同你吟一吟

陳浩民老婆大晒

剛剛响九月尾榮升第二任老豆嘅陳浩民,一女一仔,湊夠個好字,同太太蔣麗莎三年抱兩,陳太個肚睇怕可以收得工。
太太唔話得,陳浩民幫手做湊仔公、柴可夫當然唔少得。上星期二(十月八日),剛剛度過四十四歲生日嘅陳浩民,一家四口加兩個工人現身中環 high tea。陳太得 28歲,勝在後生,未坐完月已經可以孖住老公四圍走。知道老婆辛苦,去到餐廳叫嘢食,陳浩民主動幫手抱住仔仔璟軒,等老婆開飯先,之後食飽去攞車,又幫手抱住大女雅薷。

 

到第二日(九日),《壹》仔又見到陳浩民,車住老婆落荃灣買餸,老友麥長青就揸住另一架車同行。
老婆入咗街市,陳浩民就將架車停埋一邊開餐食外賣粉麵,不過現場係雙黃線,冇幾耐就俾差人趕車,好在有麥包,幫手照顧住啱啱買完餸嘅阿嫂,等陳浩民兜完個圈返嚟,就接老婆走人。
試過响橫店強吻陳嘉桓,搞到老婆大住肚陪佢開記者會公開道歉,今日陳浩民修心養性做老婆奴,八珍都希望佢真係浪子回頭,做個廿四孝好老公。


抱完阿仔再抱囡囡,陳浩民湊仔公上身,唔使老婆操心。 


開餐前,遇見阿婆叫捐錢,陳浩民放低張紅衫魚,阿婆豎起手指公俾 like。


陳浩民俾差佬趕車,好在有麥長青喺度,幫手照顧住阿嫂,再帶佢搵老公。 

另一日,陳浩民做司機,車老婆去荃灣買餸,仲停架車响雙黃線(箭嘴)食麵,再用木筷子撩牙。

撰文:八珍

全站熱搜

tvb4life 發表在 痞客邦 留言(0) 人氣()