相就改得流流哋,但我就覺得消息屬實喎。 

IGOSSIP

神改之機

Hasselblad近年好鍾意「改裝」 Sony相機,好似將 NEX 7改成 Lunar,同埋將 RX100改成 Stellar, Sony餡 Hasselblad價,情況同 Leica「改」 Panasonic DC機仔差唔多。不過, Hasselblad明顯食水深好多,以 Stellar為例,只係喺部 RX100上加裝唔同木材手柄同加多個 Hasselblad logo,最貴就賣到成兩萬五( RX100約售五千蚊),足足賣貴五倍有多。上個禮拜 Sony再出全片幅換鏡細機 Alpha 7(詳情可睇今期 Hot-items),網上即刻流出 Hasselblad版 Solar諜照,仲話預計部機賣八萬蚊添!雖然最終被踢爆部機只係改圖嘅,不過,你又估吓 Hasselblad做唔做得出吖嗱?

智能錶潮殺到


adidas出手錶係好,做運動就唔使一定拎住手機。不過成三千蚊,又似乎貴咗啲。 

繼 Samsung GALAXY Gear同 Sony Smartwatch之後,盛傳 Google亦將會喺下星期發表智能手錶 Gem,手錶主要結合 Google Now功能,可以顯示用家嘅日程表、關心嘅資訊、天氣、交通狀況等等。雖然未知真定假,但智能手錶將會掀起另一浪 gadget熱潮,就肯定係真。好似 adidas上個禮拜就公布咗將會喺 11月 1日推出自家運動智能手錶,比起 Nike嘅 SPORTWATCH GPS,多咗測心跳,同埋可以用藍牙連接耳機聽歌聽運動資訊功能,但售價亦貴 Nike一倍有多,大約賣$3,120。可惜香港 adidas話未知幾時返,如果有興趣,不妨搵美國親友代買,早買早享受呀。

PS4賣萬四蚊


唔單只主機,就連單買一隻 game,平均都要六百蚊咁滯,真係要計過度過至買。 

Sony部 PlayStation 4下個月 15號就喺美國推出,歐洲同南美地區就 11月尾有得玩。部機定價 399美元,兌番港幣大約三千零蚊,點會賣到萬四蚊咁貴?講緊嘅唔係炒價,而係巴西嘅「正常」機價。原來巴西對遊戲類產品徵收 120%重稅,再加埋入口稅同其他雜費,令到機價颷升到 1,850美元(約$14,400)!難怪正價都貴過香港炒價啦。至於點解巴西政府會收咁重稅?原來根據巴西法例, game係屬於 gambling其中一個類別,所以喺嚴打賭博方針下,電視、電腦遊戲就成為陪葬品……你話香港 game迷幾幸福呢。


text:周群雄

tvb4life 發表在 痞客邦 留言(0) 人氣()