DC解碼

世界一全片幅無反  Sony Alpha 7

近來唔少 friend對 DC嘅對焦速度已相當滿意,每秒 8連拍、 10連拍,不論打雀、影體育活動定影韓星跳舞都無一遺漏,因而希望提升畫質,最好係相片 noise愈少愈好。要減少雜訊,加大影像感測器絕對係最直接方法,所以繼全片幅 DSLR後, Sony就率先為新推出嘅無反相機 Alpha 7,用上全片幅( full frame) sensor。大大提升畫質之餘,更保持無反相機嘅輕型優勢,絕對令拍友們心動!

 

Spec.
像素: 2,430百萬
感光元件: 35mm全片幅
快門: 1/8,000-30秒
ISO: 100-25,600
拍片: 1080p
連拍: 5fps
屏幕: 3"
體積: 126.9× 94.4× 48.2mm
重量: 474g
售價:$11,990(淨機身)、$14,490(機身連 SEL2870鏡頭)
推出日期: 11月中
查詢: Sony( 2345 2966)

奴 COMMENT

我想換機!
好恐怖呀!全片幅無反仲可以咁細!我都想放咗自己部大機換呢部新機!平時行山去旅行用 Alpha 7我覺得都 ok,而且價格合理。 AF唔係最快,但可以接受吧?唯一考慮係鏡頭選擇唔多,用連接裝置再駁其他鏡頭有少少頭大身細,平衡度要啲時間適應啊!

定價親民 雜訊 bye bye

全片幅影像感測器喺 DSLR那邊已不斷平民化,所以作為首部
全片幅無反 DC嘅 Alpha 7淨機身定價亦只係$11,990,比全片幅 DSLR中較抵玩嘅 Canon 6D定價平近$2,000!當然論畫質 Alpha 7亦絕不輸蝕,佢配備 2,430萬像素全片幅 Exmor CMOS影像感測器同 BIONZ X影像處理器,實試影 model喺膚色同 detail上都完全超越同廠 NEX-6同 7等 APS-C無反。再試影黑暗中螢光棒,更去到 ISO 12,800同 25,600先見到輕微 noise,啱晒想去 concert影歌手散景大頭嘅拍友。


試 ISO記者由 ISO 800開始試拍,直至 ISO 12,800先見到少量 noise,而且更要放大先睇到。影室內、影 concert絕對啱拍。 

試對焦大 sensor要兼顧對焦快絕對唔易, Alpha 7就特別加入快速混合式智能對焦,連拍都有每秒 5張,影小火車算幾快。 

試人像試拍 model膚色紅潤,最厲害係連毛孔、眉毛都完全見到。即使龍友要放大聞相,都應付自如。

機身輕巧 人人識用

全片幅 DSLR畫質係靚,但機身體積絕對比無反 DC大嚿得多,令唔少女拍友卻步。而作為全片幅無反 DC, Alpha 7絕對集兩者之長,望埋去外形只比 NEX-7等 APS-C無反大少少,重量更只得 474g,比最輕嘅全片幅 DSLR都輕近 200g,日日帶出街 snapshot都舒服得多!而機身操作佢就似同廠嘅 RX系列多啲,用落較啱高階玩家,唔似 NEX系列咁易用。好在佢有 236萬點嘅電子觀景器之餘,更有可作上下調校嘅 3吋屏幕,令專業定入門用家都會搵到自己啱嘅拍法。


拍埋用 APS-C影像感測器嘅 NEX-F3(左), Alpha 7唔算大部,主要係多咗機頂電子觀景器,拎出街都 ok。 

雖作為高階無反,但 Alpha 7都有 3吋反芒,可作腰平方便拍攝,要影高低角度都更易。 

機背按鍵尚算簡單,反而㩒入 menu就略嫌複雜,唔似 NEX以圖示為主咁易明。

新鏡頭精選

隨 Alpha 7將有多款全片幅鏡頭同配件推出,當中不乏蔡司鏡頭,不論你係新機用家定舊 NEX用戶都一樣啱玩。

跟機

FE 28-70mm F3.5-5.6 OSS
同 Alpha 7以套裝出售的 kit鏡,特別加入 Optical SteadyShot光學防震,加上輕便、防塵同防潮功能,最啱旅行拍攝。
售價:隨 Alpha 7套裝發售
發售日期: 11月中旬

名鏡

蔡司 Sonnar T* FE 35mm F2.8 ZA
只重 120g嘅著名蔡司鏡頭新版,顏色亮麗。唯一係 F2.8光圈略嫌細少少,出埋舊蔡嘅 Distagon T* 35mm F1.4就更正!
售價:$6,490
發售日期: 11月中旬

抵玩

LA-EA3
新推出接環,可令 Alpha 7及 NEX系列等 Sony無反 DC,用上單反嘅 A-mount鏡頭。元祖級嘅 LA-EA1已停產,賣緊嘅 LA-EA2定價$2,590又成日冇貨,故 LA-EA3絕對是拍友喜訊。
售價:$1,390
發售日期: 11月中旬

實試!鏡頭亂入

上淘寶一打「鏡頭接環」就會見到 Sony無反 DC最多花款,不論以前菲林機嘅 Carl Zeiss、 Leica、 Nikon定 Canon鏡頭都有接環可安裝喺 Sony無反上,大大增加拍友可玩性。而 Alpha 7亦採用 NEX系列嘅 E-mount,我哋試過接上菲林機鏡頭同 NEX系列鏡頭,均完全對應。 Alpha 7會自動裁剪格式,亦不會有黑角問題,更可用回 NEX鏡頭嘅自動對焦功能。而 Sony亦公布首批會有多支專為 Alpha 7而設嘅全片幅鏡頭,加埋對應 Sony單反鏡頭嘅接環,可玩性千變萬化。


試舊蔡加接環後換上菲林年代蔡司 Distagon T* 25mm F2.8鏡頭,散景效果勁明顯,而顏色亦勁,有 sharp爆蔡司味! 

試舊 EAlpha 7首批鏡頭未有 wide angle,好在換上 NEX嘅 SEL16F28鏡頭都會有廣角焦距。自動對焦快之餘,成像更比以前裝在 NEX系列時實淨。 

試反轉唔似某啲牌子新舊鏡頭唔兼容,我哋試過將全新嘅全片幅蔡司 Sonnar T* FE 35mm F2.8 ZA鏡頭接上舊嘅 NEX-F3亦照用到,相片清晰度高,舊用家都有新鏡玩喇!

撰文:張穎麟
攝影:傅新發

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()