APPCADEMY

電子樂堂

好多人都想學音樂,但最怕學一陣就無興趣,嘥錢之餘又嘥時間上堂,最慘是樂器玩兩玩就擺埋一邊,封塵變成擺設。
想先了解不同樂器,其實可以下載樂器教學 apps或上 YouTube睇片,不少製作人為了增加下載量同點擊次數,賺取廣告費,製作時都非常認真,解釋得簡單易明。搵埋有教 band友玩樂器的資深音樂人譚達華評論不同教學,等你知道成效有幾高。

推介 apps

潮興用 apps學音樂,怕學到半桶水,現時有不少教學 apps圖文並茂教玩樂器,想快速入門,絕對信得過。

教打木箱

近年香港流行打木箱鼓( Cajon),隨着不同節拍,用手敲打木箱不同位置,就可演奏出輕快音樂,慳位過 band鼓,流動性又高。想學, iOS有免費 app,其中 Cajon Lessons Elite是不錯之選。教學分入門、拉丁及搖滾三部分,每個分類都有一至兩個免費教學,仲有影片教拍打方法、位置、節奏等。除了免費教學,亦可另購教學課程,每個課程約$8,全部下載只需$64,都算抵。


課程主要分三個部分,睇完免費教學覺得適合,再俾錢買新堂都未遲。 

每個課程都有短片講解拍打位置、節奏同拍法,好易掌握。 

 

Cajon Lessons Elite
支援系統: iOS
售價:免費(額外教學每節$8)

短評:「大部分敲擊樂器都比較易學,新手跟住個 app嚟玩,都好易學識。而且有片教打唔同位置嘅聲同節奏,知道大約位置,之後『照辦煮碗』就得。」

速食結他

識彈結他,感覺特別有型,不過複雜的樂理同 chord位,就並非人人頂得順。其實學結他無非想彈到首歌, Coach Guitar-學習彈結他 app就可以幫你完成心願,搜集不少經典英文流行曲,再將整首歌曲拆分成不同小節,逐 part教你彈,更易記入腦;如果只想學彈一首歌冧女就最適合。免費版提供四首歌,亦可以每首$28買歌,包括 Eagles的 Hotel California、 Beatles的 Yesterday繼續學。


Coach Guitar-學習彈結他直接教彈流行曲,新手學更有成功感。 

每段片都分別影住左手及右手動作,同時亦有按 chord位置圖解。 

 

Coach Guitar-學習彈結他
支援系統: iOS
售價:免費(每首歌賣$28)

短評:「完全唔教樂理,雖然學完會識彈一、兩首歌,但就未必學得識睇譜。勝在將歌曲拆開唔同分段,仲可以同個 app一齊彈,玩落似夾 band。」

先試後學


由基本功開始教,加插動畫,小朋友更 Like。 

小朋友學樂器,最怕學兩學就放棄,上堂買樂器的錢就付諸流水。如果想小朋友學小提琴,都可以借助 apps幫手,其中 iOS的小提琴教學 apps較好,可以正統方式學習如何手握小提琴及琴弦,亦有影片教拉奏方法。先問朋友借小提琴試學,有興趣再報堂都未遲。

 

Violin Lessons
支援系統: iOS
售價:免費(購買六首音樂另付$48)

短評:「雖然個 app都好簡單,但係小朋友理解能力有限,好難自己一個學,要有家長或者少少音樂底嘅朋友帶住會好啲。」

YouTube頻道

除了用 app, YouTube亦有不少教學 channel,拍得更仔細同教得更清楚。

易明易學


圖解夠多加上講解清晰,小記自認音樂知識貧乏,都睇得明。 

結他難學又好難拎出街,取而代之,只得四條弦的夏威夷小結他( Ukulele)就受歡迎得多,體積細兼易彈易學,大人細路都適合。可以去台灣阿欽老師開設的 YouTube頻道,入面設有夏威夷小結他的影片教學專區,影片以簡單易明的樂理圖解釋玩法,好多人讚。

YouTube頻道: KUO CHIN Tseng

短評:「講解得非常詳細,就算唔識樂理,睇完都一定明,新手跟住做一定學得識。」

有問必答


每次有人問關於手風琴的問題, Tony Watterson都會在一個星期內回覆。 

想學另類樂器,都有門路。以手風琴為例, YouTube上亦有教手風琴頻道,當中以 Tony Watterson的教學最簡單,而且只要是手風琴技術問題, Tony都有問必答,解決到不少學琴疑難。

YouTube頻道: Tony Watterson-Marchell

短評:「手風琴原本係一樣好難學嘅樂器,開頭跟佢學都冇問題,不過深入學 bass部分就未必睇得明,要有少少樂理底先知要點做。」

虛擬樂器

學完基本功,如果想扮彈奏樂器時有更好音效,可以裝其他 apps用,毋須特登買件樂器返來。

虛擬木箱

iOS或 Android都有木箱鼓 apps免費下載,不過質素方面都幾參差,例如拍打聲音的像真度、反應、漸變聲音效果未必做得夠好,其中以 iOS的 HD Cajon及 Android的 Mini Cajon效果最似真木箱鼓,不妨下載試玩。

 

HD Cajon/ Mini Cajon
支援系統: iOS/ Android
售價:免費

只要拍打畫面不同位置就會有不同聲效



HD Cajon 

 

 



Mini Cajon 

像真彈歌

用手機或者 tablet學彈夏威夷小結他,怕像真度低學壞手勢,可以下載 Ukulele Hawaiian Guitar。介面設計不像其他 apps只得四條線,畫面可以見到更多琴身,同時將弦線放近畫面右方,可以模仿拎住真夏威夷小結他姿勢及用雙手彈奏,仲可以設定左手或右手掃弦,夠細心。

Ukulele Hawaiian Guitar
支援系統: iOS/ Android
售價:免費



將 tablet打橫拎,就可以兩手彈奏,像真度都算高。 

以量取勝

講到 iOS樂器 apps,當然不得不提 GarageBand,入面有齊一隊 band應有的樂器,包括敲擊樂器、管弦樂器、鍵盤樂器等,自己組隊 band都得。而且除了有傳統介面之外,亦都提供簡化版介面,新手都識用。

GarageBand
支援系統: iOS
售價:$38



雖然要收費,但勝在樂器夠多又易玩。 

手機學樂器


有時出 show玩音樂,探長話都會拎埋 iPad,「入面有好多唔同樂器音樂,可以做到伴奏,啲聲又夠像真,慳番唔少力氣搬器材。」 

曾經是 band友,亦有教音樂的多媒體製作人譚達華(探長),絕對稱得上音樂通。問到用 apps或 YouTube學樂器,他坦言已經成為趨勢,「 YouTube有唔少片教玩樂器,而教學 apps都愈來愈多,而且好多都係由音樂教室製作,所以水準都唔錯。不過,由於呢啲片或者 apps都係針對初學者而設,好多時未必會深入去教樂理知識,但對於一般人嚟講,可以好快學識點玩同彈到一首歌出嚟,先吸引到人繼續玩。」至於現時手機或 tablet都推出大量樂器 apps,就未必完全是好事,「雖然而家樂器 apps啲聲同真樂器都好似,但質感方面始終唔及真樂器,試吓都仲得,長玩就點都要買番件樂器。」


text:勞耀全 
photo:許朝暉

全站熱搜

tvb4life 發表在 痞客邦 留言(0) 人氣()