專題 Log In

平民 Wagon再上市  Hyundai i40 Wagon& Volvo V40 T4

旅行車一直以嚟都係房車嘅附屬品,差唔多所有旅行車都係由四門房車演變而成,而且早年引入香港嘅旅行車,大多係商業用車,即係根本冇設備可言,只要尾箱放得多嘢就得。不過近年旅行車已經成為潮人、型人嘅座駕,甚至富貴人家都 buy佢。久而久之,市場上又平又正嘅旅行車買少見少,日本車全軍覆沒、德國車除咗 VW Golf Variant外,部部都話過 30萬先有交易,平民百姓想平玩旅行車,選擇少之又少。幸好最近 Volvo引入車廠中最細嘅旅行車 V40,車價只係 28萬有找,外形、定位、設備都夠晒噱頭,完全走出以往老土旅行車框框!市場上差唔多價位又有型有款嘅旅行車只有 Hyundai i40 Wagon,今次將兩車集合一齊,睇吓兩款唔同風格嘅平民旅行車邊部啱你?

 

旅行車就只係一部拉長咗車尾嘅房車? Volvo係北歐瑞典車廠,當地對旅行車需求大到嚇死人,日子有功下, Volvo根本就已經係首屈一指嘅旅行車專家。 Volvo乜嘢 size嘅旅行車都玩過,不過好似 V40咁短車身實在係第一次,因為嚴格嚟講 V40都唔似旅行車,似揭背車多啲!同場嘅 i40竟然更似正宗旅行車。


V40V40頭燈圓渾,內裏組合亦唔算突出,比較特別係泵把條狀日光燈。 

i40i40頭燈內有波浪形 LED日光燈,型爆! 

美感十足破傳統

Volvo嘅旅行車畀你咩印象?大大部、方形車身、大食冇力?事實上,近年全世界嘅旅行車都大革新,唔再求其搞長個車尾就算。 Volvo今次呢部 V40屬於全新設計,嚴格嚟講係一個獨立車系,根本冇房車版。冇房車版包袱,外形設計自然可以更放,車長只有 4,369mm,會比現最流行嘅 Golf長 114mm,但又比 Golf Variant短 165mm。咁樣尺碼令 V40可塑性頗高,你大可視佢為微型 wagon,又可以係大型 Hatchback。同場兩部車 V40同 i40都有非一般 wagon外表, V40雖然細,但車尾用咗剛勁線條尾燈,貫徹硬朗本色,惟車頭採用較圓渾設計,同車尾唔係太一致。
反觀 i40由頭到尾都採用銳利線條,車身腰線一氣呵成到車尾,筆者甚至認為佢係市面上最靚旅行車之一,比歐洲車更富美感。


V40車尾設計遠比車頭靚。 

i40由於屬中型車級別,所以車尾有電鍍裝飾。 

大賣對手 VW Golf Variant

正當歐洲旅行車愈賣愈貴,只得一款 VW Golf Variant可以做到三十萬以下車價,車價低至$228,800起,成為市場最平歐洲旅行車,去年尾推出即爆紅! Golf Variant仍然係 6代款式,配 1.4公升 turbo引擎及 7速 DSG波箱,有 120匹馬力,好啱小家庭使用。

Spec.  Volvo V40 T4

引擎: 1,596c.c.直四 turbo
馬力: 180hp/5,700rpm
扭力: 24.5kgm/1,600-5,000rpm
傳動: 6前速自動、附+/-模式
懸掛:前麥花臣支柱、後多連桿
車身: 4,369× 1,783× 1,420mm
售價:$279,800起
查詢:維信汽車( 2927 3388)

Spec.  Hyundai i40 Wagon

引擎: 1,999c.c.直 4
馬力: 177ps/6,500rpm
扭力: 21.7kgm/4,700rpm
傳動: 6前速自動、附+/-模式
懸掛:前麥花臣支柱、後多連桿
車身: 4,770× 1,815× 1,470mm
售價:$268,000起
查詢:仁孚行( 3428 8288)


表板有 3種變化,但唔會影響行車表現。Elegance 

ECO 

Performance

設計獨特展科幻

以車身尺碼計, V40雖然冇同級對手,但由於始終係車廠一個新嘗試,所以多方面都用上新設計,務求令買家耳目一新,代理喺筆者試車前都再三提醒有多項新嘢,要試真啲。首先係表板,首次放棄實體指針表,中間大圓表可分別以 Elegance、 ECO及 Performance 3個模式顯示,模擬出表板指針,連反光位都做埋,立體感十足,而兩側嘅直條形儀表都會改變顯示項目,莫講話比以往 Volvo出品年輕多倍,連出名多花臣嘅日本車都唔及佢。此外,前後座上方都有一盞細小 LED燈作為車廂氣氛燈,共有 7色選擇,玩味同以前差好遠!當然中控台仍然用最出名中空式設計,所有按鈕都井井有條, i40唔及佢。
其實 i40車廂設計一啲都唔差,或者因為係歐洲設計室出品,一啲老土味都冇,遮住個軚盤章一定冇人知係韓國車,而且仲有埋電子泊車手掣同 Auto Hold功能,高級嘢!


V40車身短小,其實似揭背車多過旅行車。 

V40中控台有 Volvo家族特色,一望就知 Volvo出品。 

i40出自歐洲設計室嘅車廂係唔同啲,冇晒老土味。

空間有別 都實用

旅行車最重要係車廂空間要足夠, V40同 i40基本上係兩部唔同尺碼嘅車,所以車廂空間冇得鬥, V40一定輸,但如比較揭背車, V40就出色得多,後座頭部空間足夠,而且因為採用一整幅天幕車頂,令採光率大大提高,坐喺度視覺上可以同 i40媲美!當然如要比較實際後座空間, i40先至勁,膝部位置空間足可以同 M-Benz E-Class Estate相提並論,而且天窗可以開啟,同大自然盡情接觸。
車尾箱方面, V40其實冇乜特別設計,但原來都有 324L容量,有需要可摺後座,得出更大平坦空間,對比同門嘅旅行車, V40只係輸少少。 i40就唔同,本身係中型 size,連尾箱都大過人,正常情況下有 553L容量,而且活動層架有埋寵物網,唔使另外買,愛狗人士必 like。


V40V40雖然似揭背車,但後頭部空間唔錯。 

i40i40後座直頭係寬敞啦,同歐洲中型車有得比! 

V40V40前座用料及手工都上乘,一貫 Volvo質素。

i40i40前座承托力唔錯,而且有埋電動調校。 

V40兩部車嘅尾箱空間冇得比,但 V40勝在可以摺到完全平坦。 

V40其實 i40天窗比 V40天幕仲會大一啲,但中間有橫桿,比較煞風景。

i40 

V40車內倒後鏡用冇框設計。 

首飾箱可以變成冷風櫃。

天窗前方及後方都有車廂氣氛燈,共有 7種色選擇。 

i40 

小鋼炮對大龍船


雖然兩車馬力輸出接近,但 V40有更強低轉扭力,一起步已可拋甩 i40。 

一直 Volvo都好少話自己啲車高性能,今次 V40都一樣冇大事宣揚,但其實實力都唔弱,暫時只引入 T4版本,採用 1.6公升 turbo引擎,馬力達 180匹,即介乎 Golf GT及 Golf GTI之間,而呢 180匹馬力及 24.5kgm扭力就靠 Power Shift 6速雙極力子波箱發揮。論引擎輸出及波箱配置,都比 i40嘅 177匹馬力、 21.7kgm扭力及 6速自動波箱強,而事實上行車表現都大有分別。
喺鹿頸一帶試車,發覺 V40油門都幾敏感,容易令車身彈出起步,靜止起步表現比 i40強好多,相信同 turbo引擎喺低至 1,600rpm就有最大扭力有關。不過 V40中、尾段加速力明顯放緩,冇早段咁亢奮。 i40就表現得平順,少咗啲火氣,而且懸掛同底盤都較斯文,唔及 V40咁 sporty。

 

 


V40Turbo引擎有出色低轉表現,惟高轉表現偏軟。 

i40i40引擎同房車版共用,有 177匹馬力,表現中規中矩。 

 

 


雙極力子波箱表現快而且順。 

用傳統 6連自動波,勝在可以喺軚環操作+/-波。 

總結 平價抵玩


i40比 V40大足一個碼,但價錢更便宜! 

兩部車各具吸引力! Volvo V40唔使 28萬已經有相當動感畀到用家,而且亦有旅行車實用性,呢個價大概只貴 140匹嘅 Golf GT兩萬,但馬力同空間都更多得着,仲唔抵晒?而 i40就更加唔使多講,輸出及空間都接近 BMW 520i Touring級數,價錢只係一半!只要你唔好將品牌價值放到咁大,足可慳廿幾萬!


撰文:袁國基 
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()