近 10年最靚陳凱琳係賽前大熱,決賽當晚亦表現淡定,身材可能係佢最弱一環,不過單憑靚樣已夠殺,最終以高票、高分奪冠。 

封面 陳凱琳

賣石油起家 炒鋪賺半億 票后港姐陳凱琳全家唔使做

今年港姐果然超越想像,平均收視 29點,最高 31點。冠軍陳凱琳以大熱姿態當選,譽為近十年最靚港姐。除咗評判 like,連民意都贏埋,最後以 171,478票勝出拋離亞軍蔡思貝 6萬多票,正宗實至名歸。
冠軍陳凱琳唔只擁有無敵靚樣,連起跑線都強過人。雖然凱琳好謙咁話自己「出生中產家庭」,但本刊發現陳凱琳唔只住九龍塘 5,000呎過億獨立屋,老豆陳桂祥亦身家豐厚,炒鋪賺近 5,000萬不特止,現仍手持 3間市值近 5千萬的商鋪收租。陳父向本刊透露:「以前係做油站代理生意……我𠵱家退休㗎喇。」翻查紀錄陳父喺 88年曾經將佐敦道 36號物業,轉按予蜆殼石油套現廿幾億。嘩!幾十年前就幾廿億身家,真係超越想像咁有錢喎!

 

22歲陳凱琳以大熱姿態奪得港姐冠軍,更攞埋「最上鏡小姐」及「旅遊大使」成為 3料冠軍。陳凱琳唔只貌似李嘉欣,靚樣無敵,家境亦唔講得笑。比賽當晚就連司儀曾志偉及阿叻亦以陳凱琳居於 5,000呎九龍塘獨立屋作話題。雖然凱琳謙稱屋企只屬「中產」,但本刊發現陳凱琳家族身家的誇張程度,絕對唔只得一間獨立屋咁簡單。


今年港姐冠、亞、季,評判畀分同投票都一致,令年年被鬧爆無綫內定嘅網民冇聲出。 

鋪王老豆陳桂祥:我退咗休喇!(真實對白)陳凱琳同雙親關係親密,但孖生胞弟因要喺溫哥華返學,未能現身到場睇家姐奪冠。 

陳凱琳奪冠後,幫《 TVB週刊》影完封面,然後回九龍塘玉蘭路大宅。陳父已在門口恭迎,夠晒派頭。 

陳凱琳攞冠軍,《東張西望》亦到陳家採訪,神秘嘅 5,000呎豪宅亦得以首度曝光。單係玄關已可企滿廿位親友,及一隊 crew,就知咩叫真正豪宅。 

億萬身家坐廠巴

陳凱琳一家自小居於九龍塘玉蘭路獨立屋, 5歲移民加拿大,直至最近大學畢業回港參加港姐才回歸豪華大宅。
雖然凱琳之前交代過該屋屬祖屋,但陳父陳桂祥原來財技了得,由 96年至 08年間狂炒父親陳鴻鈞生前購入的商鋪,賺近 5千萬。雖然陳父身家億億聲,但為人十分低調。週日( 1日)入場撐愛女,亦只係搭無綫接駁巴士到場,絕對唔愛炫富;而陳凱琳亦生活平民最愛食麥當勞快餐。知情者說:「其實好少人知佢家底,平時同工作人員食 canteen,走嗰陣都係一齊搭廠巴。」

 

陳凱琳家住超豪宅,決賽當日更被司儀阿叻攞嚟於答問環節借題發揮。好彩陳凱琳亦答得大體,「我屋企人唔係非常富貴,但係心中富有,住得好開心。」


陳父持 1.5億物業

陳凱琳謙稱家族只屬「中產」,而且現居的九龍塘獨立屋只屬祖父母物業。陳父早前接受訪問便說由於自己是父親遺產繼承人,所以現在只是繼承父親物業。
本刊翻查田土廳資料,發現陳凱琳祖父陳鴻鈞及祖母自 50年代開始已投資商鋪,陳鴻鈞於 87年過身後,生前持有的物業業權便由陳凱琳父陳桂祥及另一陳姓女子(估計是陳桂祥姊妹)持有。而陳桂祥自 96年開始陸續把手上持有的商鋪出售套現,累積已賺近半億,而陳父現持有的物業市值亦達 1.5億元。如果咁都算中產,香港大部分人係赤貧喎!


現居玉蘭路 

陳父擁 Shell油站?

陳父亦向本刊透露「退休」前曾從事油站代理生意。根據資料顯示,陳父及疑似其姊妹持有的「 Tai lee No. 3 Co., Ltd.」曾報地址位於旺角的 Shell油站。而本刊亦查到於 88年間,陳父繼承的佐敦道 36號物業曾轉按給 Shell Hong Kong Ltd.,金額達 24億 5千萬。不過 Shell的股東資料並沒顯示跟陳父有關。挾廿幾億身家選港姐,仲要靚爆鏡,唔贏就假啦!

陳父:「都係屋企留落嚟!」

唔夠六十歲就退休唔使做嘅陳父唔只低調,原來同 Shell「蜆殼」石油亦關係密切。早於 88年,當時陳父把佐敦道 36號物業轉按予蜆殼石油公司,套現 24億 5千萬,明顯跟蜆殼石油公司關係密切。週日( 1日)陳父到電視城見證愛女奪冠,本刊問他從事什麼工作,陳父謙虛回應:「我以前係做油站代理生意嘅!(咁係邊間?)呢層我就唔方便講喇,唔好意思。(𠵱家靠收租生活?)哈哈!都係嗰啲啦!其實好多都係屋企留落嚟,我兩公婆𠵱家都退休喇,第時靠個女同個仔(陳凱琳孖生細佬)㗎喇,哈哈……」而陳凱琳對於出身大富之家亦扮懵,她說:「我其實唔清楚屋企嘅生意㗎,我只係知 daddy媽咪畀咗個好幸褔嘅家庭我。」


2/9下令增肥陳凱琳於週一開始不斷出席得獎活動。據知無綫高層已下令叫佢要極速增肥。陳凱琳真係要食多啲先得。 

陳凱琳天生瘦底,決賽當日依然係 87.2磅,雖然冇乜事業綫,但勝在上鏡啱啱好! 

無綫今年首次半公投,更公開票數增加透明度,結果更凸顯陳凱琳以壓倒性得分奪冠。 

選美期間,陳凱琳被指整容,她除咗否認,更喺 TVB blog公開自己多張童年照以證明,由細到大個樣都係鬼鬼哋。 

夠晒效果

今屆港姐,除真真正正全民投票夠新意外,舞台更仿效歐陸式復古火車站再加 cyber燈效配合,算比之前咁多屆有創意,但一樣有抄襲嫌疑。

勁抄 LV?

今屆港姐舞台以歐陸復古火車站做背景,其中一幕,就係一班港姐搭住復古火車出場。睇真啲,呢個火車場景,同上年 LV秋冬季時裝騷(小圖)嘅背景似模似樣嘅?


變《人氣歌謠》?

近年韓流橫掃全球,所以香港小姐亦緊貼潮流,成晚狂播韓國人氣女團如 f(x)嘅〈 Electric Shock〉、 Crayon Pop嘅〈 Bar Bar Bar〉以及 Secret嘅〈 Shy Boy〉等做背景音樂,感覺好似睇緊 SBS節目《人氣歌謠》喎!

煎 Pang懵盛盛

「最上鏡小姐」則由另一班 TVB新紮男藝員,如梁烈唯、鄭俊弘等做評判即場投票選出,由於屬新形式,評判之一嘅陳展鵬就懵盛盛唔識㩒平板電腦,最後被台上嘅星級選民曾志偉猛咁催,搞到「煎 Pang」鬼咁尷尬。他說:「我識用㗎,但真係㩒唔到喎,可能隻手凍呀!」

嘉欣 BB爛面

今屆請咗 04年國際華裔小姐冠軍鍾嘉欣同 chok王林峯一齊做評判,近排忙完開演唱會同拍劇嘅嘉欣 BB,雖然清減咗,但近睇額頭同兩條眉毛中間爆晒瘡,慘變爆瘡 BB。嘉欣表示:「我呢輪要開《飛虎》,因為之前開 concert;𠵱家要補拍番晒,冇時間瞓就會咁!」

寸嘴亞軍蔡思貝飛德國男友

富貴冠軍陳凱琳樣靚又得民心,其實亞軍蔡思貝亦甚得巴打支持,於決賽當晚蔡思貝爽朗性格表露無遺,除了話$歐陽巧瑩「假」外,早前亦暗寸冠軍陳凱琳成日要化妝先見得人「冇意思」。
據知蔡思貝跟陳凱琳關係唔錯,並冇因此反面。對於敗給陳凱琳,蔡思貝講明冇 hard feeling:「 Grace(陳)係實至名歸,佢對答係好過我,但我攞到亞軍已好開心喇!」
留學德國,家住杏花邨的蔡思貝性格爽直,但選美前就忽然跟東歐立陶宛籍男友分手,更剷走個人 facebook帳戶,包括之前同男友影落的密照亦人間蒸發。問蔡思貝是不是為參選而被迫跟男友分手,蔡思貝由爽快變耍太極:「我同佢係分咗手,係和平分手嗰隻,至於細節我就唔講喇!」


化咗妝先見得人好似冇乜意思!(真實對白)蔡思貝雖然最後得亞軍,但同冠軍陳凱琳關係友好,亦承認自己表現唔夠陳突出。 

蔡思貝父親為警察亦係游泳健將,身形亦同蔡思貝一樣身材高大健康。蔡現跟同父母居於杏花邨,屬小康之家。 

蔡思貝為人率直,決賽當晚被阿叻問邊個佳麗最假,她直言好友$歐陽巧瑩最假。雖然佢解釋因$「扮嘢」最叻,所以假,但佢講起嚟語氣好重, get唔到以為佢堅寸對方。

 

蔡思貝( Sisley)性格不拘小節,參選初期 facebook仍然公開, po咗唔少前年佢同男友 Deividas嘅甜蜜照。 Sisley話:「我冇咩唔見得人!點解要刪除?」不過本週一記者再嘗試找 Sisley fb,帳戶忽然人間蒸發。


網上圖片 

網上圖片 

蔡思貝同立陶宛前男友 Deividas拍拖兩年多,不時攬埋一嚿好煙韌。網上圖片

季軍劉佩玥都有米

季軍劉佩玥( Moon)在觀眾投票初期,落後畀'劉溫馨,最終卻後來居上奪季軍。參加港姐前,劉佩玥曾簽約施念慈旗下做模。喺浸大傳理系畢業嘅 Moon,做過空姐,雖然被指愛揀有錢男友,但劉佩玥原來都係有錢女,喺準決賽時已表示屋企面積近千呎,屋企有工人。而據知佢同父母居於南區豪宅紅山半島,這名牌屋苑面積 1,300呎至 3,000呎不等,又係富貴港姐。





採訪、撰文、攝影:娛樂組

tvb4life 發表在 痞客邦 留言(0) 人氣()