潮𡃁便當

入秋好芝味

芝士的魔力等同生蠔,喜歡的人極喜歡、不喜歡的人掉頭跑掉,除了典型芝士國度 pizza及 burger,最近新開芝士撈丁、免治撈飯;甚至出爐新零食、 food court新貴都有兩大芝心小食醒畀大家,壓軸請教我哋食版監修 Michael,推介佢心水芝士店。
新店或舊店、飽肚或過口癮,通通齊晒。

芝士╳撈丁 週末撈一撈

提起芝士撈丁大家都會諗起尖沙咀香檳大廈那一家,最近旺角染布房街亦有新貴冒起,擠身一間串燒店之內,逢星期六、日下午才撈一撈,招牌撈丁重點在於用上水牛芝士、車打芝士以及重口味藍芝士 3種芝士撈成,後者更是靈魂所在。煮好麵,鋪上厚重芝士,再來火槍一燒,入口濃郁到爆芝士香,套餐叫還有 2款串燒跟,當中仲有一款芝心丸,芝味 double up。芝士撈丁食點又多一個!


芝士迷更可配燒芝心丸,雙重芝士打孖上。 

芝士撈丁配燒冬菇及豬頸肉$56藍芝士特濃香味未食已經聞到,芝士濃郁漿住嘴仔,一試愛上。 

食客 周先生 機電好鍾意食芝士,嗰次朋友介紹嚟呢度試撈丁,好夠芝士味,逢星期六放工都嚟!

 

三重芝士撈丁
旺角染布房街 8號地鋪
( 5689 8997)
營業時間:星期六及日: 11:30am-4:30pm

check! 芝味一二事

芝士一般可從奶類細分,牛奶、羊奶、水牛及山羊等,軟硬度分 soft、 pasta filata、 semi-soft、 washed、 hard等。
通常濃芝士如山羊及羊奶可配紅酒,水牛或牛奶則夾白酒。若論鍾愛芝士的程度,首推法國及瑞士人。

芝士╳外賣撈飯 學生時代飽飽飯

鴛鴦雙焗是學生時代常餐,芝士番茄酸酸味味配搭總令人回味。開業一個月多的免治撈飯,免治為主打,以澳門葡國特色的乾免治及以澳門葡國臘腸的碎蛋包具特色,不得不試。除此之外,芝士番茄免治撈飯及芝士咖喱免治撈飯同樣有睇頭,以豬腩肉及梅肉兩個部位做免治,目的令豬肉碎腍軟有致,前者棄用茄膏,新鮮番茄入饌,更清甜;後者選用日式咖喱加入大量洋葱蘿蔔熬汁,味道適中偏甘甜, after taste突出。當然,芝士迷還是希望多加一片芝士就好了。


番茄免治爆汁芝士撈飯$43番茄清甜,唔會一味係茄膏味,食得出夠用心。 

咖喱免治爆汁芝士撈飯$43咖喱餘甘突出,配芝士香濃更是一流。 

食客 Ray髮型我喺附近工作,幾乎每日都 take away免治咖喱,唔太辣又甜好味道!

 

免治撈飯
銅鑼灣摩頓臺 13-33號灣景樓地下 6A鋪
( 5689 5788)
營業時間: 11am-9pm

check! 滾地芝士大賽

英國人對芝士的狂熱雖然及唔上法國人同瑞士人,但每年在英國格洛斯特(Gloucestershire)
的庫珀山(Coopers Hill)都會舉行一個滾芝士大賽,比賽至今約有 200年歷史,追到芝士者為之 win。
但由於要在長命斜上追逐,所以經常都聽到參賽選手變滾地葫蘆受傷。

夾心芝士×丹麥條 脆爆丹麥條

觀塘 apm food court經過一輪裝修,終於在 9月 3日重新營業,並多了一系列新入主食店,其中之一是來自日本的 danish Bar,香港首間分店 6月在將軍澳先行立戶,然後是銅鑼灣時代廣場,再到現時的 apm。有售丹麥條、丹麥球及雪糕等。開店初期,日本方面更有專人親自示範製造丹麥條及丹麥球,粉糰一早在日本整定,來港後因應需求在店內經過解凍、發酵、烘焙等過程,食到新鮮又正宗日本風味。丹麥條口味較多如綠茶紅豆、脆糖、香腸等,最不得不提是芝士火腿,軟硬度 fit晒的表層,內裏芝士呈粒粒狀,分布隨意令進食時而爆出時而咬空,每啖均是驚喜。


芝士火腿丹麥條$16酥皮軟硬度夠 fit,內裏芝士呈粒粒狀,分布隨意,入口芝士時爆時不爆,啖啖驚喜。 

食客 Grace酒店我本身好鍾意食芝士,表皮幾鬆軟,$16來說必定返轉頭! 

 

danish Bar
觀塘 apm 2樓 cookedDeli by city'super
( 3148 1255)
營業時間: 10am-9:45pm

芝士╳夾心 濃漿芝心堡

Food court之內另一新成員御飯屋,講到明提供飯類如滑蛋牛、玉子漢堡等,為芝士迷推介這兒的芝士漢堡飯,因為就咁睇,你完全唔知佢內裏係流心芝士,芝士味道不算濃,勝在配鬆軟漢堡同吃好鬼 match,趕時間都食到餐好!


燒芝士漢堡飯$58漢堡腍軟,「切腹」後中心芝士湧出,睇見就想食! 

食客 Angus售貨員第一次嚟呢個 food court,多咗好多唔同食店揀,價錢 ok! 

 

御飯屋
觀塘 apm 2樓 cookedDeli by city'super
星期一至日: 11am-12mn

芝士╳老外  GREAT Place!

今年 8月在金鐘開店的 great,首設芝士房,由意籍芝士大師主理,有咩芝士搭配問題,請教大師最實際。芝士房 keep住 11度,多達 300多款芝士由羊、牛、山羊、水牛奶製; soft、 semi-soft、 washed、 hard等各種芝士都有,想找芝士配餅乾、麵包甚至開大餐時同 friend邊食黑毛豬邊食芝士,呢度係入貨好地方。



當日試咗呢隻 Manchego w/t Rosemary,來自西班牙,用山羊奶製、硬身,上面加咗好多 rosemary,味道不算太濃。 

 

GREAT
金鐘太古廣場 2期地庫
( 2918 9986)
營業時間: 10am-10pm

芝士╳火鍋 入秋暖暖選

同 Michael提起芝士,他就想起位於赫德道的瑞士餐廳,餐廳由曾在皇家太平洋酒店任職的瑞士籍主廚 Max主理,主打瑞士菜及人人都識的瑞士火鍋,光是芝士火鍋就接近 10隻,最傳統是選用 4隻出名瑞士芝士品牌 Gruyere、 Emmentaler、 Appenzeller及 Vacherin調配而成的瑞士芝士火鍋,芝士味特濃,並加入少量傳統瑞士火鍋必備 kirsch酒,令芝士受熱唔會漿住漿住,其次有為素食人士設計的菠菜芝士火鍋底,冇酒精成分,相對而言冇咁重口味,菠菜蓉混在其中,更別有一份口感,怕芝士味太濃的朋友就適合不過。


Michael講起芝士梗要去喺尖沙咀赫德道的瑞士餐廳,瑞士人主理,芝士款又夠多,入秋火鍋必去! 

傳統瑞士芝士火鍋配櫻桃酒法包$220/人Kirsch酒精成分有成 40%, Max特地調低酒的成分,啱番香港人又能食到傳統瑞士風味,所以食落酒味不強,更傳統地用上較硬身的隔夜包,蘸完芝士味道複雜到難以形容。 

菠菜芝士火鍋配雞肉粒法包$240/人菠菜中和芝士味,食芝士火鍋最怕食到膩的顧慮一掃而光。 

烘芝士$106瑞士典型前菜,溶掉 Raclette芝士後刨在碟上,遠望還以為是湯,卻是芝士香氣濃郁的開胃菜,配上蕎頭及酸青瓜仔更醒神。 

 

瑞士餐廳
尖沙咀赫德道 12-14號地下
( 2191 9197)
星期一至六: 11am-10:45pm

check! 新上場芝士零食

一田超市乘着入秋引入不少芝士食品,桃哈多迷必定不能錯過聯同日本一同發售的桃哈多燒芝士青豆脆條,直火焙煎製法加上 3種芝士製成,香脆可口。
其次是上月日本推出的芝士餅味燒曲奇,香脆外層加入車打芝士燒製,內層用上北海道產忌廉芝士,香脆又嫩滑,兩款零食 10月 25日正式在一田同大家見面,必試!

一田超市(沙田/新蒲崗/屯門有售)
( 2694 1111)


芝士餅味燒曲奇$21.8 

桃哈多燒芝士青豆脆條$15.5 

撰文:梁智欣
攝影:黃家活

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()