CLOSE-UP

手機帶行山

踏入秋季,天氣乾爽,最適合行山郊遊。不過,好多人都話不識計劃行山路徑,無從入手。
想上山,其實可以借助科技力量,帶你行盡香港九龍新界甚至離島的山野,完全不用擔心迷路。
難得香港的港島徑入選《 Lonely Planet's 1000 Adventure》中亞洲區十大步行徑,未行過,點算香港人?

社交網站吹雞團

平時見到 Johnny,可能會以為他不愛說話,傾偈一句起兩句止;但一上到山,即時變成另一個人,話題滔滔不絕,想停都停不到。沿途所見, Johnny的確對山路非常熟悉,每條分岔路都講得出通去邊,甚至連行幾遠、沿路有什麼景致都如數家珍。
今時今日 Johnny可以帶幾十人行山,但原來三、四年前,他的行山同伴只得三、四人,皆因在他的生活圈子中,難搵同道中人。見其他人在網上搞行山活動, Johnny有樣學樣,與另一行山友 Eva開設行山群組「山野倩映」,每個月定期舉辦活動,義務帶網友行山,「中學時代開始已經鍾意行山,大大話話行咗十幾年,間唔中都會約埋幾個行山友四圍走;有時見行山友帶埋其他朋友出嚟,我就諗不如發大嚟搞,喺 facebook召集網友齊齊行,務求識到新朋友,大家開心 share。」
為了吸引「回頭客」, Johnny閒時熟讀各類山上資訊,例如植物種類、山草的藥用價值,更誇張到報讀相關課程,其中包括漁護署舉辦的生態導賞課程,以及山藝訓練班,「我同其他 facebook行山團最大分別係,除咗會自行計劃行山路徑,仲會沿途講解每棵樹、每個景點嘅資訊,等團友去完都覺得學到嘢。」


群組名叫「山野倩映」, Johnny話希望團友行山時,可以將大自然的「倩影」記入腦海。 

Johnny30+歲 物流公司職員有十幾年行山經驗, 2010年在 facebook成立行山群組「山野倩映」,召集網友一齊行山,甚至化身導賞團團長,教團友欣賞郊野風光。行過路邊見到棵花,都可以講餐飽。 

資深友都 Like

吹雞行山團不是新鮮事, Johnny話九十年代已經存在,「當時搞行山團多數刊登喺行山雜誌上,又或者漁護署搞導賞團,不過就冇乜宣傳。我都參加過幾次,但發現來來去去都係同一班人。」現時在 facebook搞團就簡單得多,路線資訊可以出得更加詳細,又可以即時同網友互動,更易吸引新人出席。好似他的群組,成立兩年已有八百多人加入,每次活動都有幾十人參加,「好多參加者第一次嚟,話以前驚上到山蕩失路,唔敢去,而家有人帶先肯上山。」
就連行開山的人,見人多勢眾,都會貪得意報名,「每次上山都會用手機 GPS記錄行程,行完將路線同相放上 facebook,再加埋其他網友事後吹水,搞到氣氛好熱鬧,有啲資深行山友睇完,都留言話估唔到呢條路有咁嘅靚景,仲話下次一定參加。」
Johnny話未有想過吹雞團的最終目標,只希望每次活動人數都可以創新高,「老實講,行山團係免費,亦都冇諗過賺錢,但睇番團友喺群組留言,見證通過行山可以建立到友誼,已經好滿足。」


Johnny話參加行山團的團友,各行各業都有,甚至一家大細齊來參加。 

每次行山都會用 GPS記錄行踪,事後仲急急腳放上網。 

為增添行山團趣味, Johnny事前都會做定大量準備,目的想團友「學到嘢」。

行山集團

除了 Johnny的「山野倩映」群組,網上其實還有不少行山團渠道,仲各有特色。說不定,單身人士仲因此可以識到另一半。

 

行山新手遊樂會
開宗明義吸納行山新手,每個月都會搞行山團,設計的路線均以平坦為主,每程最長只需三個鐘。網友亦會不定期搞行山團以外的活動,例如打羽毛球、踩單車、燒烤等。

Facebook關聯字:行山新手遊樂會

 

攀山遠足郊遊同樂會
除了行山遠足,群組仲會搞攀山及露營等活動,較適合資深行山友或愛刺激人士,不過,群組活動不定期,未必每個月都有活動。

Facebook關聯字:攀山遠足郊遊同樂會

 

香港行山全攻略(軍事遺跡探究)
專門組團到本港軍事遺跡如沙頭角、城門陣地等山上軍事舊址,模擬進行野外求生訓練,群組會聘請專業導師或導賞員,所以須繳交參加費。行程較為偏僻辛苦,較適合 hardcore行山友。

Facebook關聯字:香港行山全攻略

 

香討結伴遊
每月例行兩次行山團外,網友亦會私下搞特色團,例如,專睇日出日落、上山露營團等。網友更會分享山上所見所聞,以及遇到意外例如惡犬的應對方法。

香港討論區關聯字:郊野遠足

輕裝攝行


於八仙嶺拍攝的船灣,活像人間仙境。(由 Albert提供)( F11、 1/160s、 ISO 100) 

行山教條中,首推「走過不留痕」,就算大自然花花草草蝴蝶昆蟲幾靚都好,都不可以隨意破壞或帶返屋企。要記低動人風光,用相機就夠。想影低大自然美景留念,行山攝影達人有以下推介。

手機最自然

相約 Albert朝早九點上山影相,見面時見他一臉疲態,還以為他未瞓醒,言談間先知原來他剛去完西貢影日出!「今日天氣好好,唔會潮濕翳熱,啲風吹埋嚟好涼。而且今日吹東南風,可以吹散啲煙霞,天色夠晒藍,所以先走去影日出靚相!」
見 Albert揹住單反相機( Nikon D800)、三支鏡頭同腳架上山,認真辛苦,「我想影啲高像素相,喺 facebook上面吸引網友留意,等佢哋知道唔一定要出國先影到靚風景,所以先帶咁多器材行山,如果只係想影吓風景相留念,帶換鏡細機或手機就夠。」他說拍攝質素雖然不及單反相機,但最重要夠輕,因為行山主要都是想行得舒服,揹得太重好影響心情,而且影 snapshot亦未必用得着全套裝備,「如果用手機,仲可以用 apps執相,執完即刻放上 facebook就得,唔使搞到咁複雜。」


Albert30+歲建築材料採購facebook專頁「日出同行」創辦人,走遍香港的城市及郊區,發掘港人錯過的美景。 

用手機影相的最大好處是夠靈活,可隨時拎出來 snapshot,較易影到精采一刻。( iPhone 5s拍攝• F2.2、 1/1520s、 ISO 40) 

Albert行山時至少會帶三支不同焦距的鏡頭,包括標準鏡( 28至 105mm)、長鏡( 70至 210mm)及廣角鏡( 11至 16mm),見到都驚。

靚景路線

想搵更多靚景拍攝的路線, Albert建議三條不同難度的行山路線。

手機自由行


行山前下載定網友行山 GPS記錄,再用手機對照自己的定位位置,就算新手行山,都不怕迷路。服裝提供: PROTrek 

上山郊遊,未免一定要靠人帶路,亦可以搵手機 apps幫手,預先下載定行山路線入手機,現場再用 GPS對照路線,就不怕行山行到蕩失路。

 

上網問路
不少行山友行山時都會用 GPS手錶或手機 apps記錄行程,再將路線及時間等資訊上載 facebook搏 Like。一般而言,這些內置了地圖及定位資訊的記錄,都可以匯出成一個 GPX檔案,只要取得這個檔案,就可以用相關的手機 apps例如 GPX Viewer開啟,行山時只要開埋手機的定位功能,就可以睇到自己有無偏離 GPX檔案的路線。由於郊區上空無遮無擋, GPS信號接收良好,誤差通常只得幾米,絕對靠得住。

匯入方法 Step by step

以「雷利衛徑長征」網站( www.raleigh.org.hk/wilsontrail/race_route_big5.php)提供的衛奕信徑 GPX檔案為例,分別用 Android及 iOS手機示範匯入步驟。



GPX Viewer支援系統:iOS、 Android 

Android手機

 


Step 1用手機進入網站,緊按檔案的超連結,揀「 Save link」下載 GPX檔案,完成後開啟 GPX Viewer app。 

Step 2按右下角「 Menu」,揀「 Open file」,匯入剛下載的 GPX檔案。 

Step 3讀取路線後,行山時只要開啟右下角的「 Track」功能, app就會根據 GPS信號,定出目前位置,只要 GPS定位沒有偏離路線,就代表路線正確。

iOS手機

事前準備:
由於 iOS系統較難自由抄寫檔案入手機,所以事前要花少許功夫:如果 GPX檔案經由網友傳送,建議先上載至 Dropbox等雲端網站,再揀選網站「 Share」功能,然後複製超連結備用。相反如檔案已存在網上,就可長按下載檔案的超連結,然後揀「複製連結網址」(紅圈)備用。



Step 1開啟 GPX Viewer,按右下角選項。(紅圈) 

Step 2按左下角「 Open」,貼上事前準備好的 GPX檔案超連結,系統就會自動下載及匯入行山路徑。 

Step 3行山時,只要按左下角「箭嘴」(紅圈)選項,系統就會定出目前位置,然後沿着路線前進就得。 

家庭路徑

由港燈同長春社合作推出的手機 app,主要介紹適合一家大細的行山路徑,最貼心是內藏相關路線的生態及文物資料,自助生態遊必備。

 

綠遊香港

支援系統:
iOS、 Android

郊遊社交

類似 facebook同 Line的混合版, app會根據 GPS定位搵出附近安裝了相同 app的行山友,分享相片及即時通訊,亦可以下載網友提供的路線,非常方便。

 

Whaasa
香港遊
支援系統:
iOS、 Android

山之 GADGETS


帶埋高科技裝備,行山好玩得多。服裝提供: Columbia 

防水外套、背囊、防曬帽、行山杖、指南針、地圖、越野鞋……要講行山裝備,成本《壹週刊》都不夠講,而且每個人需求不同,好難一概而論。
反而行山 gadgets就易推介得多,最緊要有防水防塵耐撞功能,萬一甩手跌部機落地,都有個保障。

望遠攝  Sony DEV-50V


DEV-50V具備防水濺及防塵功能,雨中行山仍能正常運作。 

上得山,自然想睇靚景,靠肉眼,遠處花樹蟲鳥未必望得真。用 DEV-50V電子望遠鏡,可以輕易將遠處景物放大 25倍,好彩搜索到紫翅椋鳥或者金裳鳳蝶,更可即時㩒掣影相,或者拍埋 3D高清片,返屋企慢慢欣賞。
售價:$15,980
網址: http://www.sony.com.hk 

記低路線  POLAR RC3 GPS


燃燒了幾多卡路里都計埋,適合靠行山 keep fit的人士。 

行完山,返屋企想 post條路線上網威一下,又驚手機長開 GPS會無電,最好戴隻 GPS錶。 RC3 GPS夠慳電,充滿電可以連續使用十二個鐘,全程用 GPS記低路線,順便記錄埋速度、距離及海拔高度,甚至有埋表現評分, perfect!
售價:$2,880
網址: http://www.polar.com.hk 

第一身視點  GoPro HERO3+


就算部 GoPro綁緊頭頂,都可用遙控器開始及停止攝錄。 

用手機或相機可以影低沿途景物,但想拍片,無理由全程拎住部機,用 HERO3+加條頭帶,就可以將部機綁在額前,一路行一路拍低第一身視點影像。 HERO3+不單只體積減輕 20%(相比 GoPro HERO3),更內置 SuperView功能,攝錄時角度更 wide,可拍下更多景物。
售價:$3,880(連遙控器,頭帶另加$190)
網址: http://www.gopro.com 

五防影相  Pentax Optio WG-3 GPS


隨機附送登山釦,方便將相機掛上背囊或身上。 

 

靚人像  Sony XPERIA Z1


機頂耳筒位(紅圈)雖然不設保護蓋,但內裡其實設有防水膜,過澗時亦毋須擔心入水。 

拍攝像素高達 2070萬,採用與 DC機仔同級的 1/2.3吋 CMOS感光元件。早兩期 NEXT 3.0試過,影人像特別出色,贏盡其他同級手機。最正是 1.5米防水及防塵效能,可以全天候戶外拍攝,行山時可以落埋山澗影相,無得輸!
售價:$5,998( 16GB)
網址: http://www.sonymobile.com/hk 

頂得住  The Joy Factory aXtion Go


暫時只支援 iPhone 5同 5s,靠背面 Diamond Air防撞氣袋,卸走跌撞時的衝力。 

做戶外運動,未必人人願意花錢買多部三防手機,折衷辦法是買個三防殼。 aXtion Go不單防塵防水,更通過 MIL-STD810美國軍事防撞認證, 2.5米高度跌部手機落地,絲毫無損,最緊要是價錢比三防機平一大截。
售價:$388
網址: http://www.thejoyfactory.com 

 

只要在 Facebook以「 NEXT 3.0」為關鍵詞搜尋,或以手機的「 QR code」 app掃描,就可以睇到更多新聞同產品情報。

安全自保

以前去行山,會叫你帶齊地圖哨子指南針手機電筒同埋紙筆,萬一遇到意外,就可提高求生機率。不過,茫茫山頭的確好難搵,如果想縮短被救援隊發現的時間,可以用以下方法。

自動打卡


使用前需要先取得驗證碼,並在十分鐘內輸入。 

上星期香港通訊業聯會推出「 GPS遠足留蹤」功能,只要在 iOS或 Android手機安裝「郊野樂行」( Enjoy Hiking) app,用手機號碼登記及完成驗證手續後,以後行山前只要啟動手機 app,系統就會每隔十五分鐘,自動上傳用家的 GPS位置到通訊業聯會伺服器。即使途中收不到手機信號,都可根據最後留蹤位置,縮窄搜救範圍。用家不用擔心行蹤外洩,皆因資料只供搜救隊使用,而且七日後就會自動刪除。

短訊留位


漁護署在各主要遠足徑均設有標距柱 

無用智能手機,亦可用「 50222遠足短訊留蹤服務」,行山時只須定期用 SMS輸入附近的標距柱編號,再發送至電話號碼 50222,一樣可以縮短意外後被搜救的時間,路徑資料會儲存三日。
網址: http://www.cahk.hk/50222SMS/50222_SMS_chi.htm 

早知信號


睇法似 Google Maps的路況,綠色代表網絡質素良好,黃色則代表質素欠佳。 

想預先查知行山路線有無手機信號?可以上通訊事務管理局辦公室網站,詳細列明各區郊野公園遠足徑的流動網絡覆蓋範圍,仲會寫埋緊急求救電話位置,不過地圖未算太仔細,只能大概了解情況。
網址: http://www.ofca.gov.hk/tc/consumer_focus/mobile_telecom/country_parks 

即時睇位

想其他人即時睇到你的行山位置,可以安裝 RunKeeper跑步記錄 app,開啟即時追蹤( live tracking)功能,就會實時將身處位置上傳 RunKeeper網站,親朋戚友只要登記成為免費會員及將你加入朋友名單,就可以隨時睇到。不過,上傳位置功能屬付費服務,年費 19.99美元(約$156)。
網址: http://www.runkeeper.com 

閃燈求救

萬一發生意外,如身處地點接收不到任何信號,可嘗試用手機補光燈。根據國際緊急求救方式,是一分鐘閃燈六次,大約每十秒閃一次。由於部分手機未有提供獨立開啟補光燈功能,最好預先安裝定例如 Flashlight等手機 app,就毋須一定要影相先開到閃燈,避免浪費手機電力。


text:科技組
photo:攝影組

全站熱搜

tvb4life 發表在 痞客邦 留言(0) 人氣()