Webber

硬膠女神上位

一舉成名,橋唔使多,一條就夠。 facebook page Plastic Thing嘅惡搞 ABC女神短片就係好例子。以騎呢插畫走紅嘅 Plastic Thing,論盡偽 ABC港女強國人 MK妹, 7月破天荒同網上化妝教學達人大佬 B合作,傾力首創「女神教你如何呃 Like」片,吸引廿萬人 like!文質彬彬嘅 Yan畫畫年資已有十幾年,雖然口口聲聲話自己嘅創作好騎呢,更取名 Plastic Thing(膠嘢),但見佢近日又參與創作 beauty app、又快將出書,究竟係真心膠定扮膠?

Yan打扮斯文,講嘢怕怕醜醜,點解鍾意畫抵死插畫?


日本最搶眼嘅原宿系少女,雖然較少係香港街頭出沒,但以浮誇打扮取勝,行出街一定有人望。 

中學時畫油畫、素描多,間中會畫吓輕鬆形式嘅插畫,直到喺浸大修讀 Visual Art, professor鼓勵我鑽研呢種風格,大約今年 6月開始開 page分享。其實我本身好鍾意留意唔同人嘅打扮,亦會畫 fashion style插畫,我覺得 ABC Style都係一種 style,自己鍾意就得啦!除咗大家熟悉嘅 ABC, MK妹、韓風等「潮流」打扮都係我嘅創作主題,希望將我睇到嘅歸納再畫出嚟同大家分享。

明明畫開插畫,何解會同大佬 B合作拍片?


Yan在片中飾演「飯冰冰」,與大佬 B唱雙簧,教大家用間尺去打鼻影臉影、頭髮 10:0分界,玩三七面自拍,笑到碌地。 

事緣係佢睇到我畫嘅女神圖,佢嘅美妝教學方法好另類,同我嘅插畫都好夾,就試吓將女神插畫變做真人版 live騷。我哋事前冇特別開會傾,內容對白都係即興,好似 mascara廣告情節就係即場爆肚。合作過後我發現大佬 B同我都好貪玩,玩到「好膠」都得!

眾多惡搞插畫之中,印象最深刻的作品是?


憑「頭一定你最大,光一定你最反,面一定你最油,樣一定你最衰」,獲得二萬多人 like,在 fb瘋傳。 

我唔係惡搞㗎!我想畫啲嘢輕鬆搞吓 gag,內容地道啲,大家至有共鳴。放喺網上嘅 6、 70幅作品中,最估唔到「自拍照」反應咁熱烈。張圖係教大家自拍時永遠唔好做揸機嗰位,想成為女神就要坐最後排,網民 comment都好好笑,我個 page如果可以 keep住令大家輕鬆吓笑吓,已經好滿足。

同美容交流平台合作搞 app,有冇新火花?


COSSIP嘅 beauty app,除有女神坐鎮,更加入抵死太監公仔。 

因為 Plastic Thing專頁,我多咗機會嘗試唔同性質嘅創作,好似 COSSIP呢個 beauty app咁,好似美妝版嘅 Instagram,好玩又好用,大家可以即時 upload美容相片及短片,再加插我畫嘅女神畫框,更會定期推出免費女神化妝教學課堂。呢次算係第一次嘅商業合作,可以將女神「飯冰冰」化身為美妝代言人,換吓角度畫畫,又係一個新挑戰。總之好玩我就想試。

Webber's Profile

葉欣( Plastic Thing)
職業:插畫師
facebook: Plastic Thing
拍片年資: 3個月
作品總數: 1
總 hit rate: 20萬以上


撰文:王佩兒
攝影:傅新發

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()