Peter Lam瞓身宣傳香港,連張香港身份證都照派通街。 

中環人語

林建岳 ID通街派

岳少做嘢出名小心,不過,老馬都有失蹄時。小宗有個老友記,打算喺廣州富邦廣場租個鋪,要攞業主資料去註冊,呢個商場業主為林建岳間麗豐,老友睇一睇佢哋提供嘅資料:「咦,無眼花嘛,呢張咪林建岳嘅 ID?」小宗核對過岳少身份證冧巴,無花無假。呢張副本已經有啲模糊不清,相信係經過多次翻影所致,唔少商戶都有喺手。不過,依然清楚睇晒所有資料,同岳少好嚴肅嘅「證件樣」。

 


身份證傳到去小宗度,雖然已經唔多清楚,但至少仲見到岳少個「證件樣」同冧巴。 

翻睇年報,呢個富邦廣場,由麗豐( 1125)持有商場及停車場部分,位於中山七路,有好多香港品牌都喺上面開店,好似稻香、大家樂咁,著名足球評論員丁偉傑,都喺度開咗間 CAFE「丁•煮場」,佢仲會喺度講波。以麗新系喺內地有咁多物業,唔知張證已經傳到去邊呢?
岳少做咗旅發局主席,拋個身出嚟宣傳香港,以表親民係好應分,但身份證呢啲嘢,涉及私隱,都唔使「周街派」嘅。

六星戰隊「納財」好日子


呢六個老闆,本來唔多熟口面,但擺完甫士,成支六星戰隊咁,又吸到鏡頭喎。 

上星期五,六間公司齊齊上市,一字排開敲響銅鑼;咁熱鬧嘅情況,未試過。一般程序,上市公司會委託投資銀行揀日子,再幫佢哋向港交所申請。而港交所發言人就同小宗講,同日幾多間上市,根本無限制;收到要求後,只會通知大家當日有幾多公司上市,至於仲堅唔堅持同日逼,就閣下自理啦!
咁多人都揀呢日,唔通真係好日子?小宗好認真咁問過麥玲玲、李丞責同蘇民峰三位師傅,三位都話今年農曆九月好少大吉日,尤其係頭半個月,只係得初七(即上星期五)嗰日適宜「納財」;「納財」,即係進行集資活動啦!十月份又係傳統股市淡季(嗱,過去好多大股災都係喺十月㗎)!咁上星期五,就真係「無選擇中嘅選擇」。的而且確,六隻新股都受到投資者捧場,上星期開市後,升幅唔錯。不過,李丞責補充,從「董公擇日」嘅角度,當日上市的公司日後容易損財,人丁不旺喎,投資者要見好識收啊!

報業前輩買少見少


報業前輩岑才生見證香港六十年來嘅發展而多所參與,值得誌記其人其事者。 

報業老前輩岑才生先生行年九十有一,佢自一九五三年起即加入老爹岑維休喺一九二五年創辦之《華僑日報》;自此除咗出版報紙,佢仲參與過不少公職,防癆會、公益金、消委會、市政局、區議會等都有佢份,又出過力創辦中文大學嘅前身聯合書院;退休後出錢出力為港大、中大推動傳媒教育;其瓣數之多、歷時之久,搵勻全個特區,堪稱少見。
可能因為咁,佢嘅舊部友好於是出版咗本《岑才生服務社會六十年特刊》誌記其人其事。岑翁咁嘅前輩買少見少㗎啦!

Give me a break: OL自拍保私隱


話時話,要客人自己按 shutter拍照,點令 shutter收得好,唔入鏡,都好考功夫。(嚴寶權攝) 

用 iPhone、 Samsung手機玩自拍就玩得多,有無試過直情喺間 studio,用埋專業相機玩自拍?最近小宗發現有間叫「 PHOCUS」嘅自拍 studio,無老闆在場,亦無攝影師,玩家自己 set好部相機,就用遙控 shutter按掣影相,你影啲咩都無人知!老闆 Lawrence話,自拍照相館喺外國一直都有,「我哋初步教識玩家用啲器材,就俾間房玩家自由發揮,無外人睇住,啲 pose好有創意,笑容都特別真摰!」
Lawerence騷咗幾張客人影嘅照片俾小宗睇,相中人由一歲到八十歲都有,而最多梗係鍾意「趁青春留倩影」嘅 OL:「佢哋玩完,又會帶埋屋企人嚟影全家福,仲試過有公公婆婆著晒動物衫嚟影相!」收費每小時二百九十八蚊兩位,每加一位九十八元。照相館提供咗唔少道具,不過都係氣球、假髮、動物衫等等,普通咗啲,計小宗話,如果女嘅可以扮吓港姐冠軍、男嘅扮吓 Steve Jobs,就過癮好多!

金牙大狀講嘢


人力雙陳要食砒霜杜老虎,制裁菲傭來港。佢哋同香港人有仇乎? 

食砒霜杜老虎
人力陳偉業及陳志全話要立法制裁菲傭來港,嘩眾取寵,莫此為甚。特區以行政為主導,以私人法案上立法會,先要得到 689首肯。即使佢 IQ零蛋,都不至於蠢到同全港中產為敵啩?就算俾呢條私人法案上到立法會,通過嘅機會亦近乎零。可見人力雙陳此舉純粹志在抽水而已。
香港係自由港,上一趟貿易制裁應該係限制阿根廷金錢肚入口。冇計啦,當時我哋仲係大英屬土—— those were the days!——阿根廷搶奪福克蘭群島,我哋冇得唔制裁。但咁做嘅直接後果係要食貴價牛雜。好彩呢場仗速戰速決,冇耐就取消制裁,大家有得食番平靚正嘅牛雜。
現今家務助理業已人手短缺,仲話唔俾菲傭來港做嘢,人力雙陳同三、四十萬中產家庭有仇乎?練懶學精香港人就叻,食砒霜杜老虎?你人力雙陳食多份啦!

中環人語迷你版

“有心囤地就唔會只係買一次。”
估中邊個中環人講呢句說話,送你 JWATCH J-37水晶版藍寶石鏡面限量版手錶一隻
有意參加者,請於十月十六日(星期三)下午一時後,將答案、姓名及聯絡電話電郵至 mailto:centralman@nextmedia.com
小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉

“通常家長排隊攞申請表,都係香港一般嘅正常行為。”
答案:吳克儉
得獎者: Lee Far
中獎時間: 1:00pm 9/10/13

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!
爆料熱線/whatsapp:6829 5929

全站熱搜

tvb4life 發表在 痞客邦 留言(0) 人氣()