慢必陳志全試玩蓮步舞「泛民入閘」嗰關,點知玩到跌落地,快必即刻話︰「都話冇腰骨嘅人先過到㗎啦!」(郭永強攝) 

八卦陣

政改三個字:全民提名

佔領中環第二個商討日( D Day 2)遍地開花,但人民力量話擔心佔中三子喺政改問題上妥協,於是搞咗個佔中後援會,名為「後援」,實乃「監察」。快必譚得志仲借用咗「不予置評」係咪加入政府嘅馮煒光金句,講明政改方案只有「三個字」︰全民提名!

 


長毛挑戰全民提名急口令,但佢唔係乖乖哋照住讀,而係不斷重複「梁振英仆街」,圍觀嘅市民聽到不知幾興奮。(郭永強攝) 

佔中後援會星期日喺旺角擺街站,用蓮步舞、急口令同埋問答遊戲宣傳政改。蓮步舞嘅設計好有意思,最高層次係「全民提名」,人人都過到;次一級係「咸淡水難分真假方案」,雖然模稜兩可,但可勉強接受;去到腰部嘅「泛民入閘」,快必話真係有啲腰骨都過唔到,不過曾經選過特首嘅民主黨議員何俊仁應該冇問題喎;至於最低層次嘅「中共欽點」,真係諗都唔使諗,爬都爬唔過。
人力成員、「鑽石山民主女神」譚香文好玩得,挺晒胸、收晒腹打頭炮示範,吸引唔少中年男士停步影相,搞到女神都有啲尷尬!不過點都唔夠長毛梁國雄吸引,佢一嚟到就全場起哄,人人爭住同佢握手,佢一路重複「梁振英仆街」扮講急口令,已獲全場喝采!民意係點?好明顯啦!
長毛仲話,今次政改關鍵唔係電子公投,「唔通市民又嚟個電子佔中咩!」想有實際成果,佢建議何俊仁辭職,變相公投,「如果何俊仁今次肯辭職,我嗌佢聲阿哥,嗌佢阿爺添呀……我哋依家要大佢,如果大佢唔到咁點呀?」台下答︰「小佢囉!」

貧富  D Day 2

近排唔少團體、界別忙於搞佔中商討日,金融界嘅商討日本月二十六號舉行,估計超過一百人參加,但係佢哋搵場地遇到啲困難,好多地方聽到「佔領中環」四隻字就驚驚。不過,搞手之一錢志健最終都搵到蘭桂坊一間餐廳,希臘人老闆肯平租俾佢哋,佢哋呢兩個禮拜都會搵一日上去幫襯,食住晏傾佔中。所謂「平租」其實都唔平,要成萬五蚊,所以佢哋煩惱緊點樣可以籌款。
同一日,左翼廿一亦都會喺中環長江中心對開空地搞商討日,同其他團體搞嘅商討日有啲唔同,會特別討論佔領中環可以點樣幫到民生同基層嘅問題。左翼廿一嘅黃永志話大概有幾十人參加,但未諗過預算問題,預計喺街頭搞唔使好多錢。佔中商討日真係可以平有平搞、貴有貴搞!


左翼廿一同金融界好唔同,佢哋反對資產階級,曾經發起杯葛長和系商鋪,不過兩者同一日為佔中舉行商討日。(鄒潔珊攝)

金融界商討日之前兩個星期,錢志健(後右一)約埋戴耀廷(後右四)同一班同道中人,喺同一間餐廳一齊食晏傾佔中。(鄒潔珊攝) 

民主黨賣假畫 道歉回水

《壹週刊》個名出現喺左報,通常唔慌好嘢。話說上期本刊報導,本月四日民主黨籌款晚宴拍賣一幅聲稱係著名國畫大師黃永玉嘅畫作《花鳥》,底價十五萬,最後由前商務及經濟發展局長馬時亨以「超值價」三十萬元投得。
當眾人議論紛紛話肥馬執到寶之際,本週一《大公報》以 A2三分之二嘅版面報導,話幅畫原來係贗品,並引述黃永玉個仔黃黑蠻話睇完上期壹仔之後,即刻向該報爆料,指佢三年前已經鑑定過幅畫係偽作,唔明白點解又再拎番出嚟拍賣。
查實何俊仁上星期已講到明,幅畫係一個收藏家好友捐出,因為唔方便出面捐錢,唯有捐畫俾民主黨籌款。呢位好友係邊個佢就唔方便講。最慘係何俊仁冇搵專家鑑定幅畫真偽,只能夠講佢真係 so pure so true啦!
民主黨發表聲明,話事前對畫作屬偽冒絕不知情,獲黃永玉家人告知畫作屬偽冒後,會向馬時亨全數退回款項並致歉。馬時亨相信民主黨乃無心之失,佢自己都唔係好識國畫咁話。


民主黨籌款晚宴拍賣嘅黃永玉《花鳥》畫作,原來係贗品,民主黨唯有退番錢俾馬時亨,今鋪見財化水了!(蘇智鑫攝) 

九十歲嘅黃永玉(左),真跡拍賣價幾百萬至近千萬都有,佢個仔黃黑蠻就力指民主黨三十萬成交嘅《花鳥》係假畫。 

中聯辦的禮物篩選機


當人人以為西環擅長篩選特首候選人,原來篩走禮物都有一手,失敬失敬。 

自張曉明上場後,中聯辦擺出緊跟國家主席習近平路線嘅反貪腐姿態:「厲行勤儉節約、反對鋪張浪費。」端午節嗰排仲特登上載通告至官網,強調節慶期間拒收各類食品同果籃,扮吓清廉。話雖如此,唔少政商界人士同中資機構依然唔多聽話,剛過去嘅中秋節依舊「送」禮如儀,有啲送月餅券,有啲叫下屬拎埋月餅走入中聯辦。
為免任何人偷運成功,做壞張主任規矩,中聯辦出動本身用嚟做保安用途嘅 X光機,人人行入中聯辦,都要將手頭物品交俾職員,先過一過部 X光機,一旦發現月餅類物體,就即刻話「我們不收,拿走拿走」。據聞有唔少月餅過唔到呢部「篩選機」,被打回頭,難為啲負責送禮嘅跑腿,又要拎番啲月餅返公司。
查實中聯辦一早講明唔收禮,平時聽晒阿爺支笛嘅各路人馬,點解係都要送呢?唔通真係改唔到呢鋪壞習慣?


全站熱搜

tvb4life 發表在 痞客邦 留言(0) 人氣()