 0-2幼童$24
前往方法:由新山市中心可乘 LG1巴士到 Legoland($10、約 45分鐘)

 

鳴謝: tigerair


撰文:吳韻菁 
攝影:陳家維 
Model: Paris@Puremodel

tvb4life 發表在 痞客邦 留言(0) 人氣()