張兆輝 50不必輝煌

張兆輝,從來都是腳踏實地的一群。

20歲,藝訓班畢業一年,同學包括梁朝偉、吳鎮宇,已進擊戲劇組,他則樂於做他的「活力先生」。

30歲,張兆輝已是當家小生,月薪卻只得九千大元。

40歲,離開無綫兩年,與太太一條心搞美容生意,又成了杜琪峯大軍中堅分子。

今年50歲,張兆輝仍有當小生的條件,在《神鎗狙擊》當「男一」,但他說:「一年一個劇已經夠我過吓癮,我想有多啲時間陪我啲仔女。」

說他「知天命」,老土了點吧!有貝沙灣豪宅揸手,生意蒸蒸日上,才是唔憂做的原因?「一早我已經信唔可以一步登天,每樣嘢都係一步步嚟,到我呢個年紀,係收成期嚟啫。」

在五光十色的娛樂圈浸淫三十一年,張兆輝仍安於林中,才是真正高手。

 

Daddy之樂

鏡頭前,張兆輝的戲、演了大半生,他坦言現在最享受是鏡頭後當爸爸這個角色。「我話拍劇,我個仔同個女仲興奮過我,之前睇到播《神鎗》promo,本來我喺房o架,聽到個仔喺廳話:『Daddy、Daddy,你快啲出嚟睇啦!』個女就入埋房拉我出廳,哈哈!我就話:『係呀!我哋下個禮拜一齊睇囉。』」

說時張兆輝一臉欣慰,還連忙補充:「我個仔好鍾意鎗o架,男仔吖嘛!佢識鎗仲叻過我,會話我知邊支係Sniper rifle。」

張兆輝與太太郭碧妍結婚十六年,育有一子一女,有活動也是舉家出席。

因為物質豐富?「唔係!佢十歲我先送第一支鎗畀佢,一嚟危險,射親阿妹射親人都唔好;二嚟我要佢識珍惜,太易畀佢,唔得掂。」

張兆輝不諱言,對現年十四歲的兒子張焯鏗較嚴厲,對九歲的女兒張卓姿則呵護備至。「係呀!阿爸教落,男仔係要tough啲。出到街,你有冇見過啲人幫男仔搬嘢吖?女仔就要照顧多啲,我個女仲好黐身,我做嘢晏啲返屋企,佢就會WhatsApp問我:『做乜仲唔返嚟?』;我去咗大陸做嘢,都要同佢facetimeo架。佢係公主嚟,鍾意着成套公主衫。女仔OK啦!不過我睇到佢冇公主病嘅。」

兒子(左)現已高過張兆輝(右),看上去甚tough,而女兒(中)則如爸爸所說,要多一點呵護。

夜半facial

口裏雖說女兒時時黐身,要時刻「打卡」,但張兆輝卻一臉滿足,還說起一家人到迪士尼之旅,「因為個女鍾意公主吖嘛,所以一話去迪士尼就好開心。不過個仔大嘞,已經唔係好想去。我去接佢哋放學,佢都一路行一路行,到出咗門口先好cool咁叫我Daddy。個女呢,仲係好開心咁走過嚟攬住我。

「我諗過多幾年啦,佢未必好似o依家咁,所以我更加要爭取時間同啲仔女相處。」

對女兒更「癡纏」,張兆輝說太太絕不呷醋,只是常提醒他做facial。「初初我都抗拒o架,男人之家做facial,但係日子耐咗,我又覺得我老婆係啱o架喎。尤其是我做呢行,一個close up見到啲毛孔黑忟忟,又好多黑頭咁,點得吖?

「以前要老婆叫,我先瞓低畀佢做facial;o依家我有時半夜收工,返到屋企都要拍醒佢幫我執,我就『快叉』(小睡),之後再去開工。」

跟太太結婚十六年,張兆輝仍高呼幸運:「我老婆又靚又叻,識到佢係我嘅幸運。之前佢一直想有自己嘅品牌,o依家又做到,算係咁啦!」

張兆輝與太太一同敷自家出品的面膜,齊做生招牌。

按部就班

張兆輝的「算係咁」,有理由相信是包括他現居的貝沙灣豪宅,價值約二千九百萬。「唔係豪宅,其實係比上不足比下有餘先啱。我又唔係炒樓,係一步一步嚟,樓換樓o架!咁畀啲細路住,都要舒服啲。我覺得買磚頭實際啲,起碼係自己有得住。搵到錢,就換層好啲嘅,我份人穩陣,唔會一步登天。o依家啲後生仔成日怨呢樣怨嗰樣,又話買唔到樓,其實係心急。慢慢嚟,一定得。

「我第一層係沙田富豪花園,嗰年廿八歲,首期廿幾萬係我自己儲番嚟。從來唔買股票,我老婆試過信啲山埃貼士,蝕埋錢就更加唔敢入市。做人,夠使就得,要知足。錢搵唔晒嘅,唔使試啲高風險嘅嘢。」

張兆輝與太太(左二)的生意愈做愈大,去年博覽還有多年好友戚美珍(左一)與黃(金己)瑩(右一)力撐。演戲,他只為興趣。

張兆輝的穩陣,大概可從他於捱了十九年,才與太太拍住上搞美容生意看出。「我中學未畢業就讀訓練班,演戲係我識做又熟嘅嘢。係,嗰時有啲同學係發展得好,但係我諗我都唔差喎。唔使煩,又有工開,每年有三百蚊人工加,幾好吖!咁又耷低頭做囉!」

直至由「男一」變「男二」、「男三」,到○一年離開無綫前,在《雲海玉弓緣》飾演林峯老竇,便觸碰了張兆輝求變的心。「嗰時公司叫我做乜我就做乜,咁我覺得我有出糧嘅,點會扭計?更加唔會有咩堅持,有角色派畀我,我一定拍。以前唔識吖嘛、點會話唔係男主角就唔做吖?」

說男人得天獨厚地襟老,看張兆輝與《神鎗》拍檔周海媚於九三年的《雌雄大老千》的劇照,二人廿年前後的變化,不太明顯。

從未停步

十九年的青春,名氣之外,張兆輝的實際收益不多,香港電影業起飛時,他因合約拍不了電影;○一年離開,他的月薪亦只有兩萬多,他靜極思動了。「嗰時我睇唔到留低有咩將來,我唔為自己打算,個仔都要食奶o架。有家庭就會諗多咗,想賺多啲錢,太太做開美容,唔熟唔做,咁咪試吓做生意。」

天外的天空,自然更加廣闊。張兆輝的生意上軌道後,○三年遇上另一個機會——杜琪峯。「杜生搵我拍《大隻佬》,係因為佢睇咗TVB嘅《倚天屠龍記》,睇到我做楊過。我拍《殭屍奇兵》(八八年)已經識佢,杜生睇住我入行,我值幾多分,佢一定摸得清。」

進軍國際,張兆輝(箭嘴示)的對手,已換上「雷神」(右)。

《大隻佬》令張兆輝首嘗「最佳男配角」提名之味,後來的《柔道龍虎榜》、《大事件》、《黑社會》系列,《放逐》、《神探》等,把張兆輝推上另一層面,在米高曼(Michael Mann)的新作《Cyber》中,做「雷神」基斯漢斯禾夫(Chris Hemsworth)及湯唯的車手。「荷李活有荷李活嘅一套,拍一場追車戲,導演真係落埋場指揮,去馬來西亞拍外景,隊crew真係運番我喺香港揸嗰o架van仔過去,認真到不得了。香港真係有排學。」

八七年的《黃金十年》劇照,到一三年,關禮傑、歐陽震華及張兆輝(左至右),仍是圈中活躍分子。

入行前的張兆輝,一臉稚氣。

小白捉快閃

訪問照拍攝期間,攝影師汗流浹背捕捉張兆輝的最佳角度,冷不防他一句:「咦,你嗰支小白靚嘢嚟喎!」

「小白」者,某攝影名牌的70-200mm鏡頭也。我問張兆輝可是龍友?「玩吓咁啦。以前影啲仔女,o依家就影風景。之前天氣唔好,行雷閃電,我喺屋企露台set腳架、光圈,諗住影閃電。揸住杯紅酒等啦,一閃我就撳shutter,但係我冇計到相機回電,得一兩張得。」

留住溫度,但不夠速度,張兆輝已計劃好下次再試:「下次set兩個相機!我諗過,十年後,仔大女大,最好可以同太太兩個環遊世界,到時再影。」

張兆輝貝沙灣家中的露台,坐擁270。海景。

    全站熱搜

    tvb4life 發表在 痞客邦 留言(0) 人氣()