新服務淨係 Sony手機先用得,傳媒自然追問八達通 CEO張耀堂其他品牌幾時先用得,但佢只係猛答「搞緊」,連時間表都未有,睇怕佢明年一月退休,都唔慌搞得掂。 

IGOSSIP

嘟 Sony俾錢

講咗好耐嘅手機 NFC付款,喺香港終於又邁進咗一小步。繼滙豐、恒生之後,八達通聯同 PCCW推出流動支付服務,首階段有五千個名額,不過就一定要用 PCCW台同埋 Sony嘅手機( Xperia V、 Z、 ZR、 Z Ultra同埋 Z1)。如果已經用緊 PCCW同上面嗰幾部機就易玩啲,否則又上台又出機,條數都幾襟計。

 

如果已經用緊 PCCW同上面嗰幾部機就易玩啲,否則又上台又出機,條數都幾襟計。點解只係得 Sony機先用到?八達通回覆話每個手機品牌嘅 NFC訊號都有啲唔同,要逐步解決咁話。點知問番 PCCW嗰邊,負責人竟然抽佢後腳,話 Sony、 Samsung手機都係咁搞,好似佢哋為恒生整手機付費,就兩個品牌手機都做到,今次揀 Sony,應該係純粹商業決定咁話。其實八達通為賺錢,好易理解啫,使乜咁避忌呢?搞到好似狼英咁俾人篤爆,好瘀囉。

網上搵高音


馮禮慈(右)搞咗高解析音樂網購五年,問到佢邊間唱片公司最積極,佢即刻好似上台領獎咁,好認真去數,話怕數漏咗會對唔住班有心搞好音樂嘅人。 

Sony上個禮拜出咗一堆高解析度音訊( Hi-Res Audio)器材,所謂高解析,即係用咗 96kHz/24bit編碼率嘅音效,音質好過普通 CD多多聲。不過,就算有器材,又可以去邊度搵高質素音樂檔案聽呢?原來除咗去 iTunes Store,香港亦有個 HiFiTrack網站可以買到,而且仲有大量本地歌手嘅作品添!問番創辦人兼樂評人馮禮慈,佢就話五年前開始搞嗰陣,好多唱片公司老闆都未知係乜,知嗰啲又有人怕搞下載音樂會影響賣碟銷量。直到而家網上買歌咁盛行,都竟然只係得環星、金牌大風、雨果唱片、 New Century Workshop呢幾間好積極提供高質音樂。連唱片公司自己都唔搞好音樂,甚至仲 out到懷疑網上銷售會影響收入,難怪早排周啟生都話香港樂壇已死

直下 Facebook片

成班人出完活動,好似今期 Close-Up咁去完行山團,有團友拍完片放上 Facebook,想下載可以點算?除咗直接問對方攞,或另裝軟件 download,其實仲有簡單啲嘅方法。只要喺個短片 post上嘅日期位置右 click,揀「複製連結網址」,然後再將連結貼上瀏覽器嘅網址列,同埋將連結嘅「 www」改為「 m」,之後就會跳到手機模式瀏覽版面,播片後再喺短片上右 click,選擇「將影片另存為……」,就可以下載到段片喇。


Step1喺段片日期(黃框)上右 click,再複製連結網址。 

Step 2將連結貼上網址列,再將「 www」改成「 m」(黃框),下載短片不求人。 

text:周群雄、林梓添

全站熱搜

tvb4life 發表在 痞客邦 留言(0) 人氣()