對了水果大半生的阿聰,認為到達 3字頭要自己做老闆,所以決定開水果店。 

創業通

80後專營 日本直送水果 進濤菓欄 油麻地新填地街 222號 B1

說起油麻地果欄,傳統、老舊、叔父輩,這些詞可能已自動彈出,但 80後的阿聰就與朋友合資 30萬,進軍果欄。開業 3個月的進濤菓欄,以高檔日本直送水果為賣點,配合 facebook宣傳、 24小時營業及送貨上門服務,成功站穩陣腳,月賺約$45,000。

 


進濤菓欄在新填地街與窩打老道交界,正正在果欄對面。 

記者去到位於新填地街與窩打老道交界的進濤菓欄,看見老闆阿聰正熱情地招待行人試食水果,記者好奇水果都要試食?阿聰笑說︰「水果唔平㗎,大部分都係日本貨,一束巨峰提子都賣百幾蚊,唔畀人試吓,人哋點會放心買呀?」
走近一看,百多呎的店面擺放了各式各樣的水果,一面專放來自日本的水果,有巨峰葡萄、靜岡密瓜;另一邊則放着夏威夷木瓜、泰國芒果等,阿聰說︰「雖然鋪面面積唔大,但都放到有七、八十款水果,一半係嚟自日本,另外係嚟自美國、新西蘭、泰國及中國等地,我試過好食就會入貨。」
30歲的阿聰一談起水果便說個不停,原來算起來,他與水果打交道已有十多年,「 16歲嗰年,想搵份兼職賺吓錢,老豆喺果欄做運輸,於是咪去幫手搬搬抬抬囉,自己讀書成績又唔好,中五畢業後就全職去做。」

3字頭博一鋪

13年便踏入 3字頭的阿聰,想趁年輕博一博,出來創業,「覺得冇理由打死一世工,始終搬貨搬唔到成世,自己成日對住啲水果,就諗住開水果檔,不過點 run法真係唔熟,於是去果欄嘅果檔打工,日頭執水果、夜晚就做買手,摸清個行情先,點同客傾生意都係技巧。」
阿聰找來朋友合資,但創業之路一起步已經碰釘,「順利嘅話, 5月時已經開到鋪,當時果欄裏面有個吉鋪,都傾得七七八八,但臨交吉嗰日業主先話唔租,因為同佢熟之前冇簽到約,嗰刻真係呆咗,要入嘅貨都準備好,惟有嗱嗱聲賣畀其他果欄,蝕咗幾萬蚊。」
經此一事,並沒打消阿聰的創業念頭,決定再接再厲,在 7月找到新鋪位後火速開業,「果欄入面冇人放租,咪周圍睇吓,咁啱見到對面馬路有個鋪位放租,即刻搵業主傾,傾啱價仲即場落埋訂,之後傾埋拎貨、裝修,兩個星期就正式開張。」


巨峰提子$150/束 

岡山香印青提$228/束 

靜岡密瓜$268/個

北海道南瓜$48/個 

日本番薯$28/包 

供應商靠唔住

進濤菓欄主做零售兼批發,但內地市場發展畸形,令阿聰頓覺生意難做,「最初係賣內地貨,做落原來要自己包裝,盒、貼紙都係成本,同預計嘅唔同,加上內地嘅供應商會跳過我哋啲批發,直接供貨畀零售點,咁變相爭客,好難搵食。」
在阿聰心灰意冷之際,有朋友搭路進口外國水果,「之後有朋友帶我去泰國山區睇水果,發覺嗰邊市場健康,個個只係做好自己本分,供應商唔會走去搶批發商嘅客,返到嚟諗過轉型賣外國水果,朋友話有批高檔嘅日本水果,問我有冇興趣要咗佢,心郁郁之下決定博一鋪。」

日本貨有市場


咁啱行過嚟望吓,覺得水果款式幾多,而且有得試食,買咗橙同西瓜。陳生與陳太客人 

在完全不知銷情如何的情況下,竟發現高檔進口水果大有市場,「日本水果貴內地貨最少 4、 5倍,我都驚啲客唔會買,不過出到嚟嘅效果好好,生意額好過以前,發覺日本貨好多客 buy,消費群幾大,開業冇耐就撞正中秋節,用日本水果做禮盒、果籃好受歡迎,嗰個月做到十幾萬生意。啲客又問會唔會入其他國家嘅水果,於是我就入多啲唔同產地嘅水果及款式,最初唔夠 10款,到𠵱家有成 80款。」

 


採訪當日,阿聰即刻切了一個日本奇異果給客人試味,他認為日本水果價格貴,應讓客人試清楚味道,這樣為店鋪建立口碑。

有說日本食品受輻射影響,阿聰並不擔心,「我向供應商攞貨,貨源唔係來自輻射區域,加上水果通過晒入口檢定,都有客問我有冇問題㗎,我照樣咁答佢,點都要信香港政府。」
油麻地果欄雖是買賣水果的集中地,但在這裏開水果店,突圍而出也要費一番工夫,「傳統果欄唔使做宣傳,尤其係做咗成百年嘅老字號,大把熟客自動搵上門。自己啱啱新開,呢方面比較輸蝕,惟有諗吓有冇新出路,搞團購、開 facebook專頁,有新貨就影相放上去,啲客仲可以用 WhatsApp訂貨。呢啲都係大趨勢,𠵱家有大約 10%至 20%嘅客喺經 facebook搵返嚟。」

24小時送貨


店內有個冷藏庫用來保存水果,阿聰說溫度最好保持在 4度至 6度之間。 

進濤菓欄主賣日本及各國直送水果,運輸出身的阿聰,善用自己的優勢,推出 24小時送貨服務,「水果冇咩獨家,好賣自然有其他人入貨,只可以靠服務取勝。果欄夜晚約 8點收鋪,但夜晚都有班客想食新鮮水果,我哋間鋪就開 24小時及推出送貨服務。間鋪對正窩打老道,好多車行過都會望到,咪當賣廣告囉,即使 100架車經過得一架停低買水果都係生意,試過真係有幾個客揸部林寶堅尼嚟買巨峰提子㗎。」
送貨服務會收取運輸費用,由$40至$250不等,視乎數量及產品而定。阿聰笑言試過晚上送貨,竟談成一筆大生意,「試過凌晨 3點,我送日本西瓜上渣甸山,上到去個客話估唔到我真係送過嚟,講咗幾句,佢仲話遲啲介紹生意畀我,我當時聽咗就算,點知隔咗冇耐個客真係聯絡番我。原來佢係一間公司嘅老闆,有成 400名員工,叫我每日送水果去佢間公司,真係估唔到。」
現時進濤菓欄客路除了街客、批發給其他水果店外,亦有不少寫字樓訂單,「嚟緊會去其他國家入口更多嘅水果,仲會諗吓點宣傳自己,自己仲有成頭家要養,唔諗多啲計唔得呀!」

先視察貨源

阿聰表示與供應商打交道,要留點餘地,「唔好嗱嗱聲畀晒錢落訂,有時你同供應商訂 10款水果,佢未必畀足你,佢有可能先供貨畀超級市場等大客,咁你就唔夠貨畀客人。所以同供應商合作,要一定嘅時間磨合同觀察,如果可以畀你去親身視察埋個貨源及工作地方,規模有番咁上下自然比較可信。」


開業初期,阿聰曾到泰國找尋貨源,還在當地坐了 6、 7個小時車去泰國山區,察看水果的質素。 

雖然日本水果佔了貨源一半以上,但阿聰為了增加吸引力,還為店鋪引入其他產地的水果。 

蒙古西瓜$170/個 

哥倫比亞麒麟果$85/個 

開業成本︰

租金(兩按一上)︰$45,000
裝修︰約$100,000
入貨︰約$155,000
總投資︰約$300,000

每月收支︰

租金︰$15,000
人工︰$80,000(5人)
入貨及雜費︰約$210,000
營業額︰約$350,000
盈利︰約$45,000

 

進濤菓欄
油麻地新填地街 222號 B1
6383 8002


撰文:曾志恒 
攝影:傅新發

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()