發福鄧一君俾5歲女嗲暈

#video_player{width:100%;height:100%;}


當年嘅香蕉仔鄧一君,今日已經成為幸福小男人,日前拖住5歲囡囡行街,笑到見牙唔見眼。

【金鐘】有人話囡囡係爸爸前世嘅情人,呢句說話用喺本月底就37歲嘅香蕉仔鄧一君身上,可謂最貼切不過。憑電影《記得…香蕉成熟時》成名之後,俾人叫做香蕉仔嘅鄧一君,自從05年退出娛樂圈之後,喺保險業發展得好好,而且佢嘅體重亦隨住業績上升,由當年嘅童星變成今時今日嘅肥腩中年。鄧一君06年結婚,囡囡頌情(Kristen)今年都5歲。

 

囡囡𠱁𠱁轉

鄧一君日前趁住唔使開工,一家三口去咗金鐘太古廣場行街。囡囡全程要黐實老竇嗲佢,一君亦一副有女萬事足模樣,行咗大概半個鐘,媽咪行開咗去買少少日用品,一君就帶住囡囡去咗附近嘅座位坐低,順便攞部手機出嚟回短訊,囡囡Kristen就圍住爹哋𠱁𠱁轉,仲喺附近跑嚟跑去非常活潑。
等咗10分鐘,鄧一君太太返嚟會合兩父女,一家三口繼續window shopping,之後當太太帶囡囡去廁所嘅時候,一君極速入咗間運動品店,睇咗唔夠10分鐘就買咗對波鞋。再行多10多分鐘,佢哋搵咗個地方坐低,囡囡已經急不及待攞咗張畫紙出嚟畫畫。
採訪、攝影:朱志聰


■鄧一君嘅5歲囡囡,同媽咪十足餅印。


■囡囡對老竇鄧一君非常黐纏,成日挨喺佢身邊。


■鄧一君90年代嘅《記得…香蕉成熟時》,係好多青春期男生嘅集體回憶。劇照

 

全站熱搜

tvb4life 發表在 痞客邦 留言(0) 人氣()