面對面

阿肌正傳 陳柏宇

當我第一次拍照請陳柏宇脫去上衣、打出腹肌時,其實他是拒絕的。因為他覺得,不能叫他拍、馬上拍。第一,他要試一下,你拍完一張相片以後加了很多 PS,那肌肉動呀……很深、很硬、很壯!結果觀眾出來一定罵他,根本沒有這種肌肉!……拍完之後他跟攝影師講,這個肌肉就是我的肌肉,就不要加!他要給觀眾看到,他練完之後是這樣子,你們練完之後,也是這樣子……

 

簡單來說,哄陳柏宇騷肌拍照的過程就是以上這樣,十足霸王洗頭水廣告。本來不肯拍,後來為了證明減肥操肌只是為了鍛煉自己,而不是拿來做 11月演唱會的銷票手段,最終,還是脫了。
其實哪個男星不愛賣弄肌肉?哪個男歌星不是留着肌肉在演唱會上製造尖叫高潮位?本來就沒錯、千辛萬苦本來就該為自己製造話題,陳柏宇偏偏不志在。他說自己就不是那種人,所以入行七年的首個賣票演唱會,開賣半個月還未沽清,戰戰兢兢怕是第一次也是最後一次。
「三十歲喇,你可能覺得我未算紅,冇乜上過封面,但係我好滿意自己三十歲呢年嘅成就,我嘅成就正係一直堅持、冇為咗多一個角色、多一版新聞,去改變自己原則……」
當然,堅持亦是成就,能贏得尊重、敬佩和完全不摻雜質的情誼和掌聲,不過,這些都不值幾個錢。

維基解密

大家都知道,娛樂圈的成功之道,除了才藝,更重要的是機遇。出道這七年,陳柏宇可以說是被機遇玩慘的表表者,剛出道時,包攬各大傳媒新人獎,名氣大、卻沒錢,一直被指是赤貧歌手; 09年,〈你瞞我瞞〉、〈 I Will Be Loving You〉歌紅人亦紅,大把位上之際卻遇上四大唱片與無綫擘面,突然消失間中只能上亞視;今年錄碟健身準備 11月 29日的首個賣票演唱會,還有《喜愛夜蒲 3》和港視劇集《童話戀曲》,夾埋 timing一齊推出,仲唔上位?可惜……王維基申請電視牌照失敗,命運玩咗維基同時亦玩埋柏宇。
「結果出咗嚟,當然失望……《童話戀曲》純戀愛,《大眾情性》就玩性事,我係做個有心理病嘅男仔,唔敢做愛、覺得自己做完一次以後都唔得……好想觀眾睇得到,但係好可惜,遙遙無期。上個月《大眾情性》拍完第一集,原定 11月再開工,𠵱家未收到最新通知,但係我更擔心係其他演員同幕後工作人員嘅心情同出路……公唔公平我唔講,但係透明度的確可以再高啲,你否決人都要畀人知點解錯、知道點樣改至得。
不過我愈大個就愈覺得,每個人都開口埋口要公平,但係每個人對公平嘅準則都未必一樣,呢個世界邊有絕對公平同黑白?一有事成村人走出嚟批評、鬧唔公平,當中有幾多係存心抽水?當中確係由零開始,建設同改變現狀嘅又有幾個?想進步,唔係咁㗎……我嘅選擇係「做」,做我嘅音樂,滿足自己同滿足我想滿足嘅人。
今年入行第七年,我 30歲喇,好多人都話我成日爭啲爭啲……去唔到嗰個位……大佬呀,去到嗰個位要講際遇,我都唔恨!學似 Laughing哥話齋,個天畀你行你先至好行,呢一刻應該得到嘅,一定會有,唔好強求。」
「個天畀你行至好行」……這句話、這一刻,怎麼看,都像是說給王維基聽的,無綫劇,有時候也不是一無是處。


出道七年,第一個售票演唱會將在下月 29日於九展舉行,公開售票兩週,陳柏宇說:「銷情理想。」……即係未賣完。 

一年前開始練大隻,月初終於在社交網絡公開成果,成為網上話題人物後卻說不會在演唱會賣弄肌肉。 

七年很癢

電視氣候和樂壇這些年都不振,罵的人總是很多。我問陳柏宇有沒有雄心大志,做像王維基一樣搞革命、改變現狀的人,陳柏宇說:「我不是那種人。」
「我冇信仰,所以我唔在乎 after life會去邊,更在意眼前見得到嘅生活。我唔係嗰啲要大紅大紫、要萬人之上嘅人,我唔鍾意揹咁大責任,反而追求冇壓力嘅生活。即使是一年前減肥健身,我都冇諗過係為咗事業更上一層樓,操,係想挑戰自己,鍛煉自己意志。好多嘢,唔係你想像中咁難達到,係睇你有冇決心去起步啫。我本來最鍾意食雞翼、可樂、寶礦力、肥牛、雞皮;仲有和牛,不停食零食,尤其係熱浪薯片。但係當我有決心,第一個星期我已經戒晒,呢一年以嚟,盡量自己煮、出街保證走皮走油走鹽,就算喺片場等埋位,個個喺度開薯片,我都係借包熱浪嚟聞一聞、過吓癮就算。最放縱都係得梳打餅,一日一包,三塊,多啲都唔得……身邊好多人替我唔抵,話我應該再紅再積極啲,但係講真,三十歲人,我認為我都有啲成就,就係喺一個行業七年,我唔會夾料、唔會巴結人、唔會踩住人哋上位、唔會為咗小小版位、唔會為咗賣多幾張飛幾隻碟,去自我宣傳。我最大嘅成就係貫徹始終。就算係七年一遇、第一個演唱會,老實講,我都擔心票房、擔心交代唔到畀主辦單位,最驚係第一次又係最後一次,不過我會練歌、會做宣傳、做好所有應做嘅本分,我希望每個嚟買飛嘅人,都係因為我嘅 talent,唔係因為其他嘢。」


初入行時形象反叛,紋身食煙又出入遊戲中心,現在戒蒲戒酒連煙都戒埋:「女朋友媽咪唔鍾意人食煙。」 

09年四大唱片公司風波後,陳柏宇身份自由,收入反而上升,更成為三集《喜愛夜蒲》鐵膽角色:「拍床戲都係呢行帶畀我嘅經歷,只要唔露啫就得!」 

Be a better man

上次訪問陳柏宇,說到他小時候父母離異,因為雙方都「無暇照顧」,所以才三歲就被丟到專收容孤兒的大埔兒童院四年,那一次,陳柏宇說對婚姻制度極度失望:「結婚除咗向人交代,一啲功能都冇!」幾年過去,他看法改變,已經在積極為五年後迎取現任女友符曉薇( Leanne)做準備。
「 25歲時,我把聲生繭,試過諗轉行,唔想呃飯食。 30歲,我又諗轉行,今次係想為老婆仔女打算,唔想被呢行困身、亦想搵多啲錢,畀佢哋更好生活。」
拍拖兩年,出演過《喜愛夜蒲》並因此結識撻着,陳柏宇一提起現任𡃁模女友,甜笑得似烚熟狗頭一樣:「我好驚啲作狀女仔,你知呢行好多㗎啦,所以第一次見到佢又豪邁又粗魯,就已經覺得好特別。啱啱識,佢成日都話自己打羽毛球幾咁叻,結果約出嚟……唓……渣到爆!」口講話女友打波渣又吹水,陳柏宇講起來的面容卻是甜到漏:「換着第二個,我鬧咗十世啦!勁咩勁!吹 X晒水!但係當你鍾意一個人,就會覺得連佢吹水、不知天高地厚,都係可愛之處……我拍過好多次拖,但係第一次諗結婚。當你遇到一個對嘅人、身處於一段全無負擔嘅相處當中,人就自然會諗將來、會想做一個更好嘅男人,唔係為咗自己……係為咗佢!」


香港出生, 3歲因為父母離異被送進兒童院 4年,直到 7歲才到加拿大與母親、舅父及外公外婆團聚:「我唔覺得自己比人少咗愛,我一樣好多人愛!」 

兩年前接拍《喜愛夜蒲》與冇對白的𡃁模 Leanne相戀,陳柏宇去到邊都不避嫌提住女友,更公開五年後結婚大計。 

一入行就與歌手裕美傳出緋聞,更被踢爆同車又同居, 09年分手後,陳柏宇訪問一概死唔肯提舊愛。

兩個只能揀一個

講到咁愛女友,我問陳柏宇手機牆紙難道就是女友?陳柏宇說不是:「係我隻狗!」我無聊的提出個假設性問題:「如果實在要你在狗與女朋友之間選一個呢?」
我沒想到他的答案竟然是:「我會揀狗……因為女朋友有思想,會明白我嘅選擇,但係隻狗唔同,第一日係我揀佢嚟我屋企,佢冇得揀。」
一番話有情有義更有機心,仲唔係曲線讚緊自己有愛心重承諾?


撰文:朱小博
攝影:范仲良
服裝提供: Club Monaco

    全站熱搜

    tvb4life 發表在 痞客邦 留言(0) 人氣()