李治廷唔識柒良拒合照


■李治廷話唔知柒良係邊個,拒絕合照。

李治廷、「柒良」蔡瀚億、文穎珊(Janice Man)等前日喺圓方出席《一級雙雄》首映禮,李治廷同柒良喺台邊有講有笑,當記者邀請佢哋一齊合照時,李治廷竟然冇反應,助手仲耍手話唔影,搞到柒良企咗喺度好尷尬,反而JM就同柒良興奮玩自拍。問李治廷識唔識柒良?佢話:「死嘞,我認唔到個名,但我識《狂舞派》個producer Winnie曾,佢係我同學個阿姨,《歲月神偷》去柏林影展時已認識。」


■柒良人氣勁,Janice Man私下亦同佢玩自拍。

冇睇《狂舞派》

李治廷曾揚威海外,最近又同「國際范」范冰冰傳拍拖,名氣當然勁過柒良,但李治廷同冰冰部新片《一夜驚喜》截至前日在港只收6萬2千幾票房,同《狂舞派》嘅1,280幾萬票房有一段大距離;《狂》片早前入圍第56屆亞太影展,同奪得日本福岡國際電影節嘅觀眾大獎,後勁凌厲嘅柒良話:「《狂》片係一個好靚嘅夢,呢個夢好似煙花咁越爆越勁,超乎預期。」
李治廷話冇睇《狂舞派》,問係咪掛住拍拖?佢話:「係顧住寫歌。」寫情歌?佢笑話:「寫英文歌,我係演員,可以幻想對象。佢(冰冰)之前錄歌,我嘅意見都肯聽。」追問兩人關係?佢話:「嗰啲劇照,我好鍾意去旅行,到時有相再傾啦。」
撰文:馮仁昭

    全站熱搜

    tvb4life 發表在 痞客邦 留言(0) 人氣()