個樣 out唔 out,見仁見智,不過冇時間去買過粒電,想玩都唔得添。 

ILIKE

執到寶

近日忙於搬屋,晚晚執嘢執到兩三點,人都癲(都唔知點解可以儲埋咁多嘢)!之不過,當中都有啲樂趣(苦中作樂)。例如,「兒時奢華玩具超合金」再次蒲頭,經「買嘢精同事」點算後,表示,「你今次發達,如果全部賣晒嘅話,應該可以買到一隻舊裝勞!」係就好喇。

 


@劉定邦 

「舊相一大籮」,本地試車海外試車,英美法意瑞典日本中國大陸,當年嘅「行家」,今日仍然係「行家」,不過就個個都開始中年發福;「舊科技產品」,其中一件係 Casio Wrist Watch( 2002年), 120× 120像素黑白灰影像,可以儲存 100個電話號碼!當然,以今日標準計,連手機都不如,不過,當年確係一件潮物,地位等同今時今日嘅 Samsung GALAXY Gear!

買手機送漫畫

考慮咗幾個禮拜,終於扑槌買 Samsung GALAXY Note 3。講真,買嘅原因絕非隻 Gear手錶,只不過係貪部機有 3GB RAM,用落唔易 hang咁大把。新機落地,自然乜都試吓,點知試到獨家內置 Samsung Apps Store竟然有驚喜!其中嘅「 ALLMAG S」,新用戶只要入番名同 password,就可以免費任睇任下載一個月(其後每月收費$31),有齊漫畫、電腦、汽車、足球、美容等過百款本地雜誌,張 list長到一個月都睇唔晒,最強係「玉皇朝頻道」,可以一次過下載番晒全套《神兵傳奇》同《龍虎門》,仲可以睇埋新出嘅《蒼天霸王》連載,真係漫畫迷天大福音。


除咗玉皇朝嘅漫畫,仲可以睇埋《蠟筆小新》,喺 Note 3度睇,真係爽呀。 

@林梓添 

有橋

最近美國耳筒品牌 SOUL出新耳筒 LOOP,搵咗 PSY做代言人,雖然好似 out咗少少,但係請埋「港版 PSY」錢國偉做廣告導演,即刻有番啲話題性。 SOUL仲專登搞咗個全球比賽,叫世界各地 dancers上載跳舞片上 YouTube,最多票數嘅可以飛嚟香港,同 PSY一齊跳舞拍廣告……計我話,其實廣告有泫雅跳辣舞就夠啦。


兩大 PSY攜手拍廣告,有 gimmick! 

@潘健文 

唔使學點玩

之前去咗睇 PS3遊戲《 Beyond:Two Souls》嘅發布會,已經話好想玩,終於等到上星期推出,除咗畫面同角色夠靚同逼真呢啲基本嘢之外,最抵讚係玩之前完全唔使睇操作說明,啲開閂門拎嘢同打鬥動作,全部用手掣右 analog掣跟住畫面方向郁就得,唔會因為要諗點操作,影響故事代入感。如果嫌《 GTA V》呢隻全城熱話嘅玩法太過自由或地圖太大的話,《 Beyond:Two Souls》就簡單直接好多,值得一玩。


遊戲並冇 game over概念,就算「做錯」決定或打輸咗場交,都只會導向另一條故事線,發展出廿三個唔同嘅結局。 

@周群雄 

text:科技組

全站熱搜

tvb4life 發表在 痞客邦 留言(0) 人氣()