
Webber
Mary姐 貝麗婷 清純初下海
網絡紅人千奇百趣,有教化妝、有拍笑片、有自彈自唱,以往《 Webber》已經訪問過唔少紅人。但好似今期主角 Mary姐咁難定位,都係第一次!
今年先得 17歲嘅 Mary姐,初初拍片都只係貪過癮,對住鏡頭自言自語、爆粗鬧人、扮吓 MK仔,點知無無聊聊就有 4萬幾訂閱、 300幾萬點擊。多人睇全靠夠隨意,唔少人鍾意佢夠豪邁、乜都夠膽死;雖然屋企一件白衫都冇,叫佢收番霸氣化個淡妝扮清純,原來都冇問題呀!
Webber's profile
Mary姐
原名:貝麗婷
職業:兼職
YouTube頻道: laiting Pui
拍片資歷:約 1年
作品總數:約 70
總 hit rate: 360萬以上
subscribe: 4萬 8千以上


呢條《 MK仔 MK妹》化妝片,抄足 MK仔要長蔭遮眼、戴帽要戴一半嘅 style,後來俾上期訪問過嘅《環球膠報》肥仔黎睇到兼轉載,成為 Mary姐最多人睇過嘅片!可惜 facebook分享益唔到 YouTube hit rate!

影完《 FACE》後即時 po上自己 fanpage,唔夠一個鐘即刻出現 Mary姐話搞笑嘅鹹濕留言,不過支持者都十分識貨,知道我哋淨係訪問出名 YouTuber!

Mary姐其實得個樣,真人都係好內向似番 17歲女,約佢嚟壹傳媒影相,仲要搵埋成日同佢拍片嘅伍仔陪佢嚟先夠膽,結果記者索性叫埋佢客串演出今期 Mary姐條片。
1.你咁細個,對住鏡頭講嘢會唔會好怯呢?
其實自小爸媽已經成日用相機、攝影機對住我,所以我好習慣鏡頭,慢慢仲覺得對住鏡頭講嘢反而自然啲、有更多想法。我好細個已經覺得自己將來會做同藝術有關嘅工作,嗰時媽媽一個星期都會帶我去參加唔同比賽,所以上台表演、表達自己呢啲事,我已經做過好多,直到媽媽唔响度先停咗。
2.妳乜片都拍,記唔記得最初點解拍片?
拍片嘅原因我都唔記得,但都一定係有嘢想講先會借自拍去表達,有時我對住人反而冇嘢講,對住部機就可以講唔停。嗰時拍化妝片,係因為有人留言叫我拍,我先去試吓,都唔多。所以其實拍乜都冇定,諗到乜就會拍!嚟緊都想試多啲唔同類型片,最近都有條新片係拍我打緊 online game!
3.妳講嘢咁爆,有冇遇過 Hater?妳點面對?
有,當然有啦。我每條片嘅留言、無論讚定鬧我都會睇,初時都會唔開心,但𠵱家都會希望响所有唔好聽嘅留言度搵吓自己仲有乜嘢進步空間,有時仲會有好搞笑嘅鹹濕留言。
4.妳𠵱家冇工作又冇讀書,只係全職拍片,呢個決定有冇壓力呢?
都冇呀,因為我讀書唔係成績好嗰班,個腦成日諗其他嘢,拍片之後上堂更加唔專心。老師知道我拍緊片,冇責怪我,反而叫我諗吓將來,佢都話唔一定要讀書先有出路,好支持我決定;屋企方面,爸爸都冇阻止我,淨係叫我揀咗想做嘅事就要盡力做。其實我係一個普通人,乜都唔識,拍片剪片都冇學過,但拍咗咁耐已經不斷進步,一開始啲片連字幕都冇,近來都開始有啦,老師同爸爸嘅支持對我影響好大。
〈 Webber〉,每星期專訪一位網絡紅人,每星期展示一種網絡力量。
撰文:熊俊彥
攝影:傅新發
登入 可留悄悄話
留言成功