無患子的果皮含天然皂素,可用作清潔劑,佛家還用它的果核,做成唸珠。 

壹知全解

去污果子

潮流興環保,最近唔少綠色網友就勁推一種叫「無患子」嘅天然果實,話佢具有神奇嘅去污功能,乾淨程度拍得住洗潔精,但就唔傷皮膚。唔單只咁,呢種貌似龍眼嘅物體,仲可以代替洗頭水、沐浴露,做埋洗衣粉都仲得。嘩!咁一粒無患子咪可以同時滿足唔同嘅願望,係真唔係呀?

 


此棵位於花墟公園公廁旁的無患子樹,已結滿熟透的果子。 

因為有濕疹,鍾意用天然嘢嘅 Kim,就話無患子好掂。「佢嘅果皮、果肉有好多黏液,只要壓碎用水搓幾下就會有泡。如果用嚟洗碗、洗衫,可以先將幾粒無患子壓爛放入煲湯魚袋,加少少水,就直接用得,洗完嘅衫亦特別柔順。
「但如果用來沖涼呢,我就鍾意煲無患子水,一來方便啲,二來泡沫會更加豐富。只要將十五粒無患子,加一公升水,煲十分鐘,之後再倒入唧唧樽,咁就可以隨時唧出來洗頭、沖涼。」自從兩年前, Kim全線改用無患子後,連濕疹都拜拜。
小記聽完,都心思思想試,但上網查過,平均要八毫子至一蚊粒,雖則每粒可以重複使用兩、三次,不過,小數怕長計。幾經打聽之下,原來界限街花墟公園都有兩棵無患子樹,而且近排係結果嘅季節,有唔少無患子已經熟透跌落地,隨手都執到幾十粒。

果皮含皂素

小記將執來嘅無患子用來清洗碗碟,只係輕力一壓,已經爆開,加水搓幾搓果然立即起泡,好快就將碗碟洗得乾乾淨淨。究竟無患子係乜東東?點解有咁強嘅潔淨能力?
理工大學應用生物及化學科技學系科學主任陳志安博士解釋,無患子嘅果皮含有皂甙(音︰代)類( saponin)成分,包括無患子皂甙 A( sapindoside A)、無患子皂甙 B( sapindoside B)等,皂甙係一種好好嘅天然表面活性劑,能夠將油污帶走,發揮清潔功能,同時亦有抗菌、殺蟲、消炎等作用。
另外,因為由無患子果實加水所得出嘅清潔液係偏酸性嘅(帶陽離子),能夠中和衣物纖維嘅負電荷、減少衣物纖維間嘅摩擦,因此令衣物變得柔軟。不過,如果用來洗衫,就要留心,因為無患子嘅黏液有少少棕色,有機會將白色或淺色衣物染黃。
聽完博士解釋,係咪好想親自感受一下無患子嘅神奇威力呢?俾個貼士大家,除咗花墟公園,中環遮打花園、大埔圍頭村村校舊址附近,都搵到無患子樹。不過,想執到免費嘅無患子就要快手,事關呢種植物每年九月底開始結果,十月中旬至十一月底就會成熟陸續掉落地,手慢就要等明年喇!


撰文:沈雅詩 
攝影:吳卓凡、許朝暉

全站熱搜

tvb4life 發表在 痞客邦 留言(0) 人氣()