嫌跑步機對住牆跑好悶?對住外國風景跑,應該醒神好多。 

CLOSE-UP

Tech走肥膏

想大隻、想健康?今時今日仲拎住舊鐵死舉爛舉,或者餐餐西蘭花加雞肉,死谷爛谷!
其實要健康修身,絕對無難度,就算你懶得落街做運動,又嫌在室內對住四幅牆太悶,一樣可以靠科技,做到人在家心在外的虛擬跑街效果。

隨時跑外國

想一路跑步一路睇住外國風景,並非跑步機加隻外國風景 DVD就得。由台灣 Johnson Health Tech開發的 Passport系統先至夠真實,因為系統除了提供世界各地跑步路線影像,更可因應步速,在屏幕播放速度近似的移動畫面,跑感更加真實。原理是將支援 Passport系統的跑步機,經 Passport機頂盒連接電視,再插上內置跑步路線影像的 USB手指,選擇好路線並起跑後,機頂盒就會讀取跑步機的跑速數據,然後將跑步路線影像以合適的速度輸出電視,畫面亦會同時顯示埋所消耗的卡路里、里數、時間等資料。


模特兒試跑完後話:「畫面好清,個景又靚,好過喺香港同啲車一齊跑多多聲啦!」 

Passport系統主要靠機頂盒控制,購買時會附送跑步路線 USB手指,內有兩條跑步路線影像。 

上斜加難度

單是跑平路,可能會覺得難度太低,其實 Passport所提供的跑步路線既有平路,亦有多國山路。跑上斜時,跑步機會自動調校至相應的斜度,增加真實感及難度,不過,落斜就會變番平路,效果差少少。至於跑步路線現時分別有意大利威尼斯街道、瑞士阿爾卑斯山、美國加州大峽谷國家公園等共十條,每條路線大約須跑 45分鐘,都夠一晚的運動量。
網址: http://www.johnson-store.com.hk 


現時只有 Johnson Health Tech旗下的 Horizon、 Johnson及 Vision三個品牌的跑步機支援 Passport系統,想玩就要留意機身有無印住 Passport logo。 

開跑之前可以設定體重、時間同斜度;當跑上斜路,跑步機就會按比例提升斜度,模擬上斜效果。 

自家環法遊

自問鍾意踩單車多過跑步,其實亦有一部由 ProForm推出的環法健身單車可以揀。外形雖然同一般健身單車相似,但就內置 24條環法單車賽的賽道資料,包括上落斜位、斜度等。選擇好路線後,健身單車就會自動調校傾斜度及腳踏的阻力,模擬上落斜感覺。想睇埋畫面?只要將環法健身單車經 Wi-Fi上網,並同時登入 iFit.com,就可以將用家選擇的賽道資料同用家踩車速度等數據上傳網站,只要再用 iPad或電腦開啟及登入 iFit.com賬戶,就會在畫面上睇到 Google Maps的街景,雖然只得定格畫面睇,但都可以因應速度前進,睇到相關風景。
想自己整條踩車路線?其實只要於 Google Maps進行路線規劃,再連結 iFit.com賬戶就搞掂,踩香港路都無問題。
網址: http://www.fitboxx.com 


一生人都未必有機會參加環法單車賽,但買部環法健身單車($16,888),就可以過車手癮。 

雖然路線畫面以跳格形式顯示,不過一樣會因應速度前進。 

收錄環法單車賽 24條賽道資料,當中有不少為上山下坡路段,都幾考體能。

一磅起底


Carol  30歲文員生完 BB想修身,買入內置 Wi-Fi功能的體重磅,將資料上載雲端,方便管理。每次做完運動, Carol就會上磅,睇番身體各項數據有無變化。 

做女人,的確不簡單,就連想回復苗條身形,難度都高過人。好似剛剛生完 BB的 Carol,未能做劇烈運動,只可以由步行同飲食着手,效果不太顯著。不過, Carol依然好有恒心,幾乎每日 keep住做,「除咗夜晚食完飯落街行,返工放工都會早一個站落車行多啲,甚至袋埋計步器出門,只要將步數輸入健康網站,就可以睇到消耗咗幾多熱量。」

了解身體

用計步器幫手計算修身效果,未夠準確,亦難以監測身體其他數據,所以 Carol試用 PCCW「 e體健」服務,「成個 plan主要係靠個 TANITA體重磅,除咗體重,仲睇埋身體嘅脂肪、水分比率、肌肉質量等資料,最重要係個磅用 Wi-Fi連接上網,每次磅完,所有資料即時上載雲端儲存空間,之後可以喺電腦睇番晒所有數據。而家見自己重咗,未必一定係脂肪多,可能只係水分比率高,食番啲有助去水嘅食物就得,唔會因為體重冇大減而影響運動決心。」


上完磅,資料識自動上載網站儲存,好有系統。 

除了用電腦,亦可用專用 app翻睇資料。 

三千入場


Carol隨身帶備計步器,約略計算自己每日所消耗的卡路里。 

Carol話成個服務仲包埋三個月營養師監察跟進,睇住身體狀態,而且系統仲會有建議餐單,跟住食成個禮拜,的確減到兩磅,「功能係幾好,之但係價錢都唔平,電子磅加埋一年網站雲端儲存(最多四個賬戶),都要成三千蚊,一年之後仲要另交廿幾蚊網站儲存月費,所以約滿後都未必會繼續用。」

打機操肌


Katon  27歲 浸大體育及康樂系學生平時打波跑步都未夠,仲要買套 Nike+ Kinect Training返屋企做訓練,實行無間斷操肌。做完十五分鐘, Katon已經開始上氣唔接下氣,可見訓練動作絕不輕鬆。 

鋼條身形的 Katon,不但鍾意運動,兼且仲讀緊體育及康樂管理文學士,「為公為私」都要將理論付諸實行,平均每個禮拜兩場足球兩場籃球加十公里跑步,返到屋企,打番幾鋪機 relax的確理所當然,不過 Katon打機,依然離不開做運動。「 Nike+ Kinect Training用 Kinect玩,玩咗幾個月,貪佢唔使用手掣,做起嚟夠真實,而個 game主要分為肌肉操練、重量訓練同埋心肺功能訓練,預先 set好每星期做幾多日,就可以跟住進度去做。」

專注動作

睇見 Katon玩足半個鐘,依然汗都無滴,仲以為 Nike+ Kinect Training無料到,點之記者試玩幾分鐘,已經開始流第一滴汗,「睇就容易,其實所有動作都要跟到足,以前自己做掌上壓,求求其其做十幾下就算,反而遊戲對姿勢要求好嚴格,因為 Kinect原理係用個鏡頭影住你,再即時進行動作分析,冇得走數,但可以逼自己做,而且會有聲音幫手數或會話你知做完未,唔使專登望住電視機,時間亦容易掌握。」 Katon最鍾意做腿部訓練,「做完真係覺得大腿筋鬆咗。」


有示範動作跟住做,仲識監察玩家動作是否正確,以及會幫手數做了幾多次。 

Katon話初初幾乎每日玩,仲 set埋時間表,日子有功,仲覺得腿部力量有改善。 

必裝免費 App

除了另購配件,想 keep fit健康,仲有好多免費 apps幫到手,甚至可以自動提醒補充水分,減肥健身無難度。

 

搵位健步
都市人經常搵借口不做運動,又擔心落街散步不熟路線。只要下載由康文署推出的「 Fitness Walking」後, app就會根據手機 GPS定位,列出最近的健步徑,之後仲會自動連結 Google Maps,規劃埋行走路線。除此之外, app又設有「健康計算器」,只要輸入身高、體重及減肥目標等資料,就會計算出每日運動量或食物卡路里吸收量等減肥目標,貼心。

Fitness Walking
支援系統: iOS/ Android


GPS定位後,手機 app就會自動搵附近的健步徑。 

 

飲食日記
通過控制飲食而減肥人士,必定揸緊卡路里攝取量,「 FatSecret」 app除了會按食物種類,列出卡路里量,用家仲可以記低每餐食物, app就會自動分析及建議運動量,有助用家 keep fit減磅。

FatSecret
支援系統: Android


App可以日記形式,記低每日飲食分量同種類,有助追蹤飲食習慣。 

 

提醒飲水
除了多做運動,醫生仲建議成人每日至少飲八杯水,幫助身體排毒,減少脂肪同宿便積聚。不過,實際上又有幾多人做得到? App除了可以讓用家記錄每日飲品的種類,仲會適時提醒你去補水,更易飲夠八杯分量。

Water Your Body
支援系統: iOS/ Android


唯一不便是每次飲完水,要手動輸入飲水類型同容量,系統先會提醒你飲夠水未,有待改善。 

智能配件逐樣捉

都市人未必個個肯做運動,不過若加上一堆智能配件,幫手記錄運動成果,甚至將減肥成效上載 Facebook晒命,肯定有更大推動力。

監測睡眠

近年市面有不少運動腕帶,可以為佩戴者記錄步距、運動量等資訊。 Fitbit最新推出的腕帶功能就更多,可以記錄埋佩戴者的睡眠質素,然後無線連接手機專用 app,顯示例如清醒、淺睡及深睡等數據。

Fitbit
支援系統: iOS/ Android
售價:$898
網址: http://www.leader.com.hk 


連接手機 app,就可以翻查每日健康資訊。 

腕帶有四款顏色選擇,就算當配飾戴都不失禮。 

智能電子磅

Fitbit Aria不單可量度體重,更可以透過 Wi-Fi連接電腦或手機,再用專用電腦軟件或 app,計算出身體的脂肪比例及 BMI指數。系統會根據記錄分析有關資料,有助計劃健身方案。

Fitbit Aria
支援系統: iOS/ Android
售價:$1,168


Fitbit Aria外形同一般電子磅無太大分別,想不到功能多多,連接電腦或手機 app,就可以幫自己記錄體重變化。 

智能手錶

早前 Sony同 Samsung分別公布智能手錶,只須透過藍牙同手機進行連接,就可以操控手機內部分功能。不過, Samsung的 GALAXY Gear只對應自家智能手機,不夠方便。最好都是揀支援所有 Android裝置的 Sony SmartWatch 2,用家可以下載專用的計步 app「 WalkMate」,練跑前開啟手錶內的 app,毋須袋住手機,都可以自動記低跑步路線、速度等資訊。返屋企透過藍牙將資訊傳送到手機,專用 app就會自行計算及記錄訓練成果,兼且可將成果上載 Facebook晒命。

 


用 Sony SmartWatch 2最方便之處是跑步時只須戴住手錶,已可以計算到步速。 

Sony SmartWatch 2
支援系統: Android
售價:$1,698
網址: http://www.sonymobile.com 

 


手機 app除了記錄步數,仲會計算埋步速同消耗卡路里量。 

WalkMate
支援系統: Android

另類裝備

講運動健身,來來去去只靠手帶及手錶,變化有限。
外國不斷有人研發新 gadgets,扭盡六壬氹你 keep fit,成效有待時日驗證,但至少夠好玩,吸引到普羅大眾修身,功德無量。

襪襪測


量度心跳同埋步數好小兒科,最重要是睇清楚雙腳受壓程度,從而評估跑姿是否正確。 

運動品牌鍾意開發高科技鞋,並在鞋內裝感應器檢測運動強度。美國 Heapsylon公司的產品更「貼身」,開發名為 Sensoria的感應襪,靠電子針織纖維製成的襪,感應運動數據並經藍牙無線傳至手機。最重要是感應到跑步時雙腳受壓情況,從而提出改善跑姿的建議。
售價:約$1,170
網址: http://www.heapsylon.com 

坐得好


除了坐姿,仲可以記錄埋睡眠數據。 

運動手帶測到運動量同埋睡眠質素, LUMOback腰帶就可以測坐姿,只要將它扣在腰間,一坐低就會檢查是否坐得直,偷懶坐歪即刻會震動提示,仲可以同手機無線連接,記錄全日坐姿分數,以及有無足夠伸展時間,提醒自己不要掛住上網坐足一日。
售價:約$1,170
網址: http://www.lumoback.com 

追飛機


點先會停?跑到攰,成個人擰轉,直升機認不到件衫的間條圖案,就會自動停低泊好。 

奧地利學生改裝 AR Drone直升機,加入 Joggobot程式,只要跑手著上特定顏色間條跑步衫,直升機就可透過監察鏡頭認出跑手,然後沿途領航,變相有目標俾跑手追,分散跑步注意力。
網址: exertiongameslab.org/projects/joggobot

慢食叉


所有電路包在叉柄裡面,不怕黏住食物殘渣。 

要 keep fit,除了從運動入手,飲食都緊要。法國出品的 Hapifork標榜是「智能叉」,主力記低每餐進食所花時間、每啖食幾多同埋幾耐食一啖,返屋企插隻叉落電腦,就會睇到所有數據,以及進食速度是否過快。隻叉備有提示功能,如果食得太快會輕輕震動,無時無刻提你慢食,對身體好。
售價:約$770
網址: http://www.hapilabs.com 

facebook

只要在 Facebook以「 NEXT 3.0」為關鍵詞搜尋,或以手機的「 QR code」 app掃描,就可以睇到更多新聞同產品情報。


text、 photo:科技組

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()