U Star

2013 UStar大專校花校草 10強黑白鬥

 

 


9.湯加文 

18.吳子冲

3.鍾顏名

11.陳盛忠 

19.徐澤銘 

4.何艷娟

10.阮嘉敏 

20.黃慶堯 

7.關嘉敏 

3.郭正煥 

YouTube睇真心話短片

今年 FACE UStar史無前例,將 10強 UStar分成 White Magic同 Black Jack兩隊,各人將接受歌舞形象特訓, 11月 12號晚,於九展決賽騷進行大對決!
上週,本刊為 10強進行個人專訪「 10強真心話」,當中有 UStar不禁落淚、大晒球技、自彈自唱兼打情罵俏,𠵱家就將精采時刻率先睇!
想睇足本「 10強真心話」片段,快啲登入 FACE UStar官網!
http://facemag.hk/ustar2013 

BLACK JACK TEAM
19.打欖球棄姿整

擅長欖球的 Marcus自爆欖球令他放棄姿整,可惜因傷被迫養傷,但受傷期間仍不忘在 fb大晒與女友的恩愛照,羨煞旁人。

9.立志做女導

一心立志成為導演的 Carmen考入城大 CM後,除了擔任幕後工作外,也不忘出任幕前化身演員挑戰自己,訪問當日媽媽更現身支持 Carmen,場面溫馨。

18.當王子遇上公主

Felix除了劍擊耍家之外,更在一次廣告拍攝中認識現任女友嘉欣,去年曾參選 UStar的嘉欣無論鏡頭前後都與 Felix形影不離,非常恩愛。

10.最佳女主持

對慣鏡頭做開主持的 Mandy,因不想辜負哥哥的期望,每一次拍攝都非常認真,一絲不苟,要她即席講段對白做主持她都出盡全力,絕不馬虎。

20.比賽壓力爆煲

曾在歌唱節目《亞洲星光大道 2》頻頻曝光的 Ronald自爆當時壓力爆煲,但慘被不少網友負評,幸得好友支持安慰,今次參選 FACE UStar誓要令別人改觀。

http://www.youtube.com/user/faceustar

 


WHITE MAGIC TEAM

10強 FACE UStar實力可謂旗鼓相當,邊個可以成功跑出,奪得 UStar校花校草冠軍,都好難預測,但大家絕對可以參與網上人氣 UStar Boy and Girl投票,票數將按比例帶入決賽騷,由週二( 22日)傍晚 6時開始,登入 UStar官網,投選心水 Star,為男神女神實現夢想!

11.力撐囝囝搏盡

無論是讀書、踢波,甚至參加 FACE UStar, Jacob媽媽都給予絕對支持和信任, Jacob當然要錫啖媽媽答謝。

3.淚灑 studio

今日自信的小巨肺 Jermaine,回想當日被同學評頭品足,及上台前失聲以致失獎的經歷,不禁在 studio淚流滿面。

4.情如姊妹

曾反叛逃學的 Katherine,現讀港大法律系,全因媽媽的支持而發憤讀書,和媽媽關係亦愈來愈好,二人關係十足兩姊妹,參加 UStar亦獲媽媽大力支持。

13.貪靚化妝的少年

Rock友 Saker跟足日本 Visual Rock文化,經常化行妝上台表演,因而練得一手好化妝技術,分分鐘叻過不少港女。

7.舞台獻技

從小跳慣中國舞,似足周秀娜的 Carman,近年轉跳 hip hop、 jazz funk當然亦難她不到,音樂一起即舞后上身,勁力十足。

9.城大 CM索女導湯加文 Carmen

入城大 CM, Carmen為整靚 portfolio不惜做看更,「嗰陣放暑假,我特登考保安牌去做看更,嗰陣返成 12個鐘都幾辛苦,不過為咗套微電影,唔緊要啦!」


媽媽做小粉絲


雖然 Carmen鍾意先斬後奏,不過同媽媽關係仍然很好,「坐我隔籬係提名我參選 UStar嘅好朋友嘉琪,佢會同我屋企人一齊食飯,十足我個妹!」 

周星馳嘅《唐伯虎點秋香》、《賭聖》、《少林足球》套套電影嘅對白我都背到滾瓜爛熟,可以講我係電影精,初中就拎部傻瓜機同婆婆拍生日紀錄片。浸大視覺藝術系 asso畢業之後,我一心諗住入城大創意媒體系( Creative Media),為出奇制勝,我發揮古靈精怪嘅創意,用保安員為藍本拍微電影,為咗更加逼真,我仲去考牌應徵做屋苑保安,雖然做保安發生好多蝦碌嘢,好似撞到中學同學,又有男住客問我拎電話,但最後我將做保安發生嘅趣事擺入微電影,結果成功考入城大 CM!
其實參選 FACE UStar同入 CM一樣都係先斬後奏,事前冇同媽咪講,因為佢一向好保守,我驚未成事就同佢講會俾佢大力反對,估唔到今次 UStar媽媽唔單只冇反對,仲做埋我粉絲,去到邊都叫街坊投我票,無論我嘅電影夢實唔實現到,有媽咪呢個忠實粉絲我就已經好滿足,多謝媽咪!

18.公大 187劍擊王子吳子冲 Felix

又靚仔身形又 fit到爆的 Felix有做兼職模特兒,「我年幾前拍飲品廣告識咗女友 Cayenne(去屆 UStar校花 2強兼網上人氣 UStar Girl)(右二),我鍾意佢夠儍夠可愛!」


輸咗 no big deal


曾在英國生活的 Felix(左)說:「企我隔籬嘅係我監護人,喺英國 7年佢一直當我係親生仔,令我身在異地都有家庭溫暖,而 Jonathan(右)係我喺英國最好朋友,我哋識咗 14年,由小學至中學都同一間!我哋一齊玩,一齊罰留堂,哈哈!」 

小學三年級見課外活動竟然有劍擊玩,班中男仔都爭住報,貪攞住劍又型又似王子,直至小學畢業,家人送咗我去英國南部 Bath附近一間寄宿學校讀中學,無論語言、生活圈子都無法適應,我愛嘅劍擊都係嗰時被迫放低。
喺英國 7年我試過玩足球、網球、欖球、曲棍球,不過始終劍擊先係我至愛,好彩最後俾我喺當地搵到個劍擊教練,難得我可以重拾興趣,所以我瘋狂練習,就算膝部扭傷,食住止痛藥都要出賽,最後我以一分之微輸畀對方,無緣打入決賽,不過我反而覺得好開心,因為無論自己或教練,都大讚我有體育精神,其實輸咗都 no big deal,最緊要享受過程,冇壓力玩得又開心,表現得會好啲!

10.CUSCS美眉主持阮嘉敏 Mandy

恨做主持的 Mandy成功考入電視台做主持,「好開心可以拍住周中師傅做節目,不過做飲食節目主持真係唔簡單,淨係記材料名都要落好多工夫。」


做到小 S就好


同哥哥一向感情好的 Mandy說:「我同阿哥行出街成日俾人誤會係男女朋友,有次佢前任女朋友仲誤會阿哥有第三者,好搞笑!」 

我係一個 part-time model,不過唔同其他女仔,為搵快錢或發明星夢做 model,我做過 show girl甚至影過龍友相,目的只係為咗有機會入行做主持,好多家人都反對仔女入演藝圈,不過我有個好錫我嘅哥哥,佢好支持我呢個決定,我哋關係好好,成日攬頭攬頸,行出街成日俾人誤會佢係我男友。
點解想做主持?因為初中同學都睇台灣嘅綜藝節目,我最鍾意睇《大小愛吃》,主持人小 S無論轉數、口才同執生技巧都幾乎完美,加上佢將調皮性格融入節目,所以我由嗰陣就視小 S為偶像,亦視主持為我目標!
直至中學畢業,有朋友同我講要識多啲人先有機會入行,所以就算影龍友私影我都硬着頭皮去做,結果花咗大半年時間,我成功成為美亞電視飲食節目主持(可在 YouTube觀看),雖然做美食主持,但我唔會講雞有雞味同哈哈哈就得,事前一定做足功課,每次仲預先背好餸菜歷史,搵齊資料。

10.IVE欖球男神徐澤銘 Marcus

咪睇 Marcus(黃圈)行到邊 chok到邊,但其實走入欖球場就變身另一個人,「去到球場我就超認真打好每一場波,絕對唔會 chok住打!」


戀愛大過生命


Marcus同女朋友出名恩愛, fb亦有不少親密 sweet爆相,「開心嘢梗係同大家分享啦,我又唔覺得係晒命喎!」 

唔好見我白白淨,其實我打過 IVE欖球校隊,只係大半年前比賽俾對方一名 270磅前鋒撞斷腳收咧養傷。欖球改變咗我好多,由以前好貪靚,跌損少少都即刻要貼膠布嘅姿整男,變成𠵱家通場跑為得分搞到成身泥漿同損傷都冇有怕嘅欖球隊員。
我份人好貪玩,試過練完波除波褲露 pat pat周圍走,又試過除晒隊友啲衫褲,要佢遮住重要部位係咁跑,我永遠都係搞事嗰個。好多朋友都笑我 chok過林峯,特別喺 fb狂貼同女友嘅煙韌合照,唔少朋友都留言話頂唔順,想作嘔,其實我只係想將自己最值得回憶嘅生活點滴留低,可能愛情對我嚟講好重要,所以想一打開 fb就見到另一半,如果係我嘅好朋友,佢哋會明嘅!

20.恆管超級好聲黃慶堯 Ronald

《亞洲星光大道 2》第六名 Ronald,在總決賽落力演出,「嗰晚我唱郭富城嘅〈純真傳說〉,雖然唔係唱得好好,不過好享受喺舞台上嘅每一刻,希望今次參加 UStar一樣,享受比賽!」


以進步戰勝批評


出身男拔的 Ronald(黃圈)為考好高考,日日去自修室由朝溫到晚,「雖然已經放假唔使返學,不過見就嚟開學,就特登約埋班老友着校服影張相留念。」 

好多人都話我 cool、唔笑嗰陣仲有啲惡,其實我只係壓力太大,同我玩熟咗就知我份人可以好癲!我中學讀男拔,中五個個埋頭苦幹溫書應付會考,我竟然走咗去亞視參加《亞洲星光大道》,老實講我知自己唱功好普通,但係歌藝普通都可以有夢想!
我比其他參賽者更努力,我選擇又跳又唱,除咗兼顧唱歌,比賽期間仲要狂排舞,估唔到節目出街會俾不少網友負評,在校內更加有不少師兄弟評頭品足,更有人恥笑我,話我:『咁難聽好心唔好參加影衰晒!』,更難聽嘅說話我都聽過,最後咬住牙關,得到第六名同台風獎。
今次參加 UStar又令我諗起好多呢啲不快回憶,不過今次我唔會再理其他人點睇,希望以進步令批評我嘅人改觀。

3.浸大 G.E.M.鍾顏名 Jermaine

Jermaine參加過大大小小的歌唱比賽,令她自信倍增,除了成功打入英皇新秀歌唱大賽 16強外,亦是 2012年 MusicNext歌唱大賽冠軍。


平凡妹變自信歌后


曾經毫無自信的 Jermaine,原來是上年 FACE UStar 20強 Whitney(《決戰一分鐘》女神呀!)的中學同學。 Jermaine試過比賽前失聲,全靠好友不斷鼓勵才令她重拾自信。 

老實講,我自知唔係女神。中學時代,唔少人笑我眼細、身材矮細,令我自信心好低落。但當我一上到台,拿住咪開聲唱歌,全校同學都對我改觀,對我的歌聲讚不絕口,從此我就好享受在台上的感覺。當 spot light射住我,音樂一起,我就由平凡女生,變成自信女神。
正因為唱歌可以帶畀我自信,所以我由細到大都好鍾意參加歌唱比賽,校內校外都有拿獎,經驗累積愈多,成績就愈好,更試過打入英皇新秀歌唱大賽 16強,可惜家人覺得呢一行好複雜,唔想我參與演藝活動,但我好想同媽媽講,我真係好愛唱歌,我好希望她可支持我完成呢個夢想。

11.中大運動 icon陳盛忠 Jacob

入到 U除了繼續踢波, Jacob更嘗試不同的活動。例如上年就擔任運動品牌的 icon,幫品牌在大學搞活動,令他學到更多 marketing的經驗。



入 U樣樣試 

畢業前玩盡


冠軍球癡Jacob(右二)自認超級波牛,初中時當足球是自己的全部,更成功以隊長身份為學校贏取冠軍。 

同好多男仔一樣,我都係一個超級波牛。由細到大我喺球場多過喺屋企。初初踢波因為好有英雄感,能夠入波為球隊取勝,隊友同教練仲會當你係救世主。中學時我逢一三五就去區隊練波,二四就練校隊,之後做埋隊長,所有精力都放在足球上。漸漸由好氣焰,好急功進取,變成懂得顧全大局,仲由最搶風頭的前鋒轉踢左閘,為球隊做好防守。
不過在香港踢波唔可以搵飯食,所以到中三,我就放低足球狂讀書。過咗會考、高考,我終於成功入到中大。難得入到 U,我就瘋狂玩盡,試好多唔同活動,充實我的大學生活。除了重拾足球,踢書院隊、校隊、仲做埋運動品牌 icon、校園 DJ等。就連比較少中大同學參加的 FACE UStar,今年我都主動報名,希望在唔熟悉的範疇學多啲嘢。𠵱家啲同學出入都叫我做 UStar。大學唔玩幾時玩!喺 UStar比賽我一定會搏到盡!

4.港大法律女神何艷娟 Katherine

由英國重回香港, Katherine初初都擔心不適應。幸好同學都好 nice, Katherine系內認識到不少好友,今次參加 UStar,同學們都好支持她,亦會喺決賽拉隊撐場!


被偷走的那五年


Katherine已是法律系 Yr.4學生,立志成為大律師的她,上年就曾到立法會議員梁家傑的律師樓做實習學嘢,亦係對方啟發要 work hard, play hard! 

初中在聖士提反書院寄宿嘅我,見朋友時間多過屋企人。到咗中三,媽媽想我見識多啲,就決意送我去英國的 St.John's School讀書。不過佢哋從來冇問過我意願就送我過去,要我重新建立我的人生,真係好唔開心。所以去到英國我就好反叛,經常逃學兼落 town玩,我更是學校留堂的常客。
我印象中嘅媽媽向來好堅強,想唔到有次媽媽打電話畀我,我竟然隱約聽到佢在嗚咽,叫我畀心機讀書。原來佢收到校方 email話我反叛。我嗰刻好心痛,唔想再浪費屋企人的心血,亦好後悔浪費咗喺英國的 5年時間,於是決心考好成績。我最終在英國高考獲得 2A*、 3A的成績。
其實我從小都好想做新聞主播,但家人想我讀法律,所以我最終都返嚟香港讀法律系,希望成為一個大律師。但我一直有個主播夢收喺心底,希望透過今次 UStar可以完成我小小夢想。

13.理大視覺 rock友郭正煥 Saker

Saker除了愛夾 band,也超迷戀日本的 Visual Rock,上台表演都會跟足 Visual Rock表演者化行妝、帶 colour con.,成個《爆粗 Band友》。


化行妝玩 band


來自單親家庭的 Saker,自小同媽媽關係超親密。無論是夾 band、染髮,媽媽都萬二分支持。而 Saker大小事情都以媽媽為先,夾 band之外都好畀心機讀書。 

入咗大學,我的頭髮好少時間係黑色,試過啡色、金色、藍色、灰色,平均 3、 4個月就染一次。因為我情迷日本的 Visual Rock,所以先將頭髮染得咁密。
小學時覺得彈結他好型,於是就叫媽媽畀我學。初中時最愛 Beyond,更開始同啲志同道合的朋友夾 band。後來我就俾日本的 Visual Rock吸引,除了強勁音樂,佢哋仲會化行妝出騷,就好似 Malice Mizer、 Dir en grey等,睇佢哋表演,就好似去到另一個世界。久而久之,迷上他們的音樂之餘,亦開始重視自己的形象,自此開始修眉、戴 colour con.,仲會做好防曬同護膚。曾經有人因我的形象懷疑我的性取向,不過我係絕對鍾意女仔。
雖然我形象前衞,不過我好顧家。我來自單親家庭,媽媽好辛苦湊大我,所以我做人、讀書都好畀心機,唔想辜負佢、 UStar決賽我會請埋媽媽,畀佢見證我嘅成長。

7.IVE長腿舞后關嘉敏 Carman

Carman從小習舞,中國舞、現代舞都難她不到。坦言為跳舞短幾年命都肯的 Carman,除了參加大大小小比賽,亦是海洋公園舞蹈表演員,藉以累積表演經歷。


跳舞去盡飛男友


經常被指似周秀娜的 Carman(右),原來曾與娜姐合照。合照一放上網,即被瘋傳,仲大讚她是「嫩版周秀娜」。 

同好多人一樣,我父母都好想望女成龍,所以由細到大都畀我學好多嘢, saxophone、游水、跳中國舞……初時,跳舞成日整親,動作又難,唔明點解媽媽要迫我學跳中國舞,但當我知原來跳舞有得考級,我就好想挑戰自己好似打機咁一級級過關!之後仲愈跳愈上癮,𠵱家跳舞已經成為我的生活一部分,仲差兩級就去到最高級( 12級)。
同《狂舞派》一樣,我為了跳舞,可以去到好盡,除了跳到五癆七傷,一打風就成身痛,我之前的男友嫌我冇時間陪他,要我喺跳舞同我堅持跳舞,與男友二選一,最後同佢分手收場,為跳舞,我絕不後悔。
除了跳舞,另一個 icon就係好多朋友都話我樣子酷似周秀娜,跳舞的朋友都講笑叫我「娜姐」。我都見過周秀娜真人,覺得她好靚,身材好好,事業又成功,我都好希望以她為榜樣。

    全站熱搜

    tvb4life 發表在 痞客邦 留言(0) 人氣()