死敵勁敵辭職 張文采開心狂晒腿

死敵  勁敵 黃紫盈 陳嘉欣 辭職 張文采 開心 狂晒腿

今年六月二十七號,二十六歲嘅無綫新聞主播黃紫盈,喺報道新聞嘅時候突然雙眼通紅兼淚灑幕前,因而被稱「淚的小花」。事件原來同另一名主播張文采有關,而兩人嘅爭執更成為一時嘅傳媒熱話,並將事件貫以「無綫新聞部《金枝慾孽》現實版」添。事後,黃紫盈與張文采都畀新聞部嘅高層照肺,有說黃紫盈更被迫令放兩個幾禮拜大假;而返回工作崗位後,黃紫盈不單被調去做凌晨十二點新聞,更被同事們孤立。早前,就有傳媒影到佢放工一個人,食飯一個人,好落寞。

開心買鞋、唔開心買鞋,張文采呢次肯定係開心買,因為佢話喺淘寶用六、七十蚊就買到靚鞋,仲一次過掃咗幾對添。

張文采嘅男友係TVB嘅藝人羅鈞滿,近日佢就憑住《星夢傳奇》而彈起,開始為觀眾所熟悉。

走咗兩個對手,張文采風騷到喺微博晒美腿益粉絲。

捱咗兩個月做孤獨精,日前,黃紫盈終於決定離開是非之地,據知佢畀一間商營公司高薪挖角轉行做公關,而另一名資深主播盤翠瑩亦蟬過別枝轉到馬會。走咗個死對頭,又走埋個強勁嘅對手,張文采開心至極,最近佢嘅心情大靚仲狂喺淘寶買靚鞋,然後喺微博着住戰利品晒長腿。

不過,計東姑所睇,新聞部兩大小花走咗,最大得益者應該係曾經喺微博pose過港女十式嘅主播陳嘉欣。因為無綫嘅資深女主播所餘無幾,而被網民like爆嘅「嘉欣BB」已被封為新一代「主播女神」,鷸蚌相爭,漁人得利!早前,「嘉欣BB」已坐正主播位做午間新聞,當年周嘉儀都係由午間新聞做起,似乎「嘉欣BB」升呢在望。

擁有一張Baby face嘅陳嘉欣經常被網友cap佢嘅嘟嘴圖,令人好有遐想。

鏡頭後的盤翠瑩相當鬼馬,早前去採訪時,佢就玩嘢咁喺山頂纜車上做出Michael Jackson嘅四十五度傾斜舞步。

「淚的小花」嘅黃紫盈,原來私下好鍾意去旅行,呢張喺日本影嘅和服相夠晒「卡娃依」呢!

全站熱搜

tvb4life 發表在 痞客邦 留言(0) 人氣()