Steven參與過廣告及電影的製作,雖為後製人員,但靈感對他來說亦很重要。他平日隨便行走於都市及郊外之間,都有助啟發他的靈感及吸收嶄新的想法。 

青雲路

電影與廣告之間

一個廣告、一段短片、一部電影,當中的每個畫面、每個情節都有賴剪接師運用自己的藝術觸覺,將不同的鏡頭組合,製造不同的節奏與場面氣氛,刺激觀眾眼球之餘,亦表達自己所思所想,這便是剪接師的工作。
今年 25歲的 Steven,先後在廣告及電影後期製作公司工作,嘗試過不同的崗位,接觸的層面由一間剪接室、到整個拍攝製作,遇上不同的合作對象,他學習到妥協、磨合與溝通,讓他可走更遠的路,找到自己的壯闊天空。

 

訪問當天, Steven正在做相機廣告的剪接,記者參觀了他的剪接室,小小的獨立房間內五臟俱全,除了兩個大屏幕外,亦有不少錄音器材及影片錄像參考資料。「我細細個已經好鍾意睇電影,會剪低啲海報或者新聞貼起,直至自己報讀 IVE嘅廣告設計,先真正接觸到拍攝及後期製作,就更加肯定自己喺呢方面嘅興趣。」
Steven畢業於 IVE的多媒體廣告及視覺特效系,其間曾經參與過流動短片節比賽,「我同兩位同學拍咗一條 3分幾鐘嘅微電影式短片,拍攝同剪接都由我一手負責,最後段片拎到優異獎,仲喺學校公開放映,我哋勁開心呀!同埋清楚自己嘅定位,發覺自己可以透過剪接,畀人睇到自己嘅諗法。」
09年 11月, Steven加入後期製作公司,擔任剪接助理,「入職頭 3個月都係學點樣剪菲林片,會用一部菲林剪接機及菲林膠水去剪一啲作廢咗嘅影片膠片,當時上司講過:『影片由好多格菲林組成,所以每個想做真正剪接師之前,都一定要了解菲林每一格嘅重要。』我一直記住,即使到𠵱家用數碼拍攝及剪接,我都會好小心,因為冇咗一格菲林,人物嘅動作就會變得唔流暢。」其後 Steven接到幾個用菲林拍攝的洗頭水及護膚產品廣告,他很慶幸有此實戰經驗。


Steven於廣告後製公司時的工作主要是協助剪接師為剪接好的片段加上特別效果,如 11年 Hong Kong Airlines的功夫廣告中,空姐多手的功夫效果便是出自他的手筆。 

Steven在日清食品( Pirikara)的廣告中使用了大量動畫表達,近日在電視中亦可見。 

Nikon相機廣告片段由攝影師在德國拍攝,再由 Steven負責剪接。 

去年 Steven負責迪士尼黑色世界廣告製作特輯的工作,並與身為女主角的 Angelababy合照。 

欠準備被鬧

到了 11年 9月,自言愛新鮮感及親力親為的 Steven,轉去一間廣告電影後製公司的電影部工作,「我好想試吓參與電影後製,咁難得有機會,梗係想試吓啦!」 Steven擔任電影剪接師,參與過《東成西就 2011》、《大追捕》及《 DIVA華麗之後》等的後製工作。
「一開始我負責剪預告片,我要全套片睇晒,之後再同導演開會,記得剪《大追捕》時,因為我自己準備得唔夠好,之前一晚有嘢做通頂,未睇晒套戲,對套戲嘅場口及脈胳都唔清楚,導演問我邊一場最深刻最難忘,我答唔出,之後就俾人鬧。但我明白導演係要確保每個參與嘅人,都要知道自己做緊乜同埋要有投入感,所以之後做嘢我都會更加謹慎!」
剪接師的工作就如將散落一地的積木,重新組合,剪預告片前,導演會跟剪接師先說明故事大綱及當中的起承轉合,再交給剪接師做剪接工作。整段片的節奏快慢,畫面感覺都由剪接師控制,然後讓導演提出意見,再作出修改。


Steven負責剪接電影《大追捕》的預告片,張家輝上樓梯的一幕,他用了 cut away shot(插入鏡頭)交代時間流逝,獲導演接納。 

《東成西就 2011》是 Steven第一個參與的電影預告片製作。 

2011年湯唯為 Pantene潘婷水漾乳液修護廣告錄音, Steven亦負責此廣告的後製工作,並一起合照。

堅持與妥協


廣告製作要與客戶溝通, Steven曾參與迪士尼黑色世界的廣告製作特輯工作,由於他參與整個製作,有與客戶溝通經驗,上司梁禮信因此聘請他任助理廣告製片。梁禮信廣告製作部主管Steven為人比較內向,但相處耐咗,就發覺佢都有好多創新嘅想法,從佢所剪接嘅作品入面,可以睇到佢獨有嘅語言,對我嚟講都幾新鮮! 

「雖然剪接師有時會對畫面上有堅持,但又唔可以太主觀,要用建議嘅方式去同導演溝通,喺《大追捕》嘅預告片中,好似張家輝上樓梯嘅一幕,我用咗 cut away shot(插入鏡頭)交代時間流逝,導演一睇就話會唔會閃得太快,觀眾會睇唔到,我就要同佢解釋,有時某啲手法會更有效交代篇幅不宜太長嘅情節,佢諗咗幾日覺得 work,就畀我咁剪,唔係次次都咁順利㗎,有時自己都要妥協。」 Steven會尊重導演的決定,因為導演才是整部電影的靈魂人物。
Steven工作的廣告電影後製公司到 12年中開始轉型,以接廣告工作為主。「 12年接咗迪士尼黑色世界嘅製作特輯,第一次由前期構思、拍攝及後製都係自己一個完成,有好大發揮空間,好開心可以接到呢一個 project。我知道製作單位嘅場景唔大,所以我就會集中 close up人物嘅化妝及服裝,重點係狼人同殭屍嘅造型,同埋我亦都會集中喺道具同舞蹈動作方面,拍攝得細緻啲。加上兩大主角會有一大段對白,所以其他鏡頭我會主力放喺側邊嘅 dancer同工作人員身上,其實佢哋做嘅嘢都好有視覺效果。」

廣告重溝通

隨着公司所接的廣告慢慢以資料性宣傳片居多, Steven決定再次找新挑戰,他現為 4As廣告後製公司 JWT的助理廣告製片,主要負責與廣告客戶溝通、廣告剪接工作及效果製作工序等。
「我覺得電影同廣告嘅最大分別,電影係 focus喺某段時間內,放大去營造一個場面的節奏及氣氛;廣告就要喺有限時間內交代一啲有用資料。因為試過參與前期工作,覺得廣告係人與人之間嘅溝通,我想自己變得全面啲,𠵱家多咗同客戶交流,會識喺唔同角度去考慮一個廣告製作。」 Steven現參與更多類型的廣告製作,如以動畫佔多的日清食品( Pirikara)宣傳片及相機廣告等。


學生時期, Steven(左三)與同學合作拍攝,他擔任攝影師及負責剪接工作。 

Steven在學期間,曾跟兩位同學參與流動短片節,拍攝微電影式短片,講述自己對青春的看法,表達一個苦澀的成長歷程,從而衍生出逆向和極端思維,令觀眾有所領悟。拍攝和剪接都由 Steven負責,最後獲得優異獎。 

點入行?

Steven因修讀廣告相關課程,對一般拍攝及後製程序有一定的認識,所以較容易入行。對廣告行業有興趣人士,可先修讀與廣告相關課程,了解有關行業及工作內容,再從 Marketing製作公司或 Casting公司做起。

課程資料

課程:全方位 Digital Video
攝錄剪接增值課程
機構: Feva Works
堂數: 12堂
費用:$2,980
內容:課程中會教授 Adobe Premiere Pro CS6及 Adobe After Effects CS6這兩個剪接程式,並特別編制課程,透過不同練習,讓學員輕鬆地製作出不同專業的作品,並結合於日常工作或生活上。
查詢: 3106 8211

晉升階梯

製作助理(1至 2年經驗)
$10,000至$13,000

助理監製(1年半至 2年經驗)
$13,000至$16,000

監製(3至 5年經驗)
$16,000至$20,000

後記:高登巴打

閒談之下,記者發現斯斯文文的 Steven,原來亦是一位高登巴打!平日會上高登留意各類消息及文章,他更坦言喜歡自己一個在剪接室剪片,果然一個人更開心,所以很適合當獨立的後期製作人!其實記者也擁有一個高登 account,但從未使用,可能記者喜歡戶外工作,「宅」味不濃,所以才做不成「絲打」吧!


撰文:霍芷晴 
攝影:彭自維 
部分相片由被訪者提供

tvb4life 發表在 痞客邦 留言(0) 人氣()