Geek友講場

邊玩邊學 家中組 band方案

電視台搞《星夢》,個個藝人都話熱愛音樂。聽落好假,但你同我匿埋廁所對住花灑一樣鍾意大展歌喉,或許人同此心,人天性就愛好音樂。細個冇機會接觸音樂唔緊要,𠵱家科技發達,打機玩 app都可狂補音樂科。先搵嚟本地激罕女子樂團 Choco介紹打機學真結他嘅《 Rocksmith 2014 Edition》,再有精選流動裝置音樂 apps,有佢哋幫手,既可輕鬆玩亦可認真學音樂!

《 Rocksmith 2014 Edition》

廠商: Ubisoft
類型:音樂
遊玩人數: 1-2人
售價:$340( XBox 360. PC)/$358( PS3)
查詢: Ubisoft( 2886 8565)

《 FACE》 Gadget版監修人 903 DJ Donald

自己學過幾堂結他,不過懶好快放棄,反而會上 YouTube學 ukulele同用 NDS砌電子音樂。所以我覺得用 game學樂器好呀,唔怕阿 sir落堂,以前打鼓機、結他機流行都有人由打機入手學樂器,連樂隊 The Killers都喺 MV入面打街機。

Rocksmith 2014插真結他打機

結他 game唔新鮮,但 2011年推出嘅《 Rocksmith》勁在係首款插真結他玩嘅音樂遊戲,今次載譽歸來推出 2014版。遊戲標語「 The fastest way to learn guitar」唔係得個講字,根據美國公司調查,全球過百萬名玩家中有 95%表示結他技術有所進步,開創打機學樂器先河。玩呢隻 game必須要有一支電結他或者 Bass(最平$800買到 1支), setup同以前一樣,用遊戲附送嘅專用插線接駁電結他樂器同主機。更有雙打模式,不過一隻 game只跟一條線,如果想插兩支樂器「雙打」就要買兩隻 game。


插線附送嘅結他線一邊以 USB連接遊戲主機,冇得單買。 

Bass都得另一邊電結他用嘅 1/4 

Tune音彈歌前要先 tune音,跟畫面指示彈指定弦線,正數係太高音要扭鬆啲,負數就太低音要扭緊,新手可能遇到麻煩,秘訣係要連續彈住線嚟扭,等遊戲分辨到聲音。 

用 pick隻 game係用聲嚟認按得準唔準嘅,結他 volume扭到最大同用 pick彈都會有幫助。 

 

PS3連結他玩史密夫唔過二千
本身冇結他,可考慮 PS3連 Epiphone Special II H.Cherryburst E.GTR結他套裝。呢支結他屬名門 Les Paul入門級系列,單買都要$1,500。($1,880/ PS Platinum Shop訂購)

女子 band團 Choco


YouTube頻道除咗自家歌曲外都會玩吓其他 cover, full band live冇花假,值得支持。 

由主音 Mel、結他手 Nova、 Bass手 Cathy同鼓手 Kiki組成嘅 Choco上年出道,未簽唱片公司前已夾緊地下樂團 Pinkberry,上佢哋 YouTube頻道都見到夾 band功力,絕唔係韓日女團熱潮下嘅即食品。 Choco就話希望能夠喺男性主導嘅 band界起革命,不過音樂就不會以控訴社會作主題,希望好似朱古力咁用女生角度,將正面、充滿希望嘅音樂帶畀大家。身邊朋友見到日本女 band Scandal大受歡迎,曾誇口港女唔會玩樂器,𠵱家話你知有隊港產女 band,冇理由唔撐喇!

YouTube Channel: We are choco

Mel嚴選三大心水曲目


Mel 

兩支結他夾最開心,希望下一集可以駁埋鼓成隊 band一齊玩。

 

B'z《 Utlra Soul》
B'z作為日本經典二人樂隊,以 8,000萬張唱片總銷量成為亞洲最暢銷歌手第一位。清一色英文歌入面, B'z嘅日文歌堪稱萬綠叢中一點紅。

 

Oasis《 Don't Look Back In Anger》
Oasis象徵英倫搖滾高峰,好多 hit歌都係由弟弟 Liam主唱,惟獨是呢首經典由哥哥 Noel唱出,每次演唱會萬人合唱氣勢驚人。

 

Radiohead《 Paranoid Android》
曲長 6分 23秒,分為 4個風格不同嘅樂段,同 Beatles〈 Happiness Is a Warm Gun〉及 Queens〈 Bohemian Rhapsody〉齊名嘅經典組曲。

三階段學曉結他

咪以為填鴨長大、結他零知識嘅港人玩唔嚟,《 Rocksmith 2014》加入咗好多新元素照顧不同程度玩家,新手先玩各款迷你遊戲摸熟支結他,有底子嘅結他手亦可 free jam練 solo,見 Choco四女入面,唔識結他嘅 Kiki都玩得咁開心就知隻 game人人啱玩。

入門篇 Guitarcade

零知識新手可先去 Lesson模式入面睇片,有齊指示教你基本動作,總共 30多段片,睇晒做晒可能已比工聯會結他班更深入。學好基本功可再試用結他玩迷你遊戲嘅 Guitarcade模式,有㩒啱 chord射子彈嘅射擊 game、又有考即時反應嘅街頭快打。雖然都有限時,但唔使跟足節拍,鼓手 Kiki都玩得掂。


街頭快打睇壞人企邊格彈奏指定音色,打中一次壞人就會行去下一格,行進方式唔係隨機,而係依照五聲音階,邊玩遊戲邊教樂理。 

Slide忍者Slide係常用技巧,右手彈弦後左手在琴弦上滑動,跟住畫面滑去指定格數,新手都可捽到蕉蕉聲。 

Kiki:最鍾意玩 Guitarcade,玩之餘每個 game都集中一個技巧練習,學到嘢。

基本篇 Play a Song

熟練後可揀歌彈,玩法似正統音樂 game,音符從上到下掉落,玩家要按住結他上對應嘅格再撥弦。舊時隻《 Guitar Freak》得三個掣,真結他 6條線一般都去到 22格,初上手會有啲迷茫。不過認住紅、黃、藍、橙、綠、紫六色代表唔同嘅線,再睇住畫面下方數字認格數就唔會搞錯。主音阿 Mel同 Bass Cathy好快上手,仲大讚彈出嚟嘅聲有水準,不過就有少許 delay,要花時間適應。


遊戲歌曲會愈嚟愈多,亦有 DLC,暫時公布咗 45首歌。 

遊戲入面用到幾個音一齊掃嘅 chord又或者 bend線等技巧,會用特別音符表示。 

Cathy:我有玩過上集,今集版面簡潔咗易彈咗,新加曲目都好吸引。

進階篇 Session

練結他嘅人平時喺屋企唔齊 band,惟有開住 YouTube搵鼓聲練。新加嘅 session模式係畀玩家單人 free jam之用,可以調校四種樂器墊底,速度同 Key都可以自由設定。結他手 Nova覺得功能幾齊,真係可以幫到你改善技術。其實新手更應該試,反正唔會有人陪 jam歌,不如亂彈一餐享受吓夾 band之樂。


Session模式可以設定 4種模式彈奏墊底節奏,速度同 key都有得校。 

Nova:真正想學結他嘅當然唔可以靠晒佢嚟練,但得閒玩吓真係會改善技巧。 

八大流動音樂 apps

《 Rocksmith》要用到真結他玩,對一般人嚟講都算大投資,怕自己冇恆心,只想試吓玩音樂,可先用 app試試水溫。既有輕鬆過手癮嘅音樂節拍 game,亦有各款虛擬樂器,玩盡趣怪潮樂。手機在手,隨時演奏。

Cytus

平台: iPhone、 iPad、 Android
售價:$15.00
台灣最成功手機音樂 game,畫風唯美。音樂 game一般係 app免費下載,但逐首歌收錢,但《 Cytus》勝在 15蚊買晒 5個 chapter約 50首曲,有新 chapter新歌加先再收你錢。玩法上亦有創意,一條掃瞄線上下郁,碌過圓形音符先要篤,唔似坊間一啲抄《 Jubeat》同《 Beatmania》嘅 copycat。




插畫同介面都十分漂亮,感覺似日系遊戲,原來出自台灣廠商。

HD Cajon

平台: iPhone、 iPad、 Android
售價:免費
行過蘭桂坊、時代見到人街頭 jam歌,除咗結他,仲多咗人坐喺個箱仔上啪啪啪打 beat。原來呢嚿嘢叫 Cajon木箱鼓,源自秘魯,近年全球都好 hit。手機上都有大量 app模仿 Cajon潮音,呢個 HD Cajon同真箱一樣敲打畫面不同位置有唔同聲音, tablet玩敲擊樂亦比結他等撥弦樂器順手。




畫面冇乜好睇,但唔同位置會有唔同聲,頂部係啪啪聲,中間位係噗噗聲。 

Cajon真身有一定質素嘅 Cajon都要 500蚊左右,用 app玩住學吓先較化算。 

Games

O2Jam U
平台: iPhone、 iPad、 Android
售價:免費



韓國音樂 game,玩法似用手玩嘅捽碟機《 Beatmania》,勝在玩儲分制,唔出錢都可賺分買歌。 

 

Groove Coaster Zero
平台: iPhone、 iPad、 Android
售價:免費



日廠 Taito出品,玩節奏,光點經過記號時篤芒,篤任何地方都得,唔似其他音樂 game考眼力,畫面亦甚有藝術色彩。 

 

Groove Coaster Zero
平台: iPhone、 iPad、 Android
售價:免費



蛋會隨音樂節拍出現,篤出雞仔就有分,篤錯陷阱扣分,特別在可用自已手機、平板入面嘅音樂遊玩。 

Instruments

Ocarina 2
平台: iPhone、 iPad
售價:免費



將手機平板變成陶瓷笛子,真係要用口向咪高峰吹氣,再配合屏幕上四個按鈕吹出不同音調,玩完記得抹口水。 

 

iShred
平台: iPhone、 iPad
售價:$35



無數結他 app中首推此 app,最正係掃 chord、 bend線、 slide等真實技巧都用得番,仲有多個電結他特效。 

 

Harmonica
平台: iPhone、 iPad
售價:$8.00



由 Bob Dylan到𠵱家,吹口琴都係咁有型,此 app建議你用口玩,但其實用手 touch仲方便。 

撰文:司徒港燊
攝影:傅新發

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()