插手古惑騷 蒙嘉慧踢走索女嘉賓

探熱針

阿嫂話事 插手古惑騷 蒙嘉慧踢走索女嘉賓

鄭伊健下月初將率領一眾古惑兄弟陳小春、謝天華、林曉峰以及錢嘉樂到紅館開《歲月友情》演唱會。相隔十七年,為呼應《古惑仔》情節,演唱會構思邀請在戲中先後做過浩南女友的舒淇、黎姿以及李嘉欣等做嘉賓。可惜今時不同往日,古惑仔全部娶晒老婆變古惑佬,嘉賓名單要得一班阿嫂同意,尤其在年初攞正牌做麵嫂的蒙嘉慧,做管家婆插手演唱會,加上有小春嫂應采兒幫口,性感女神舒淇、魔鬼身材徐若瑄以及回復單身的陳法拉全部唔過關,被叮走冇得上台。

貼身膏藥

鄭伊健近日積極為演唱會練大隻排舞,就算四十六歲生日當天都無休息,日前下午兩點,陳小春、林曉峰,謝天華以及錢嘉樂到九龍城排舞室綵排,古惑佬位位年過四十,就算跳舞出身的陳小春亦要間唔中停低休息扯煙。一小時後,伊健白色保母車抵埗,婚後名正言順做貼身膏藥的麵嫂蒙嘉慧先行落車,尾隨的伊健跟老婆 say bye後,才上樓加入大隊跟住跳。
電影變身演唱會,一班古惑佬有意邀請在戲中出現過的幾位「浩南嫂」現身玩集體回憶,包括已榮升做闊太的「細細粒」黎姿,以及跟浩南有過床戲的許太李嘉欣,不過伊麵日前爆響口,指兩位富貴媽咪上台零機會,反而單身的舒淇則大有機會亮相。


為演唱會排舞,伊麵遲到一粒鐘外,幾個古惑佬都由兩點跳到八點,同是煙民的小春跟謝天華都在休息時扯番口醒神。 

日前下午三點,麵嫂陪老公開工,校啱時間接放工,黐到實。 

全部被 out

話就話舒淇有份,但據了解,蒙嘉慧積極在背後搞小動作阻止:「見黎姿同李嘉欣嚟唔到,都估到一定搵舒淇,但有四晚咁多,唔可以得一個嘉賓,大家有諗過搵陳法拉,佢識跳舞唱歌,同 Michael(謝天華)合作過,做嘉賓應該冇問題。不過 YoYo(蒙嘉慧)知道後唔多 like,一時話舒淇唱歌麻麻地,一時又話陳法拉同古惑仔拉唔上關係,總之乜都反對。其實大家都心照,當年舒淇同伊健傳過緋聞,法拉而家又單身, YoYo梗係唔想班索女埋到老公身,加上小春嫂(應采兒)都好忌呢味嘢,兩個咪齊齊夾攻 ban橋囉。聽講後尾有諗過搵徐若瑄,不過都過唔到關,所以到而家都未落實到嘉賓。」知情者說。
未雨綢繆防小三,除背後發功插手老公工作外,無工開的蒙嘉慧更做埋柴可夫司機,早前就被發現在錄音室呆等老公五粒鐘至凌晨一點,然後齊齊返屋企。當日伊健排舞到八點,麵嫂又校啱時間返回九龍城接收工,撇甩一班兄弟兩公婆去撐枱腳,蒙嘉慧分秒必爭,繼續行人盯人政策。


小春怕老婆出晒名,應采兒生埋小小春後,他對老婆更千依百順。 

演唱會玩集體回憶,早前五人就特登拍 MV錄歌,在記者會更大玩伊麵,催他生 B。 

舒淇跟伊麵拍《古惑仔》時傳過緋聞,月初伊麵生日,舒淇依然有在微博恭賀。

李嘉欣當年跟伊麵拍過床上戲,不過嫁入豪門後,許太亦擺明揀 Job先做。 

做了闊太的黎姿跟麵嫂老友鬼鬼,就算做演唱會嘉賓,相信亦不會被 ban。 

全天候監控

一紙婚書未必令女人安心,就算有埋仔女,對「小三」依然高度戒備,要箍住另一半,圈中人妻均想盡辦法,甚至犧牲私人時間進行全天候式監控。

 

黎耀祥
憑柴九彈起成一線小生,甚至傳出跟鄧萃雯戲假情真,原本做 OL的黎太決定辭職,全職做司機兼貼身保母照顧老公,以防有女埋身。

 

馬德鐘
緋聞多到數不盡的馬德鐘,數年前老婆張筱蘭在法國取得博士銜頭,馬上回歸香港坐鎮,無論大小場合都陪住馬德鐘恩愛現身,早前更大鑼大鼓慶祝結婚 20周年,無非以大婆姿態趕絕小三。

 

陳浩民
大部分時間在內地拍劇的陳浩民,繼狼吻陳嘉桓搞到滿城風雨,未幾又傳出在橫店翻撻舊愛佘詩曼,老婆蔣麗莎索性帶埋女兒到橫店𥄫實老公開工,分秒不能鬆懈。


撰文、攝影:娛樂組

全站熱搜

tvb4life 發表在 痞客邦 留言(0) 人氣()