新車激試

遲到 37年  VW Golf GTI Cabriolet

舊年 8月 VW趁第 7代 Golf仲未嚟香港,陀地旅行車又大熱,於是就大劈價賣第 6代 Golf Variant,平到$23萬就可以做車主,成功賣到一街都係。見到咁好成績當然食住上,見陀地市場一直缺乏高性能平價開篷跑,就算係已經出咗第 7代 Golf,但都照樣引入第 6代嘅開篷版返嚟,而且更是 Golf 37年嚟第 1部以 GTI做基礎嘅開篷車,雖然賣到 37萬比尾期嘅 6代 Golf GTI要貴多 3萬,但已經平過其他開篷車一大截,唔只係電動軟篷兼實用 4座位,仲要有埋 GTI嘅實力,食正一班又要威又要爽仲要平嘅貪心車主, Golf GTI Cabriolet一次過滿足你 3個願望。

VW Golf GTI Cabriolet Spec.

引擎: 1,984c.c直 4 turbo
馬力: 210ps/5,300-6,200rpm
扭力: 28.6kgm/1,700rpm-5,200rpm
傳動: 6前速 DSG,附+/-模式
車重: 1,555kg
車身: 4,258× 1,782× 1,414(mm)
0-100km/h: 7.3秒
油耗: 7.7L/100km
售價:$369,880
查詢: VW Hong Kong(3698 9860)

 

雖然 Golf已經出到第 7代,但並唔係每代都有開篷版,只喺 79年第 1代同 99年第 3代先出現過,隔咗 3代 13年之後,第 6代先再次出現開篷版,但唔同嘅係以 GTI作為基礎開發,唔似之前用普通版變,所以無論是外觀同性能方面其實吸引力遠勝從前。

矮車身跑感強

話明係 6代 Golf GTI開篷版,所以外觀方面基本上係冇變到,繼續保留經典雙紅間鬼面罩同泵把兩側貓爪形設計連直立 LED燈,仍然係一貫 GTI嘅惡相辣樣。不過換咗雙門設計線條更加靚之餘,仲比揭背版長多 33mm,高度又降低咗 55mm,而且前後車軸分別低咗 22mm同 15mm,成部車更加貼地,望落更加修長同有動感。另外, Golf GTI Cabriolet有白、碳纖鋼灰、灰、銀、黑同紅色, 6種車身顏色選擇,但就一律只可配黑色軟篷頂,所以筆者覺得紅黑呢個配搭其實都係最有跑味。


雖然已經出咗第 7代,但筆者覺得 6代嘅立體粒狀 LED燈更加有型。 

GTI電鍍車章襯蜂巢式鬼面罩,賣相更凶狠。 

同 GTI一樣用 18吋梅花合金車軨。

軟篷選擇少

今時今日仲用緊軟篷嘅開篷車真係買少見少,日本車只得 MX-5,而歐洲大部分車廠都轉咗用電摺硬頂,貪唔開篷又可以有硬頂形態,一車兩用,唔係話唔好,但關篷時同硬頂版一模一樣,其實反而係失去咗開篷車獨有嘅品味同特質。而且仲要好似 Golf GTI Cabriolet咁平靚正,真係搵唔到。

豪華設備  Audi A5 Cabriolet

雖然用 1.8公升 TFSI引擎有 170匹馬力比 Golf GTI Cabriolet少 40匹,但設備更齊,有 Comfort Key免匙啟動系統、電動前座椅、藍牙免提通話、電子手掣同前後泊車警示器。車價$479,800

玩樂儀表  MINI Cooper S Cabriolet

標榜玩樂性格嘅 MINI,喺車廂度增加咗 Open Timer儀表,電動軟篷 15秒開或關篷時會喺度倒數,仲識累計開篷行車時間,夠晒搞鬼。不過 MINI Cooper S Cabrio車長只有 3,714mm,比 Golf GTI Cabriolet短 544mm,所以後座空間未夠充裕。車價$406,800

開篷甲蟲  Beetle Convertible 1.4 TSI

同屬 VW嘅 Beetle Convertible,新款今年 5月抵港,體形比以往變得更扁平,但依然保留圓圓嘅車身,形象經典。而且開篷時間只需 9.5秒,拍得住 Golf GTI Cabriolet;加上 1.4公升雙增壓引擎,可以爆發出同 6代 Golf GT相同嘅 160匹,鍾情 Beetle外形又追求駕駛樂趣嘅車主唔會失望。車價$349,800

極速 9秒開篷

Golf GTI Cabriolet嘅電動纖維軟頂配合電動液壓臂,只需要 9秒就可以打開篷頂或 11秒關篷,速度比其他硬頂開篷車快一倍,而且時速 30km/h以下都可進行操作。最緊要係關咗篷之後即使高速行車,風噪聲同路噪聲都可以抑制得好低,完全唔會覺得嘈。另外, Golf GTI Cabriolet嘅軸距同第 6代相同,令到後排座位仍然有唔錯嘅空間,就算成年人坐都唔使屈腳,而且尾箱仲有成 250公升容量,實用性遠勝其他開篷車。惟獨車廂布局與揭背版完全相同,少咗新鮮感,而且冇咗電凳,調校椅背角度時要扭掣比較麻煩同費力;但其他設備包括如左右獨立恆溫冷氣、 7吋屏幕、泊車鏡頭同真皮前座有加熱功能,已經應有盡有。


大量紅色縫線加黑皮內籠,跑味已經出晒嚟,仲有用電鍍裝飾提升質感。 

雖然冇電凳,但幸好承托力相當好,包覆性亦夠強。 

後座空間絕唔係 BB座,大人坐一樣冇問題,但可惜冇獨立冷氣。

尾箱可以放平後座,令到中間有更多位可以擺嘢。 

表板中央屏幕用中文顯示,行車資訊更清晰。 

配泊車鏡頭,透過 7吋高清輕觸式屏幕可輕鬆泊車。

拉一拉尾箱側邊嘅掣就可以放平後座。 

唔似其他開篷車將按鍵設喺車頂,而喺波棍後方。 

油門同煞車用咗電鍍金屬踏板。

底盤加強更好彎

沿用 6代 Golf GTI嘅 2.0公升直 4 TSI引擎,雖然馬力同為 210匹,但由於車重增加咗 95kg,要 7.3秒先至完成 0-100km/h加速,慢咗 0.4秒,起步方面略為遜色,不過之後嘅加速同行車表現就同硬頂版冇分別,同樣段段爆住上;特別係同好拍檔 6速 DSG波箱依然配合得天衣無縫,轉波速度相當迅速,尤其喺用撥片轉波時充滿動感,盡顯 GTI本色。
而且底盤經過加強,車頭同車尾加裝咗鋼條,令到整體車身嘅抗扭性大大增加,再加上車身重心更低,配合 XDS電子差速鎖保持出色嘅循跡性,其實喺過彎嘅支撐性同傾斜控制力甚至比硬頂版仲要優勝,表現相當平穩,俾到駕駛者更大嘅信心。
不過講到底,其實駕駛開篷車始終是一種態度,無論開唔開篷,去到邊都一樣係亮點,代表咗車主嘅品味。


28.6kgm扭力喺 1,700轉時就可爆發,加速力十分充裕。 


撰文:余頌達
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()