招牌豬扒牛角包(前)$19、屏山特色菠蘿包(後)$16烘熱牛角包好鬆軟,牛油味亦夠香,豬扒配濃味沙律醬好夾。菠蘿包即叫即烘,大大塊牛油加漏蛋汁煎蛋,非常 Juicy香滑。 

庶民飯堂

屏山街坊 屏山冰室 地址:天水圍嘉湖新北江商場一期 A82-83地鋪

提起元朗屏山,會令人回味有炸門鱔嘅傳統盆菜。一間天水圍餐廳仔,又何以敢叫自己做「屏山冰室」呢?

 

「因為我哋喺屏山住,我哋問准屏山村村長先用呢個名㗎!」負責人馮先生豪爽地回應。馮生係屏山原居民,拍檔主廚鄧生就係同村由細玩到大嘅好兄弟。主廚做過幾間大型連鎖店廚師,經驗豐富。餐廳開業,村長都有嚟幫襯支持。
為了屏山村嘅名聲,出品一定唔可以馬虎。「我哋好認真,煲個番茄湯底都落足心機,全用新鮮番茄,唔加茄膏,而且要熬三、四個鐘先有咁濃郁。各款湯底熬煮需時,每日 11點後先供應,賣晒就冇,唔會放過隔夜。」冰室另一招牌菜係大過手掌嘅豬扒牛角包,幾乎個個客人都會點一個。點解用牛角包?「因為澳門嘅豬仔包太硬,食完個口損晒。客人都覺得牛角包好食啲,我哋仲係即點即烘熱麵包,更加酥脆。」
餐廳開喺小商場內,左鄰右里係小餐廳、菜檔,環境唔及連鎖餐廳舒適,但就多咗一份街坊街里嘅感覺,老闆同食客有傾有講,仲會記住客人嘅飲食喜好,都襯番屏山冰室呢種懷舊名字。


鮮茄濃湯豬扒雞翼烏冬$36鮮茄湯底有啖啖番茄肉,會不自覺飲晒成碗;雞翼先滷再煎,更加香口。 

皮蛋芫荽豬膶米線$32湯底用豬骨熬製,好香芫荽味。豬膶剛熟,爽口唔會一團粉。 

泰式冬蔭功海鮮烏冬$40湯麵配料落足本,唔係蟹柳、小蝦仁,而係青口同墨魚仔,令湯底好有鮮味,辣度剛好。

屏山冰室

地址:天水圍嘉湖新北江商場一期 A82-83地鋪
電話: 2177 7600
營業時間: 7am- 9pm




撰文:吳韻菁
攝影:梁炳權

全站熱搜

tvb4life 發表在 痞客邦 留言(0) 人氣()