潮𡃁便當

串味行

秋涼總會想起 BBQ,但唔鍾意戶外餵蚊的世代可能難啲成行,串燒或者最合乎民意,以來自日本的南蛮亭為首,鹽燒、川燒都有齊,其中一間仲有露天座位,唔到郊外都有 BBQ feel,仲唔快啲 call齊朋友串味同行!

 

總店在東京六本木,南亭 6年前因租金問題全面撤出香港,轉戰上海、廣州,至上月終於回歸香港,選址恩平道樓上店。一到店內,就見到舞台式串燒台在店中央,有 20多年燒物經驗的師傅 KK十足一個表演者,客人可觀賞他利落灑鹽、串燒運諸雙掌的功力。串燒包括牛舌、雞翼、羊架、白鱔、蠔等等,正路當中亦保留本店特色,如雞翼中釀法國鵝肝及芝士, KK更說,店的串燒爐來自日本,可加熱至 980度,確保串燒夠熱卻保持 juicy,調味料方面非常簡單,卻特選來自青海的湖鹽,間或用上白胡椒,一切恰到好處,唔會太鹹太乾身!推介各位必試牛舌、芝士年糕及廣島蠔。


店中央是師傅 KK的舞台,客人面前表演不怯場。 

燒白鱔$50皮脆肉嫩,鱔味尚算可以。 

芝士年糕$45微脆軟綿綿加埋流心芝士,要學台灣人講:口感好 Q彈! 

鵝肝釀雞翼$50雞翼內釀入法國鵝肝,冇花冇假! 

 

食客  Susanna
日本料理店經理
我好多年前已經食南蛮亭,𠵱家知佢新開,見到係 KK執掌串燒,就知係好嘢!

點評

食物★★★★★主力提供串燒,大部分串燒夠水準。
環境★★★★唔會好大油煙味,座位有空間感唔迫。

 

南蛮亭
銅鑼灣恩平道 42號亨利中心 6樓
2911 0099
營業時間: 12nn-2:30pm; 6pm-11:30pm

露天串燒店 鹽燒秒殺味蕾

食串燒至怕一陣油膱味,有戶外座位嘅串燒店就 perfect,加埋海風送爽,成班 friend吹水啤啤佢至啱!講緊的是位於尖東、有 60個露天位的樂燒遙,可能好多人都嫌尖東唔夠潮,但偏偏呢度座位夠寬敞,不少店鋪都可以露天而坐,感覺好 casual,笑都笑得大聲啲。
串燒款式大路,如雞軟骨、牛舌、豬頸肉等,以鹽燒為主,重慶燒強烈的孜然粉香氣找不到,不以重口味調味跑出,全靠材料、燒烤功夫見真章。當日一試普通不過的牛脷,卻覺得肉汁分外的香濃,唔會乾巴巴;蠔亦有心思地捲上煙肉,成功秒殺味蕾!


鹽燒牛脷$28/串肉地厚身,肉質 juicy,一入口攝影師同我即大叫正! 

秘煙肉燒蠔卷$25/隻廣島蠔肉汁鮮味,配鹹香煙肉及秘製甜燒汁更增風味。 

蒜茸燒蟶子$58/隻蒜香秒殺口腔,成晚都齒頰留香。 

燒菠蘿$20加咗話梅粉,入口偏酸,勝在菠蘿甜爆汁水中和番。 

 

食客  Ami& Yuen Lam
我哋好鍾意呢度嘅 open area,𠵱家一個星期嚟 4日。

點評

食物★★★★主力提供串燒,味道較重,牛舌、蠔、蟶子必試。
環境★★★★★露天開揚又有風,夠哂 relax。

 

樂燒遙
尖沙咀麼地道 75號南洋中心地下 24-25號
2312 0628
營業時間: 5pm-2am

街店入鋪 燒過界鵝肝

以前在碧街坐到成街都係人的好燒式,多月前正式搬入鋪內,座位更多,環境更正。學西廚出身的店主 Ki,除了主力燒物,亦心多多玩埋西菜甚至多國菜融會,但就以平民價錢出售,好似店內有售鵝肝多士,$68兩大片,仲有燒乳鴿、龍蝦、牛小排及泰式燒豚肉等等,上菜時 setting仲似足西餐,完全唔似身在油麻地,成班朋友 MK行完街,行過少少擦餐勁 ok!


串燒屬大路款,價錢多間中至抵! 

芝士龍蝦時價肉身甜美,芝香四溢,簡單好吃。 

香煎鵝肝$68大大片香煎鵝肝,抵食。

 

食客 阿康
副學士學生
選擇夠多價錢相宜,坐得都算舒服!

點評

食物★★★★除了大路串款,仲有海鮮乳鴿食。
環境★★★地方企理,座位夠多。

 

好燒式
旺角砵蘭街 110號地鋪
2332 9595
營業時間: 5pm-3am

新派川燒 鬼馬朱古力蠔

旺角染布房街可能是玩嘢之街,既有新派點心食,𠵱家又輪到新派串燒,主力提供川式串燒的安安燒,串燒款式跟坊間大同小異,特別在是店內有款朱古力蠔,用上美國及瑞士 2種朱古力醬溝成,味道見仁見智,蠔身肥美,如果唔想咁激,店內亦有芝士、蒜燒蠔,值得一試。另外亦有大粒墨魚嘴、海膽墨魚串等,並非川燒式一味孜然粉,同行朋友唔好重口味,呢度就啱!


朱古力蠔$52/3隻味道新奇,八卦精點都要試一次。 

棉花糖夾餅$12利口小食,簡單好食。 

海膽墨魚串$36海膽鋪上面再燒,鮮味 double up。 

沙茶醬燒深海大墨魚嘴$27/串沙茶醬經過調配,惹味非常。 

點評

食物★★★★有朱古力蠔、海膽墨魚串等特別款,大唔透朋友要試!
環境★★★地方企理,座位尚算舒服。

 

安安燒
旺角染布房街 6號地鋪
2617 2220/ 6532 3134
營業時間: 6pm-3pm


撰文:梁智欣
攝影:黃家活

    全站熱搜

    tvb4life 發表在 痞客邦 留言(0) 人氣()