Nova(右一)彈起結他上來台型十足,論 rock味絕對不輸給男仔。 

U撈

搖滾乖女

藝人的工作時間可能比尋常工作多,身為樂隊組合 Choco成員之一的 Nova,在舞台上搖滾發熱發亮,在台下卻是大學生一名,雖然工作接踵而來令她透不過氣,但為了完成父母心願,她沒有因為發展演藝事業而放棄學業,是名副其實的乖乖女。

 


Nova在校內也不忘推動本地音樂,去年她便參與大專聯校樂隊巡遊組織,在各大專院校舉辦音樂會。 

於嶺南大學主修心理學的 Nova,是大明娛樂旗下女子唱作組合 Choco的成員之一,她負責彈結他,採訪當日她跟隊友在位於尖沙咀的酒吧進行表演,當時場內氣氛非常熱烈。
Nova中學時已經接觸音樂,玩搖滾樂是她自小的夢想,「中二時,屋企人安排我到屋企附近嘅琴行學古典結他,學學吓見到琴行內其他大哥哥玩電結他玩得好有型,而且啲聲好勁,同古典結他好唔同,之後我同屋企人講想轉玩電結他。最初媽媽有少少反對,覺得電結他好嘈,但佢見我咁堅持想學,就慢慢由反對變成默默支持,我一玩就足足 7年。」

曾為學業退出


加入 Choco後, Nova(右一)有更多機會踏足不同的表演舞台,今個月她跟 Choco到銀礦灣沙灘音樂節演出。 

學有所成的 Nova一直在地下音樂界打滾,但也曾經因為學業退出樂隊,「出道前,我一直同 Choco原班人馬夾緊 Band,但之後我要應付高考,所以就退出咗冇玩。到我考到上大學之後,有公司簽佢哋打算出碟,佢哋就搵我歸隊,嗰一刻真係好感動,所以我就答應咗。」
Choco於 12年正式出道,同年於新城電台獲得新城勁爆新登場樂隊獎,過去一年已經演出超過 50場,「出道後多咗好多演出機會,令我哋可以踏足唔同嘅舞台,當中最難忘係今年我哋去機場博覽館出 HKTV搞嘅 show,當我哋表演緊時,舞台嘅升降板將我哋升起,即時成為全場焦點,呢種感覺係以前玩地下 show體驗唔到。」

獲支持感溫暖


Nova  21歲 嶺南大學主修心理學 Yr.3 

出道獲家人和朋友支持, Nova內心感到非常溫暖,「喺學校同學都好支持我,就連 tutor都知道我忙,有時功課遲咗交都冇扣我分,仲叫我加油,真係好感動。每次出 show,爸爸都會帶埋相機嚟支持我,令我玩得更加好,希望將來可以更多人認識我哋。」

兼顧夢想學業

問到 Nova有否想過放棄學業,全力發展演藝事業時,她表示:「我答應過屋企人一定會完成個學位,所以我從來冇諗過放棄讀書。雖然經常朝早 9點上堂,夜晚放學要出席活動或者錄音,到凌晨先可以返 hall休息,真係好攰㗎,但為咗完成學業同夢想,幾辛苦都值得!」

想成為歌手?

如果你自覺音樂造詣不凡並想成為歌手,可以先預灌錄一首 Demo,然後以自薦方式寄到各唱片公司。亦可以把 Demo放上互聯網及 YouTube,利用網民力量,吸引社會關注,如網絡歌手 Kellyjackie和 Robynn and Kendy就是紅遍網絡後,受到唱片公司青睞,並得到歌手合約。


撰文:何倬然 
攝影:彭自維
部分圖片由被訪者提供

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()