白頭陳幫手湊孫
陳小韻又大肚等生


■陳小韻(右)嘅囝囝Liam先兩歲,佢話咁快又大肚,三年抱兩,認真恭喜。

【跑馬地】當年戀上章小蕙嘅「白頭陳」陳曜旻,分手之後宣佈破產,兩個人已經冇聯絡,日前白頭陳同個女陳小韻現身跑馬地,09年陳小韻嫁咗圈外老公Kin,前年兩人嘅愛情結晶品囝囝Liam出世,原來陳小韻又大肚,現年36歲嘅佢肚大如籮,估計最少有7、8個月身孕,三年抱兩恭喜恭喜!


■肚大如籮嘅陳小韻同老竇陳曜旻日前現身跑馬地,兩父女商量攞playgroup資料。

攞料報兒童班

當日陳小韻拖住兩歲囝囝Liam,同老竇白頭陳坐車去跑馬地,兩父女落車傾咗幾句後,白頭陳一個人跑過馬路,入咗對面大廈嘅一間兒童學習中心,估計父女幫Liam搵playgroup資料,廿四孝嘅白頭陳唔想大住肚嘅陳小韻操勞,自己出馬上樓攞資料,冇幾耐佢落樓會合個女,然後齊齊上七人車離開。

 

B仔脹爆凸腩

同白頭陳一樣回流香港嘅章小蕙,佢同鍾鎮濤(阿B)生嘅囝囝嘉浚,喺美國讀完書同媽咪返咗香港,現年23歲嘅嘉浚可能食得薯條多,身形麻甩又凸腩,完全冇遺傳老竇嘅健碩身形,個樣仲有啲似綠葉韋家雄㖭,嘉浚近日頻頻將打波健身相上載facebook,唔知幾時減肥成功?
採訪、攝影:朱志聰、徐錦池


■年屆60歲嘅鍾鎮濤身形健碩,keep得好過個仔。微博圖片


■23歲嘅B仔鍾嘉浚凸腩發福,個樣仲有啲似韋家雄(小圖)㖭。
互聯網圖片

    全站熱搜

    tvb4life 發表在 痞客邦 留言(0) 人氣()